आफ्नै आमाले छोरीलाई बन्धक बनाइ बलात्कार गर्न सहयोग गरेको खुलासा

अजय शाह | २०७६ श्रावण ६ सोमबार | Monday, July 22, 2019 १९:२७:०० मा प्रकाशित

जनकपुर-  एक महिलाले आफ्नै नाबालिग छोरी बन्धक बनाइ बलात्कार गर्न सहयोग गरेको घटना सार्वजनिक भएको छ।

महोत्तरीको भंगहा नगरपालिकाकी एक बालिकालाई आमाकै सहयोगमा दिल्लीमा १५ दिनसम्म बन्धक बनाएर बलात्कार भएको घटना सार्वजनिक भएको हो।

भंगहा–६ की एक १२ वर्षीया बालिकालाई उसकै आमाको सहयोगमा २०७६ जेठ २७ गते स्थानीय ४० वर्षीय सियाराम महतोले दिल्ली पुर्‍याए।

पीडित बालिकाको आमाको सियारामसँग हिमचिम एवम् अनैतिक सम्बन्ध भएको कारण उसकी आमा पनि छोरीलाई सँगै लिएर दिल्ली पुगेकी थिइन्। दिल्लीको एउटा कोठामा बन्धक बनाइ १५ दिनसम्म चरम यौनशोषण गरेको पीडित बालिकाले बताएकी छन्। 

पीडित बालिका, उनकी आमा र सियाराम अचानक लामो समयसम्म गाउँमा नदेखिएपछि उनीहरूको खोज गर्ने क्रममा झण्डै १२ दिनपछि सियारामले दिल्ली लगेको खुलासा भयो। 

दिल्ली लगेको जानकारी पाएपछि बालिकाकी ठूलीआमा (मौसी) ले जिल्ला प्रहरी कार्यालय महोत्तरीमा सियाराम र उनका बुबा रामअशिश महतोमाथि निवेदन दिइन्। त्यसपछि असार १६ गते साँझ सियाराम आमा छोरीलाई लिएर घर आएका थिए। तर, प्रहरीमा निवेदन दिएको जानकारी पाएपछि सियाराम र बालिकाकी आमा फेरि फरार भए।

पीडित बालिकाले न्यायको लागि जिल्ला प्रहरी कार्यालय महोत्तरीमा असार २२ गते उजुरी दिएकी छन्। गत असार २२ गते जिल्ला प्रहरी कार्यालय महोत्तरीमा दिल्ली लगेर १७ दिनसम्म बन्धक बनाइ बलात्कार गरेका सियाराम र उक्त घटनामा सहयोग गरेकोमा उनका बुबा रामअशिश महतो र स्थानीय रामजतन महतोमाथि किटानी जाहेरी दर्ता गराएकी छन्।

उजुरी परेको दिन नै बालिकाको स्वास्थ्य परीक्षण गरिएको प्रहरी उरीक्षक श्यामकृष्ण अधिकारीले बताए। ‘बालिकाको स्वास्थ्य परीक्षण भइसकेको छ। मुख्य पीडक र बालिकाकी आमा फेरि भारततिर भागेको आशंका छ,’ उपरीक्षक अधिकारीले भने, ‘हामी खोज गरिरहेका छौं। पीडकले कुनै पनि हालतमा उन्मुक्ति पाउँदैन।’

बाबु बेपत्ता, आमाको अर्कैसँग हिमचिम 
पीडित बालिकाको बुबा एक वर्षदेखि बेपत्ता छन्। बुबाको बायाँ खुट्टा कमजोर थियो। गरिबी मानसिक सन्तुलन गुमेपछि बुबा हराएको छिमेकीले बताएका छन्। 

तर बालिकाकी आमाले श्रीमानको खोजखबरमा कुनै चासो नदिएको उनी बताउँछिन्। आमा छिमेक सियारामकोमा ज्याला मजदुरी गर्दा गर्दै उसैसँग हिमचिम गरेको बालिकाले बताइन्।

