काठमाडौं– गत साता एट्ल्यान्टिक महासागरबाट सुरु भएको खतरनाक सामुद्रिक आँधी नेपाली समयअनुसार आइतबार साँझ ७ बजे अमेरिकाको फ्लोरिडा राज्यमा प्रवेश गरेको छ। कैयौं क्यारेवियाली टापूमा विनास निम्त्याइसकेको आँधी फ्लोरिडामा प्रवेश गरेपछि त्यहाँको स्थिति भयावह बन्न पुगेको छ।
फ्लोरिडामा मात्र करिब एक हजार नेपाली बसोबास गर्छन्। आँधीका कारण सबै नेपाली प्रभावित बनेको ‘नेप्लिज एसोसिएसन अफ फ्लोरिडा’ का अध्यक्ष राम थापाले नेपाल लाइभलाई जानकारी दिए।
‘आँधीका कारण म अहिलेसम्म घरबाट बाहिर निस्किन सकेको छुइनँ,’ अध्यक्ष थापाले टेलिफोनमा भने।
फ्लोरिडाको ट्याम्पा सहरमा रहेका नेपाली अहिले ज्यान बचाउन विभिन्न सेल्टरमा पुगेका छन्। राज्य सरकारले आँधीबाट स्थानीयलाई बचाउन तटीय क्षेत्रभन्दा भित्र विभिन्न ठाउँमा अस्थायी सेल्टर स्थापना गरेको छ। फ्लोरिडाको विभिन्न सहरमध्ये पूर्वी तटीय क्षेत्रमा मात्र करिब ५ सय र पश्चिमी तटीय क्षेत्रमा करिब ३ सय नेपाली बसोबास गर्छन्।
‘केही नेपाली ज्यान बचाउन फ्लोरिडाबाट भागेर अन्यत्र गएका छन्। करिब ५० जनाजति जोखिम मोलेर ट्याम्पा सहरमा रहेका सेल्टरमा शरण लिएर बसेका छन्। धेरै जसो घरबाट निस्किन सकेका छैनन्। सरकारले घरबाट बाहिर ननिस्कन सूचना जारी गरेको छ,’ थापाले भने।
‘नेप्लिज एसोसिएसन अफ फ्लोरिडा’का अध्यक्ष राम थापाले उपलब्ध गराएको फ्लोरिडामा इर्मा आँधी आउन सुरु गर्दाको भिडियो
आँधी बढेपछि नेपालीहरु बसेको सेल्टर पनि उच्च जोखिममा परेको छ। ‘उच्च जोखिम मानिएको ट्याम्पा सहरमा मात्र करिब एक सय नेपाली बसोबास गर्छन्। ५० देखि ७० जना जति ‘सेल्टर’ मा बसेका छन्।बाँकी नेपालीहरु फ्लोरिडाबाट बाहिर गएका छन्,’ उनले भने।
आँधीका कारण फ्लोरिडामा सवारी साधन ठप्प छ। फ्लोरिडामा छिरेको आँधी २ सय ८ किलोमिटर प्रतिघण्टाका दरले उत्तरको जर्जिया राज्यतर्फ लागेको छ। अमेरिकी राष्ट्रिय ‘हरिकेन सेन्टर’ ले यो आँधीलाई चौथो श्रेणीमा राखेको छ।
यसलाई जोखिमयुक्त मानिन्छ। सेन्टरका अनुसार आँधीको श्रेणी अधिकतम पाँचसम्म हुन्छ, जुन सबैभन्दा खतरनाक हो। अहिलेको आँधीले पक्की भवनका छाना र पर्खाल मात्र होइन, अधिकांश रुख र बिजुलीका पोल ढालेको छ। जनजीवन सामान्य बन्न करिब एक महिना लाग्ने हरिकन सेन्टरले बताएको छ।
फ्लोरिडामा नेपालीहरुको अवस्था भयावह भए पनि अमेरिकास्थित नेपाली दूतावासले कुनै चासो नराखेको अध्यक्ष थापा बताउँछन्। ‘हामीले दूतावासमा लगातार फोन गर्यौं। तर, फोन उठाएनन्,’ उनले दुःखेसो गरे, ‘फ्लोरिडाको नम्बर दूतावासमा गएपछि कम्तिमा उनीहरुले सम्पर्क गर्नुपर्ने हो नि।’
फ्लोरिडाको पूर्वी तटीय क्षेत्रमा बसोबास गर्दै आएका चिकित्सक शारदाराम भण्डारीले आँधीले सबैतिर प्रभावित पारेको जानकारी दिए। ‘बाहिर निस्कने अवस्था छैन,’ उनले भने, ‘हामी त सुरक्षित छौं तर आँधी पश्चिमतिर लागेकाले उता ठूलै क्षति हुने खतरा छ।’ उनले पश्चिम तटीय क्षेत्रमा रहेका नेपालीसँग सम्पर्क गर्ने प्रयास गरिरहेको जानकारी दिए। इर्मा आँधीका कारण हालसम्म २५ जनाको मृत्यु भइसकेको छ। सम्भावित खतरालाई दृष्टिगत गर्दै अमेरिकी राष्ट्रपति डोनाल्ड ट्रम्पले नागरिकहरुलाई तटीय क्षेत्रबाट सुरक्षितस्थलतर्फ लैजान आदेश दिइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
