सर्लाही– प्रदेश–२ मा स्थानीय तहको तेस्रो चरणको चुनावको सरगर्मी बढे पनि राजपाका ४ शीर्ष नेताहरु अझै मधेस झर्न सकेका छैनन्।
टिकट वितरणमा असन्तुष्टि बढेपछि ६ मधेसकेन्द्रित दल मिलेर बनेको राजपाका शीर्ष नेताहरु मधेस झर्न हिचकिचाएका हुन्। राष्ट्रिय जनता पार्टी अध्यक्ष मण्डलका तीन शीर्ष नेता रहेका कारण पनि ‘हेडक्वार्टर’ मानिने सर्लाही जिल्लामै नेताहरु झर्न सकेका छैनन्। अध्यक्ष मण्डलका नेताहरु महन्थ ठाकुर, राजेन्द्र महत्तो र महेन्द्र राय यादव सर्लाहीका हुन्। यादव आइतबारमात्र सर्लाही झरेका छन् भने अन्य २ नेता काठमाडौंमै छन्।
प्रतिकूल अवस्थामा पनि सर्लाही–५ बाट प्रत्यक्ष चुनाव जितेका जंगीलाल राय यादव दलबलसहित बाहिरिएपछि स्थानीय कार्यकर्तामा रहेको असन्तुष्टि झेल्नुपर्ने अवस्था भएकाले शीर्ष नेता आफ्नै गृहजिल्ला झर्न हच्किएका हुन्। राजपा महासचिव समेत रहेका जंगीलाल आफ्ना पक्षका केही कार्यकर्तालाई टिकट दिलाउन नसकेपछि एमालेसँग मोलमोलाई गरी पार्टीबाट बाहिरिएका हुन्। उनी औपचारिक रुपमा एमाले प्रवेश गर्न भने बाँकी नै छ। एमाले सर्लाही जिल्ला अध्यक्ष रेवती पन्का अनुसार एमाले अध्यक्ष केपी शर्मा ओलीलाई नै जिल्ला झिकाएर जंगीलाललाई पार्टी प्रवेश गराउने तयारी भइरहेको छ।
पछिल्लो संविधानसभामा यादवले सर्लाही क्षेत्र–४ बाट चुनाव जितेका थिए भने ठाकुर र महतो क्रमश: क्षेत्र–६ र क्षेत्र–४ बाट पराजित हुन्। ठाकुर तराई मधेस लोकतान्त्रिक पार्टी, महतो सद्भावना र यादव तराई मधेस समाजवादी पार्टीका अध्यक्ष हुन्।
राजपा अध्यक्ष मण्डलका अन्य नेतामा राष्ट्रिय मधेस समाजवादी पार्टीका शरतसिंह भण्डारी (महोत्तरी), मधेसी जनअधिकार फोरम गणतान्त्रिकका राजकिशोर यादव र संघीय सद्भावना पार्टीका अनिल झा छन्।
प्रदेश–२ का ८ वटै जिल्लामा टिकट वितरणमा विवाद भएका कारण यादव र झा मधेस झरेका छैनन्। भण्डारी भने आइतबार बेलुकी महोत्तरी पुगेका छन्।
राजपा महासचिव तथा वीरगन्ज महानगरपालिकाका मेयर पदका उम्मेदवार राजेशमान सिंह उम्मेदवारहरु आफै सक्षम रहेकाले नेताहरु मधेस नझरेको दाबी गर्छन्। ‘उहाँहरुलाई आफ्नो पार्टीका इमानदार सिपाहीप्रति विश्वास छ, त्यसैले नआउनुभएको हो,’ उनले भने, ‘तर एकपटक आइदिए हुन्थ्यो भन्ने हाम्रो चाहना छ। वीरगन्जमा एक दिन नभए पनि आधा दिनमात्रै आइदिनुस् भनेर मैले नेताहरु समक्ष कुरा पुर्याजएको छु। आशा छ चुनावअघि एकपटक आउनुहुनेछ।’
एकै हातका ५ औंला त समान नभएको अवस्थामा ६ पार्टी मिलेर बनेको राजपामा पनि केही असन्तुष्टि देखिनु स्वभाविक भएको सिंहले बताए। तर त्यसले खासै असर नपार्ने उनको दाबी छ। राजपाबाट मेयर पदका आकांक्षी पुराना नेता विमल श्रीवास्तव टिकट नपाएपछि रातारात पार्टी परिवर्तन गरी मधेसी जनअधिकार फोरम लोकतान्त्रिक प्रवेश गरेका छन्।
राजपाका सर्लाही अध्यक्ष दिनेश राय बाँकी शीर्ष नेताहरु पनि चाँडै मधेस झरेर चुनाव प्रचारमा होमिने बताउँछन्। ‘निर्वाचन आयोगसँग सम्बन्धित केही कामहरु बाँकी रहेकाले काठमाडौं बस्नुभएको हो, अब चाँडै झर्नुहुन्छ,’ उनले भने।
प्रधानमन्त्रीसमेत रहेका कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल, एमालेका दोस्रो तहका नेताहरु मधेस झरेर आफ्ना उम्मेदवारका प्रचारमा जुटिरहेका छन्। उपप्रधानमन्त्री तथा फोरम लोकतान्त्रिकका अध्यक्ष विजयकुमार गच्छदार शनिबार र आइतबार वीरगन्जमै रहेर श्रीवास्तवको प्रचारमा जुटे। यस्तोमा दुई चरणको स्थानीय तहको चुनावमा सहभागी नभएको र तेस्रो चरणको चुनावलाई प्रतिष्ठाको विषय बनाएको राजपाका शीर्ष नेताहरु भने खासै सक्रिय देखिएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
