काठमाडौं- जनता बैंकका प्रमुख कार्यकारी अधिकृत (सिइओ) पर्शुराम कुँवर (क्षेत्री) ले बैंकिङ क्षेत्रमा ठूलो पुँजी भएको अर्थपूर्ण मर्जर आवश्यक रहेको बताएका छन्। नेपालको जनसंख्याको आधारमा पनि नेपालमा बैंकहरुको संख्या बढी भएकाले अर्थपूर्ण मर्जर आवश्यक रहेको उनको तर्क छ।
'नेपालभन्दा शतप्रतिशत जlडिपी बढी भएको भारतमा एउटा बैंकको भागमा एक करोड ५० लाख जनसंख्या पर्छछ, त्यस्तै बंगलादेशको कुरा गर्ने हो भने एउटा बैंकको भागमा ३० लाख जनसंख्या पर्छ,' नेपाल लाइभको कार्यक्रम समय संवादसँग कुराकानी गर्दै उनले भने, 'अहिले नेपालमा भने एउटा बैंकको भागमा मात्र १० लाख जनसंख्या पर्छ। यो आधारले पनि अहिले मुलुकमा रहेको २८ वटा वाणिज्य बैंकहरुको संख्या निकै धेरै हो।'
अहिलेको अवस्थामा देशमा करिब १५ देखि १६ वटा वाणिज्य बैंक मात्र आवश्यक रहेको उनले बताए।
पछिल्लो समय देशका विभिन्न क्षेत्रमा जनता बैंकको शाखा विस्तार गर्ने दौडमा रहेका कुँवर भन्छन्, 'अधिकांश बैंकहरु सहरमुखी भए। ग्रामीण क्षेत्रमा खासै बैंक जान सकेको छैन। तसर्थ बिग मर्जमार्फत बैंकको संख्या घटाउँदै देशका कुनाकुनामा बैंक शाखा विस्तारका जोड दिनुपर्छ।'
नियामक निकाय नेपाल राष्ट्र बैंकले नेपाली बैंकिङ क्षेत्रको विकासका लागि धेरै नै मेहनत गरेको कुँवरको बुझाइ छ। 'राष्ट्र बैंकले एउटा जबर्जस्त मेसेज के पठाएको छ भने, गडबड गर्यौं भने हामी बाँकी राख्दैनौं। तिमीलाई जेल जानुपर्ने पनि हुन सक्छ,' उनले भने, 'यसरी नियामक निकायले गरेको कडाइले नेपाली बैंकिङ क्षेत्र विकासको बाटोमा लम्किन सम्भव देखिन्छ।'
दुई दशकअघिको समयलाई सम्झिँदै उनले थपे, 'बैंकले कुनै धितो लिलाम गर्दा ऋणीले अदालतबाट स्टे अर्डर लिएर आउने गर्थे, जसले धितो लिलामीमा निकै नै कठिनाइ हुन्थ्यो। तर अहिलेको अवस्था त्यस्तो छैन, अदालतले बैंकहरुलाई राम्रोसँग बुझिसकेको छ।'
सन् १९८६ बाट आफ्नो बैंकिङ करिअर सुरु गरेका कुँवर ग्रान्ड बैंक, तत्कालीन बैंक अफ एसिया, नेपाल बैंक तथा सिटिजन्स बैंकको अनुभव बटुल्दै अहिले जनता बैंकका प्रमुख कार्यकारी अधिकृतको रुपमा कार्यरत छन्। नेपाली वित्तीय क्षेत्रको अवस्था र वाणिज्य बैंकहरुको बिग मर्जरलगायतका विषयमा नेपाल लाइभका सुमन शर्माले पर्शुराम कुँवरसँग गरेको भिडियो वार्ता:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
