काठमाडौं– लोकसेवा आयोगलाई कर्मचारी भर्नाका लागि विज्ञापन गर्ने बाटो खुला भएको छ।
संसदको राज्य व्यवस्था समितिले विज्ञापन नखोल्दा प्रतिस्पर्धाका लागि योग्य व्यक्तिहरुलाई असर पर्ने भन्दै भर्ना खुला गर्न शुक्रबार निर्देशन दिएको हो।
यसअघि कर्मचारी समायोजन विधेयक सरकारले ल्याएकाले नयाँ कर्मचारी भर्ना नगर्न समितिले नै लोकसेवा आयोगलाई निर्देशन दिएको थियो । राज्य व्यवस्था समितिले विगतको आफ्नै निर्देशन शुक्रबार सच्चाएको हो।
‘कर्मचारी भर्ना रोक्दा योग्यता पुगेकाहरु प्रतिस्पर्धामा आउन नसक्ने र जनशक्ति व्यवस्थापनमा समेत केही समस्या पर्ने भएकाले समितिले भर्ना विज्ञापन नरोक्न लोकसेवालाई निर्देशन दिएको छ,’ समिति सभापति दिलबहादुर घर्तीले नेपाल लाइभसँग भने।
सरकारले कर्मचारी समायोजन विधेयकमा एक वर्षसम्म नयाँ कर्मचारी भर्ना नगर्ने प्रस्ताव ल्याएको छ । यसअघि दुई वर्षसम्म रहेको प्रावधानलाई लोकसेवा आयोगको व्यापक विरोधपछि सरकारले एक वर्षमा झारेको हो।
कर्मचारी भर्ना नरोक्न संसदीय समितिले दिएको निर्देशनलाई लोकसेवा आयोगले स्वागत गरेको छ।
‘१० लाख युवा लोकसेवाको तयारी गरेर बसिरहेको अवस्थामा भर्ना रोक्दा उनीहरुको मनोविज्ञान के हुन्छ ? विदेश पलायनको अवस्था आउँदैन ? संसदीय समितिले दिएको निर्देशन स्वागत योग्य छ,’ आयोगका अध्यक्ष उमेश मैनालीले भने। सरकारले कर्मचारी समायोजन विधेयकलाई छिटै पारित गर्नुपर्ने उनले बताए।
सम्बन्धित समाचार:
कहिले खुल्छ लोकसेवा परीक्षा?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