पीडित बालिकाको उनीसहित दिदी बहिनी र एक भाइ छन्। बालिकाकी ठुली आमाले भनिन्, ‘तीन छोराछोरी छन्। ज्वाँइ अपांग थिए। पछि मानसिक सन्तुलन गुमेपछि हराए। तर, मेरो बहिनीले श्रीमान्को कुनै खोज गरिनन्। बरु उल्टै पर पुरुषसँग सम्बन्ध बनाइन्।’ 

उनले अन्याय र बिचल्लीमा परेकी पीडित बालिकालाई सहयोग गर्न सबैसँग आग्रह गरिन्।

कसरी दिल्लीबाट नेपाल आइन् बालिका? 
घरबाट जनकपुरमा रोजगारी गर्न जान लागेको भनेर बालिकाकी आमाले आफ्नी ठूली दिदीलाई भनेकी थिइन्। ठूली आमाको अनुसार ‘जनकपुरमा होटलको सरसफाइ गर्ने काम सीतारामले लगाइदिन्छ भनेकी थिईन्,’ उनले भनिन्, ‘घरबाट हिँडेको एक साता भइसक्दा पनि फोन आएन। शंका लागेर खोजी गर्न थालेकी हुँ।’ सुरुमा आफन्त सबैसँग सोधखोज गर्दा कुनै खबर नपाएको उनले बताइन्।

उनका अनुसार दिल्लीमा कपाल काट्ने काम गरिरहेको गाउँकै एकजनाले बहिनी र छोरी दिल्लीमा रहेको खबर पठाए। त्यसको केही दिनपछि बालिका र उनकी आमाले भिडियो कल गरेकी थिइन्। त्यसैको भोलिपल्ट बालिकाले आमा र सीताराम नभएको मौका पारी फोन सम्पर्क गरी घटनाबारे जानकारी गराएको बालिकाको ठूली आमाले बताइन्। 

‘सो जानकारी पाए लगत्तै आमाछोरीलाई नेपाल ल्याई दिन सीतारामका बुवा रामअशिष महतो र उनकै आफन्त पर्ने स्थानीय नेता रामजतन महतोलाई गुहार गर्न थालें,’ बालिकाकी ठूलीआमाले भनिन्, ‘कसैलाई नभन्ने र उजुरी नगर्ने सर्तमा उनीहरूलाई नेपाल ल्याइदिने कुरा भयो।’ 

सर्त स्वीकार गरेकाले असार १७ गते बालिका आफ्नी आमासँग घर आउन सफल भइन्।

बालिकाको स्वास्थ्यमा समस्या, उपचारको लागि खर्चको अभाव 
बालिका दिल्लीबाट फर्केदेखि नै स्वास्थ्यमा समस्या रहेको छ। बालिकाको चरम यौन शोषणले तल्लोपेट दुख्ने, टाउको दुख्ने, रिंगटा लाग्ने जस्तो स्वास्थ्य समस्या देखिएको छ। ‘तल्लो पेट कुनै कुनै बेला बेस्सरी दुख्छ, टाउको दुख्छ,’ आइतबार जनकपुरमा उपचार गराउन आएकी बालिकाले भनिन्।

बालिकाको घरमा कोही नहुँदा आर्थिक संकटले उपचार गराउन समेत समस्या भएको ठूलीआमाले पीडा सुनाइन्। ‘म हात जोडर बिन्ती गर्छु, तपाईहरू अन्यायमा परेकी छोरीलाई सहयोग गरिदिनुस्, उपचारमा सहयोग गरिदिनुस्। आर्थिक संकटले प्रहरी प्रशासन धाउन र उपचार गराउन निकै संकटमा छु,’ उनले भनिन्।

