एजेन्सी- प्यालेस्टाइनी राष्ट्रपति मोहमुद अब्बासले मध्यपूर्वको शान्ति प्रक्रियामा अमेरिकी राष्ट्रपति डोनाल्ड ट्रम्पले खर्चिएको शक्तिलाई शताब्दीकै झापडको संज्ञा दिएका छन्।
प्यालेस्टाइन नेताहरुसँगको छलफलमा उनले जेरुसेलमलाई इजरायलको राजधानी बनाउने अमेरिकी प्रस्ताव आएपछि आफूले ट्रम्प प्रशासनबाट आउने कुनै पनि शान्ति प्रक्रियाका योजना स्वीकार गर्न नसक्ने जिकिर गरे।
उनले सन् १९९५ मा सुरु भएको शान्ति प्रक्रिया ‘ओस्लो सम्झौता’लाई भंग गर्न इजरायल आफैँ दोषी रहेको समेत आरोप लगाए।
उता प्यालेस्टायनले शान्ति वार्तालाई अस्वीकार गरेपछि ट्रम्प प्रशासनले उसलाई अहिलेसम्म दिँदै आएको सहायता कटाउने धम्की दिएको थियो।
यो वर्षको सुरुवातमा अमेरिकी राष्ट्रपति ट्रम्पले शान्ति प्रक्रियाअन्तर्गत जेरुसेलमले वार्ताको टेबललाई भंग गर्नुलाई सकारात्मक भनी संज्ञा दिएका थिए। यसकारण पनि प्यालेस्टाइन नेताहरुले अममेरिका एक तटस्थ राष्ट्र हुन सक्नेमा आशंका व्यक्त गर्दै आएका छन्।
अब्बासले बैठकमा के भने?
पछिल्लो समयको अमेरिकी कदमप्रति आफ्नो धारणा बनाउन २ दिनदेखि प्यालेस्टाइन नेताहरु रमल्लाहमा गम्भीर छलफल गरिरहेका छन्।
जेरुसेलमलाई इजरायलको राजधानीको मान्यता दिन आएको अमेरिकी प्रस्तावमाथि संयुक्त राष्ट्रसंघको जनसभाले अफसोस व्यक्त गरेपछि गत महिना नै अब्बासले अमेरिकी प्रस्ताव नकारेका थिए।
‘यो सम्झौता शताब्दीकै ठूलो झापड हो। जुन हामी मान्न तयार छैनौं,’ आइतबार नेताहरुसँगको छलफलपछि आफ्नो धारणा राख्दै राष्ट्रपति अब्बासले भने, ‘जुन ओस्लोको मैले कुरा गरिरहेको छु, त्यहाँ कुनै ओस्लो थिएन। जसलाई यसअघि नै इजरायलले भंग गरिसकेको छ।’
वासिंगटनले पछिल्लो केही महिनादेखि शान्तिको लागि नयाँ योजना तयार पारेको भए तापनि यसको कुनै विवरण सार्वजनिक गरिएको छैन।
आइतबार राष्ट्रपति अब्बासले प्यालेस्टाइनी जनताले जेरुसेलमको बाहिरी क्षेत्र अबुदिस गाउँलाई भविष्यको राजधानी भएको हेर्न चाहिरहेको प्रस्ताव गरे।
आलंकारिक भाषामा अब्बासले आफ्ना जनतालाई ‘जेरुसेलम गुमेको भए तपाईं के चाहनुहन्थ्यो?’ भनेर प्रश्न गरेका थिए।
उनले ‘अबुदिसलाई के तपाईं राज्यको राजधानी बनाउन चाहनुहुन्थ्यो?’ भनेर समेत सोधेका थिए।
गत महिना मात्रै उक्त गाउँलाई अमेरिकाले भविष्यको राजधानीको रुपमा प्रचार गरेको प्यालेस्टाइनी समूह हमासका नेता इस्मेल हनियाले बताएका छन्। उनका अनुसार हमासलाई समेत उक्त बैठकमा बोलाइए पनि आफूहरुले भने बैठकमा भाग लिन अस्वीकार गरेको जानकारी दिए।
शान्ति प्रक्रियाको लागि जेरुसेलमको अवस्था किन महत्त्वपूर्ण?
जेरुसेलम सहरलाई संसारको सबैभन्दा आकर्षक तथा ऐतिहासिक सहरमध्ये हेरिन्छ। इजरायलले भने जेरुसेलमको सम्पूर्ण भूभागलाई राजधानीको रुपमा लिँदै आएको छ। तर सन् १९६७ को मध्यपूर्वको युद्धपछि इजरायलमा रहेको पूर्वी जेरुसेलमलाई भने प्यानेस्टाइनीहरुले भविष्यमा आफ्नो राज्यको राजधानी बनाउन चाहिरहेका छन्।
अमेरिकी राष्ट्रपति ट्रम्पले जेरुसेलमलाई इजरायलको राजधानीको रुपमा औपचारिक प्रस्ताव गरेपछि भने मध्यपूर्वमा फेरि अशान्ति फैलन सक्ने सम्भावना देखिएको हो। (बिबिसीबाट)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
