काठमाडौं- नेपाली कांग्रेसका युवा नेता गगन थापाले १४औं महाधिवेशन नभए कांग्रेसले ठुलो नोक्सानी व्यहोर्नु चेतावनी दिएका छन्। महाधिवेशनबाट पछि नहट्न पाटी सभापतिको ध्यानाकर्षण गराउँदै उनले सो कुरा बताएका हुन्।
राजधानीमा सोमबार आयोजित जिपी फाउन्डेसनको कार्यक्रममा नेता थापाले विधानमा नभएको कुरा नियमले परिर्वतन गर्न नपाईने भन्दै महाधिवेशनबाट पार्टी नेतृत्व पछि हट्न नमिल्ने तर्क गरे। उनले महाधिवेशन नगरी फेरी पनि भागबण्डा गरेर अन्तरिम संगठन बनाउने काम भए पार्टीले सबैभन्दा ठुलो घाटा व्यहोर्नुपर्ने दाबी उनको थियो।
'विधानमा यो गर्ने भनेर टुंगो लगाएको कुरालाई अहिले नियमले चेन्ज गर्न पाउदैनौं। म सुन्दैछु नियममा चेन्ज गर्ने कुरा हुँदैछ। त्यो चेन्ज गर्ने भनेको अधिवेशन पनि नगर्ने। अन्तरिम संगठन बनाउने तर कसरी बनाउने भने काठमाण्डौमा बसेर छान्ने। भागबण्डा गरेर बनाउने। यो भन्दा घाटा पार्टीको लागि अरु केही पनि हुँदैन। यो पार्टीका निम्ति प्रत्युत्पादक छ। यो गर्न पाईँदैन। यो गर्ने अधिकार पार्टी सभापतिलाई छैन। वरिष्ठ नेतालाई पनि छैन।'
नेता थापाले सम्पुर्ण कार्यकर्ताहरु महाधिवेशनमा जानुपर्नेमा भएपनि नेतृत्व नै महाधिवेशन नगराउने पक्षमा देखिएको दाबी गरे। उनले संघीय संरचना अनुसार पार्टीको तल्लो निकाय अहिलेसम्म गठन हुन नसक्नुले परिर्वतनलाई नेतृत्वले आत्मसाथ गर्न नसकेको स्पष्ट देखिएको टिप्पणी गरे।
उनले सरकारका गलत कार्यविरुद्ध सडकको तागतलाई सदनसंग एकाकार गर्नका लागि वैचारिक दृष्टिले पनि कांग्रेस स्पष्ट हुनु आवश्यक रहेको बताए।
अर्का नेता प्रदीप पौडेलले कमिसनलाई बैधता दिने, वाईडवडी विमान प्रकरण, बालुवाटार जग्गा र टुँडिखेल लगायत विरुद्ध कांग्रेसले सदनमा सशक्त आवाज उठाउन नसकेको टिप्पणी गरे। जनताको प्रत्यक्ष सरोकार राख्ने विषयलाई सदनमा शसक्त ढंगले उठाउन सक्ने हो भने नेपाली जनताले सडकमै उठेर कांग्रेसलाई समर्थन गर्ने दाबी गरे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।