घटनाबारे यसो भन्छिन् बालिका– 

मलाई आमाले जनकपुरमा सँगै सरसफाइको काम गर्ने भन्दै तिमी पनि हिड्नुपर्छ भन्नुभयो। मैले घरमै बस्छु भनेँ। त्यसपछि आमाले फकाएर मलाई जनकपुरसम्म हिँड्न भन्नुभयो। म तयार भएँ। म आमासँगै घरनजिकैबाट बसमा चढेँ। तर आमाले धनुषाको क्षीरेश्वरनाथ नगरपालिकाको महेन्द्रनगर बजार आई पुगेपछि बसबाट झर्न भन्नुभयो। मैले भनेँ, ‘हजुरले जनकपुर जान्छु भन्नु भएको, यहाँ किन ओर्लिनुभयो?’ आमाले भन्नुभयो– यहाँ केही काम छ। 

बसबाट ओर्लेको केही बेरमा सियाराम आए। त्यसपछि फेरि आमाले बसमा चढेर जनकपुर जाने भन्नुभयो। सबैजना बसमा चढ्याैं। जनकपुर अएपछि आमाले घुम्न इण्डिया जानुपर्छ भन्नुभयो। मैले नाइँ भने। आमाले हप्काउनु भयो। विभिन्न प्रलोभन दिनुभयो। सियारामले पनि हामी घुमेर भोलि नै फर्किने बताए।

जनकपुरमा फेरि जटहीको बस चढेर जटही हुँदै जयनगर गयौं। जयनगरको रेल्बे चढेर दरभंगा पुर्‍याए। आमाले पहिलेदेखि नै कहीँ कतै पुलिसले सोधपुछ गर्यो भने सियारामलाई बुबा भन्नु भनेर सिकाएकी थिइन्। म इन्कार गरिरहेको थिएँ।

आमाले कर गर्नुभयो। सियारामले पनि मलाई बुबा भन् भन्दै धम्की दिए। त्यसपछि मैले बाध्य भएर बुबा भन्न थालँे। दुई दिनपछि साँझ दिल्ली पर्‍याए। त्यहाँ एउटा कोठा भाडा लिएको थियो। त्यहाँ पुगेपछि मलाई रिंगटा लाग्यो। सियारामले औषधि किनेर ल्याए। एकछिन पछि म औषधि खाएर निको भएँ।

सियाराम र आमाले एउटै कोठामा सुत्न कर गरे। मैले म छुट्टै सुत्छु  भनेँ। सियारामले भने, ‘मसँग धेरै पैसा छैन। एउटै कोठामा सुत्नुपर्छ।’ म रोएँ कराएँ। म एउटै कोठामा सुत्दिनँ भनेर। आमा र सियारामले धम्की दिए। सियारामले कुटपिट समेत गरे।  घाँटी थिचेर ‘मारीदिन्छु, कसैले काम दिँदैन। जे भन्छु त्यो मान, गर भने’।

म निकै डराएँ। त्यसपछि आमा र सियारामले भनेको कुरा मानेँ। एउटै कोठामा र एउटै ओछ्यानमा सुत्नु पर्‍यो। एकछेउमा आमा र अर्को छेउमा म । सुतेपछि सियारामले मुख थिच्दै मेरो कपडा फुकाले, जवरजस्ती गर्न थाल्यो। म रोए कराएँ। तर नत मेरो आमाले सुनिन्, नत सियारामले माने। त्यसपछि दिनरात सियारामले यसरी नै जबरजस्ती बलात्कार गरिरहे। लगातार १५ दिनसम्म मलाई यौन शोषण गरिरहे। मलाई त्याँबाट भाग्न समेत दिएनन्। दुवैजनाको निगरानीमा थिएँ।

पछि घरबाट फोन आएपछि मलाई लिएर फर्के। र बाटोमा धम्की दिँदै फकाउँदै त्यहाँ भएको घटना कसैलाई नभन्नु भने। असार १६ गते साँझ घर आएँ। त्यसपछि बिहानै फेरि आमा र सियाराम भागे।

म बिरामी छु। भाइबहिनीको बिचल्ली भएको छ। हामीलाई न्याय दिलाउन, उपचार गराउन तपाईंहरू सहयोग गरिदिनुस्।