काठमाडौं- १३औं दक्षिण एसियाली खेलकुद (साग) प्रतियोगिता सुरु हुन ५ दिन मात्रै बाँकी छ। साग जति नजिकिँदो छ अभ्यासमा रहेका कराते खेलाडीमा आत्मविश्वास र उर्जा थपिँदो छ।
१३औँ साग यहि मंसिर १५ देखि २४ गतेसम्म काठमाडौं, पोखरा र जनकपुरमा हुँदैछ । सातदोबाटोस्थित कराते हलमा नै सागको कराते प्रतियोगिता हुनेछ। जहाँ अहिले कराते टिमले नियमित अभ्यास गरिरहेको छ।
यो पटक करातेमा १९ स्वर्णका लागि ५ राष्ट्रका खेलाडीले प्रतिस्पर्धा गर्दै छन्। करातेमा भारत र माल्दिभ्सले भने भाग लिएको छैन। यसअघि १६ स्वर्णमात्रै समावेश गरिए पनि १३औँ सागका लागि ३ वटा स्पर्धा थप गरिएको हो। महिलातर्फ ४५ केजी तौल समूह तथा महिला र पुरुषको टिम फाइट विधा थप गरिएको छ।
यसले पनि नेपालले स्वर्ण पदक धेरै विधामा जित्ने विश्वास छ। सागका लागि सुपरिवेक्षण प्रशिक्षक रहेका दीपक श्रेष्ठ भन्छन्, ‘आठौं सागमा पहिलो पटक कराते खेललाई समावेश गर्दा नेपालले १६ स्पर्धामा १४ वटामा स्वर्ण पदक जितेको थियो। दुई वटा मात्रै स्वर्ण पदक अरु देशले जितेको थियो। यो पटक १९ वटा स्वर्ण पदकमा प्रतिस्पर्धा राखिएको छ। त्यसले गर्दा पहिलेको जति नै स्वर्ण पदक जित्छौँ।’
त्यसो त, नेपाली कराते खेलाडीलाई केही दिनअघि मात्रै बंगलादेशमा सम्पन्न पाँचौ साफ कराते च्याम्पियनसिपले पनि केही हौसला दिएको छ। जसमा नेपाली टिमले ८ स्वर्ण जित्दै च्याम्पियन बनेको थियो।
भारतले करातेमा सहभागिता नजनाएकाले अब नेपालको लागि मुख्य चुनौती भनेको श्रीलंका र पाकिस्तान हो। प्रशिक्षक दीपक भन्छन्, ‘दक्षिण एसियामा करातेमा नेपाल भनेपछि अरु देशको मनोबल ५० प्रतिशत घट्छ। भारतले करातेमा भाग नलिएपछि त्यसको फाइदा त हामीलाई नै छ। हाम्रो सबैभन्दा ठूलो प्रतिस्पर्धी पाकिस्तान हो।’
गर्विलो इतिहास
सागको इतिहास हेर्दा करातेलाई ढिलो गरी आठौं सागदेखि मात्रै समावेश गरियो। सन् १९९९ मा नेपालमै आयोजना भएको आठौं सागमा करातेले पहिलो पटक प्रवेश पाएको थियो। जुन सागमा नेपालले करातेमा सर्वाधिक १४ स्वर्ण पदक जितेको इतिहास छ।
त्यसबेला रवि महर्जन, दीपक श्रेष्ठ, धोजमान मोक्तान, सुरेन्द्रलाल श्रेष्ठ, राजेश श्रेष्ठ, कृष्ण गुरुङ, प्रिति डंगोल, निता राई, निमा पाठक, जुनु राई र विनिता चौधरीले स्वर्ण पदक जितेका थिए। त्यस्तै, गंगाराम महर्जनले सिंगल कातामा स्वर्ण पदक जित्दा पुरुष टिम काता र महिला टिम कातामा गरी नेपालले १४ स्वर्ण पदक जितेको थियो।
त्यस्तै, दुर्गाराज निरौलाले रजत पदक पाउँदा मकेन्द्रबहादुर सिंहले कास्य पदक जितेका थिए। आठौं सागमा नेपाल कुनै पनि स्पर्धामा पदकविहीन भने भएको थिएन।
पाकिस्तानमा सन् २००४ मा भएको नवौं सागमा नेपालले सात स्वर्ण पदक जित्दा करातेको नाममा एउटा स्वर्ण पदक रह्यो। नेपालका लागि करातेमा दीपक श्रेष्ठले ६० केजी तौल समूहमा स्वर्ण जितेका थिए। १० स्पर्धामा भएको करातेमा नेपालले कुल ६ वटा पदक जितेको थियो। कुशल श्रेष्ठ र सुरेन्द्र श्रेष्ठले रजत जित्दा गंगाराम महर्जन, राजु अधिकारी र रविन्द्र दाहालले कास्य पदक जिते।
सन् २००६ मा श्रीलंकामा भएको १०औं सागमा भने नेपालले करातेमा १० वटा पदक जित्न सफल भयो। जसमा २ स्वर्ण ३ रजत र ५ कास्य पदक थियो।
सुलोचना सिज्वाखा र कुशल श्रेष्ठले स्वर्ण जित्दा अमृता शाक्य, राम लिम्बु र महिला टिम कातातर्फ सुभद्रा श्रेष्ठ, रोजी नगरकोटी, संगीता डंगोल र रोमिका राईले रजत पदक जितेका थिए।
त्यस्तै, कृष्णा कला केसी, विनोद शाक्य, रविन्द्र दाहाल, राम सरण टवाटी र पुरुष टिम कातातर्फ निरबहादुर मोक्तान, केदारबहादुर सिंखडा, गणेश थिङ र पुर्णबहादुर बलामीले गरी ५ कास्य पदक जितेका थिए।
२०१० बंगलादेशमा सम्पन्न ११औं साग खेलकुदमा करातेमा नेपालले ७ वटा पदक जितेको थियो। सुनिल लामा, विनोद शाक्य र गंगा अधिकारीले स्वर्ण पदक जित्दा अनु अधिकारी र विनोद महर्जनले रजत पदक ल्याएका थिए।
पुरुष टिम कातातर्फ कुशल श्रेष्ठ, पर्शुराम बास्तोला र गणेशबहादुर थिङले कास्य पदक जितेका थिए।
यी हुन् १३औं साग खेल्ने करातेका ३१ खेलाडी
मण्डेकाजी श्रेष्ठ, प्रविन मानन्धर, सोनाम लामा, नविन रसाइली, गंगाराम कुसुवार, दिवस श्रेष्ठ, सुन्नी तामाङ, महसुस मोक्तान, राजकुमार रसाइली, लक्ष्मण तामाङ, अर्जुनकुमार बागचन्द, लेखनाथ मैनाली, मुकुन्द महर्जन, विप्लवलाल श्रेष्ठ, सुशिल पौडेल, विनोद शाक्य, दिगाम्बर पन्त, चञ्चला दनुवार, कोपिला विष्ट, सुरु कार्की, निर्मला तामाङ, एस्टर राई, अनुपमा मगर, संगिता मगर, कुसुम खड्का, अनु अधिकारी, मनिषा चौधरी, रीता कार्की, अनु गुरुङ, सुस्मिता वाइबा र सुनिता महर्जन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788164343.png)
-1786602170.png)
-1786513116.png)
