काठमाडौं– नारायणहिटी दरबार संग्राहलयभित्र रहेका आखेटोपहार व्यवस्थापनको कार्य तिब्र भएको छ।
राष्ट्रियसभाको प्रत्यायोजित व्यवस्थापन तथा सरकारी आश्वासन समितिले राष्ट्रिय निकुञ्ज तथा वन्यजन्तु संरक्षण विभागका उपमहानिर्देशक गोपाल प्रकाश भट्टराईको संयोजकत्वमा समिति गठन गरेको थियो। सोही समितिले संग्रालयभित्र रहेका विभिन्न जनावरका सिङ, दाँत, टाउकोलगायतका आखेटोपहारको संरक्षणका लागि आवश्यक सुरक्षाका कामहरु गरेको हो।
'हामीले पहिलो चरणमा आवश्यक तयारीहरु गरिरहेका छौं', भट्टराईले भने, 'सुरक्षाका लागि माइक्रो चिपिङ, बार कोडिङ, नापजाँच र तौल लिने काम गरेका छौं। सम्पूर्ण रेकर्डहरु कम्प्युटरमा राखेका छौं। समितिमा भएका मान्छेहरु मात्रैले नपुग्ने भएर नेपाली सेना, नेपाल प्रहरीको सहयोगमा नारायणहिटी संग्रालयको काम सुरु गरेका हौं।'
भट्टराईले हड्डी र सिंङहरुको काम लगभग सकिने चरणमा पुगेको बताए। 'त्यसपछि छालाको काम सुरु गर्छौं', उनले भने।
समितिले ती आखेटोपहारको रेकर्डिङ गरेर संग्रालयकै एउटा कोठामा त्यसलाई संग्रह गरिरहेको छ। काम सकिएपछि सरकारको निर्णयअनुसार त्यसलाई राखिने भट्टराईले जानकारी गराए।
नारायणहिटीको काम सकिएपछि हनुमान ढोका र सिंहदरबारको ग्यालरी बैठकको काम सुरु गर्ने भट्टराईले बताए। 'फिल्ड भिजिटमा जाँदा ग्यालरीको ढोका (भुकम्पले पुगेको क्षतिका कारण) नखुल्ने जानकारी पाएछौं। हामीले गृहमन्त्रालयलाई जानकारी गराएका छौं। खुल्यो भने काम गर्छौं। खुलेन भने त्यही अनुसारको रिपोर्ट बनाउनेछौं', उनले भने।
प्रत्यायोजित व्यवस्थापन तथा आश्वासन समितिमा सभापति रामनारायण बिडारीले कामबारे अनुगमन गरेका थिए। उनले सन्तोषजनक रुपमा काम भइरहेको भन्दै संयोजक भट्टराईलाई धन्यवाद दिए। 'सकेसम्म राम्रा सामान बचाउने र नसकिनेजति सिफारिस गरेर कानुनमा उल्लेख भए बमोजिम नष्ट गर्नुपर्ने वा अन्य व्यवस्थापन गर्नका निम्ति हाम्रो पनि सहयोग रहन्छ', उनले भने।
नारायणहिटी दरबार संग्राहलयअन्तर्गत फरासखाना, हनुमानढोकाको बेलायती बैठक र सिंहदरबारमा रहेको वन्यजन्तुको आखेटोपहार एक महिनाभित्र संरक्षण गरी प्रतिवेदन बुझाउन समितिलाई निर्देशन छ।
दरबार संग्राहलय क्षेत्रमा राजा वीरेन्द्रले राखेका वन्यजन्तुको छाला, सिङ, दाँत, प्वाँख, चराको टाउकोलगायतका अखटोपहार छन्। जंगलबाट तत्कालीन समयमा सिकार गरेर ल्याइएको वन्यजन्तुका कतिपय आखेटोपहार अहिले काम नलाग्ने अवस्थामा समेत पुगेको संग्राहलयले जनाएको छ।
यो पनि पढ्नुहोस्ः
नारायणहिटी संग्रहालयका लागि चिनियाँ घाँस उमार्नेदेखि पाकिस्तानी घोडा किन्नेसम्मका सुझाव
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
