काठमाडौं– नेपाल कम्युनिष्ट पार्टी (नेकपा) का सांसद महेश बस्नेतले आफूले विद्युत प्राधिकरणका कार्यकारी प्रमुख कुलमान घिसिङको विरोध गरेको नभई उनलाई शुद्ध गरिदिन खोजेको बताएका छन्।
प्रतिनिधिसभाको मंगलबारको बैठक 'अख्तियार दुरुपयोग अनुसन्धान आयोग र सार्वजनिक लेखा समितिले उचित छानबिन गरोस्' भन्ने धारणा राखेपछि यस विषयमा व्यापक चर्चा हुँदै आएको छ।
नेपाल लाइभसँगको कुराकानीमा बस्नेतले प्राधिकरणको बक्यौता नउठेको सन्दर्भ र यससँग सम्बन्धित अन्य विषयमा ती निकायले छानबिन गरे कुलमान नै शुद्ध हुने बताए।
‘कुलमानजीले लोडसेडिङ अन्त्य गर्ने सन्दर्भमा विदेशबाट विद्युत खरिद गरेर भए पनि लोडसेडिङ अन्त्य गर्नुभयो। उहाँलाई साथ, सहयोग र समर्थन हाम्रो छ', सांसद बस्नेतले भने, ‘तर, बक्यौता नउठेको सन्दर्भ र यससँग सम्बन्धित अन्य विषयमा सार्वजनिक लेखा समिति र अख्तियारले छानबिन गर्नुपर्छ भनेर कुलमानजीको विरोध गर्न खोजेको होइन, उहाँलाई शुद्ध गरिदिन खोजेको हो, मैले।’
संसदमा आफूले कुलमानमाथि छानबिनको माग नगरेको उनको भनाइ छ। विद्युत प्राधिकरणको ट्रंक लाइनदेखि लिएर उद्यमीले नतिरेको ९ अर्ब बेरुजुबारे प्रश्न उठेपछि सार्वजनिक लेखा समितिमा बहस हुनु समितिको पहिलो दायित्व भएको सांसद बस्नेतको तर्क छ।
उनले भने, ‘महालेखा परीक्षक कार्यालयले जुन बेरुजुको सूची निकाल्छ, त्यसबारे बहस गर्ने पहिलो सार्वजनिक लेखा समितिको दायित्व हो।’
लेखा समितिमा त्यसबारे बहस भएको र सांसद अमनलाल मोदीले पनि त्यसबारे प्रश्न उठाउँदा कतिपय मिडिया र सामाजिक सञ्जाल प्रयोगकर्ताले मोदीको खोइरो खनेकोप्रति बस्नेतले आपत्ति जनाए।
'कुलमानजीले मैले यति राम्रो काम गरेको छु। ममाथि यस्तो आरोप लाग्यो। मलाई अन्याय भयो भनेपछि सम्बन्धित निकायले छानबिन गर्यो भने उहाँ अझ शुद्ध हुने अवसर प्राप्त हुने भन्ने कोणबाट संसदमा आवाज उठाएको हुँ,' सांसद बस्नेतले भने।
‘कुलमानजीले जति राम्रा काम गर्नुभएको छ। राम्रो हुनुहुन्छ भनेर विद्युत प्राधिकरणभित्र रहेका फोहोरमैला कुलमानजीको पर्दाभित्र सबै कुरा क्षम्य त हुँदैन् होला नि', उनले भने, ‘मैले उठाएको प्रश्न कुलमान विरुद्ध भनेर बुझ्नु भएन। त्यो उर्जामन्त्री, उर्जासचिव यससँग सम्बन्धित सबैका विरुद्ध हो।’
भिडियो:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
