बाजुरा– बाजुराको जगन्नाथ गाउँपालिकामा बढ्दो चिसोसँगै फैलिएको रुघा र ज्वरोका कारण १० जनाको मृत्यु भएको छ। मृत्यु हुनेमा एकै परिवारका तीन जना रहेको जनाइएको छ।
प्रभावित क्षेत्रमा पुगेरर फर्केका जिल्ला स्वास्थ्य कार्यालय बाजुराका महामारी शाखाका संयोजक टेकबहादुर खड्काका अनुसार जगन्नाथ गाउँपालिका वडा नम्बर ४ की ६९ वर्षीया काली कामी, उनका श्रीमान् ७० वर्षीय जाड कामी र उनका भाइ ६० वर्षीय काला कामीको मृत्यु भएको हो। सोही ठाउँकी ६५ वर्षीया रामसरा भण्डारी, ६९ वर्षीय दरवीर बुढाको पनि मृत्यु भएको छ।
वडा नम्बर वडा नम्बर २ हुनीका वडाध्यक्ष कर्णबहादुर विष्टका अनुसार, मृत्यु हुनेमा ६० वर्षीया थुपा नाथ, ५५ वर्षीय कर्ण शाही, ७२ वर्षीय मन विष्ट, ३६ वर्षीया सुपारी विष्ट र ६७ वर्षीया बना विष्ट छन्।
चिसो बढेपछि दुई सातायता घरैपिच्छे रुघाखोकी र ज्वरोका बिरामी देखिएको गाउँपालिकाका निमित्त कार्यकारी प्रमुख रामदत्त न्यौपानेले बताए।
मृत्यु भएकाहरूको भाइरल संक्रमणका कारण मृत्यु भएको अनुमान गरिए पनि कारण यकिन भइनसकेको जिल्ला जनस्वास्थ्यका प्रमुख डा रुपचन्द्र विकले बताए।
‘भाइरल फैलिएको भन्ने अनुमानसम्म भए पनि पुष्टि भएको छैन’, उनले भने, ‘जिल्ला स्वास्थ्य कार्यालयबाट चिकित्सकलाई अनुसन्धानका लागि खटाएका छौं। भाइरल भए–नभएको परीक्षण गर्न १२ जना बिरामीको नमुना राष्ट्रिय जनस्वास्थ्य प्रयोगशाला टेकु पठाएका छौं।’
रोग प्रभावित क्षेत्रमा उपचारका लागि कोल्टी प्राथमिक स्वास्थ्य केन्द्रबाट स्वास्थ्यकर्मीको टोली परिचालन गरिएको जिल्ला स्वास्थ्य कार्यालयले बताएको छ।
जगन्नाथ, स्वामीकार्तिक, गौमुल र छेडेदह लगायतका हिमाली क्षेत्रका गाउँपालिकाका विभिन्न गाउँमा समेत रुघाज्वरो फैलिएको छ। प्रभावित सबै ठाउँमा औषधिसहित स्वास्थ्यकर्मीको टोली परिचालन गरिएको कार्यालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
