वासिङ्टन- अमेरिकाका करिब ७० प्रतिशत युवाले हाल संयुक्त राज्य अमेरिकामा रहेका दुई राजनीतिक दललाई मन नपराएको र अर्को वैकल्पिक चाहेको सर्वेक्षणले देखाएको छ।
सर्वेक्षण अनुसार अमेरिकामा हाल रहेका डेमोक्र्याट र रिपब्लिकनभन्दा अर्कै दल चाहेको उनीहरुले बताएका थिए।
ती दुई राजनीतिक दलले अमेरिकामा राम्रो काम गर्न नसकेको गुनासो उनीहरुको छ।
उक्त सर्वेक्षणमा सहभागीमध्ये ६० प्रतिशत युवाले अमेरिकी राष्ट्रपति डोनाल्ड ट्रम्पले गरिरहेको कार्यसम्पादनको विरोध गरेका छन्। ट्रम्पको कार्यशैली नरुचाएको र उनले जारी राखेका कामहरु जनताले मन पराउने खालका नरहेको उनीहरुको भनाइ छ।
एनबिसी न्युजले गरेको सो सर्वेक्षणमा सहभागी करिब ६५ प्रतिशत युवाहरुले अमेरिका हाल सबै राजनीतिक विषयहरुमा गलत दिशातर्फ उन्मुख भइरहेको जनाएका छन्।
राष्ट्रिय रुपमा नै प्रतिनिधित्व हुनेगरी उक्त सर्वेक्षणमा विभिन्न जात जाति, वर्ग र क्षेत्रका आधारमा नागरिकलाई संलग्न गराइएको थियो।
गत अक्टोबर २६ देखि नोभेम्बर १० सम्म सो सर्वेक्षण गरिएको थियो। विभिन्न क्षेत्र, वर्ग र समुदायका गरी १ हजार ८७६ जना १८ वर्षदेखि ३४ वर्ष उमेर समूहका युवाहरु सर्वेक्षणमा सहभागी थिए।रासस/सिन्ह्वा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
