प्रदेश र प्रतिनिधिसभाको निर्वाचन नजिकिँदै गर्दा चुनावविरोधी गतिविधि बढ्दै गएका छन्। विभिन्न जिल्लामा बम विस्फोटका घटना वृद्धि हुँदा चुनावी सुरक्षालाई लिएर प्रश्नचिह्न खडा भएको छ। रोल्पा, म्याग्दी, भोजपुर, गोरखा, बाग्लुङ, नुवाकोट लगायतका जिल्लामा उम्मेदवारलक्षित बम विस्फोट गराइएको छ। यसबाट आम नागरिकसमेत त्रसित बनेका छन्।
चुनावको सुरक्षा व्यवस्था लगायतका विषयमा निर्वाचन आयोगका आयुक्त सुधीरकुमार साहसँग नेपाल लाइभका हिमविक्रम केसीले गरेको कुराकानी:
शृंखलाबद्ध बम विस्फोट लगायत निर्वाचनविरोधी गतिविधि बढेका छन्। निर्वाचन आयोगले यसखाले घटनालाई कसरी लिएको छ?
निर्वाचनविरोधी तत्वहरु पछिल्लो समय विस्फोटन लगायतका गतिविधिमा संलग्न भइरहेका छन्। देशका २/४ जिल्लाका यस प्रकारका घटना दोहरिएका समेत छन्। यसले समग्र सुरक्षा व्यवस्थापनलाई असर गर्छ भनेर मूल्यांकन गर्न मिल्दैन। तर तोकिएको समयमा शान्तिपूर्ण रुपमा निर्वाचन सम्पन्न गराउन निर्वाचन आयोग दृढ छ।
अहिलेबाटै उम्मेदवारलाई लक्षित गरी आक्रमण हुन थालेका छन्। चुनावी सुरक्षालाई लिएर आम मतदाताले शंका गर्ने अवस्था रह्यो नि...
म एउटा उदाहरण दिन्छु। २०५६ सालको संसदीय निर्वाचनमा तत्कालीन विद्रोही समूहको प्रभाव देशका ७५ जिल्लामै थियो। त्यस अवस्थामा समेत देशभर एकै दिन एकै चरणमा निर्वाचन सफलतापूर्वक सम्पन्न भएको थियो। अहिले ४ जिल्लामा भएको विस्फोटनका घटनाले समग्र शान्ति सुरक्षामाथि प्रश्न गर्न मिल्दैन। चुनाव हुन्छ हुँदैन भनेर शंका नगरे हुन्छ।
चुनावविरोधी गतिविधिमा कुन समूह या व्यक्तिहरुको संलग्नता छ? आयोगलाई कस्ता सूचना प्राप्त भइरहेका छन्?
पहाडी जिल्लाहरुमा जुन प्रवृत्तिबाट घटनाहरु गराइएको छ, यसमा मुख्य दुई वटा कारण देखिन्छ। पहिलो, निर्वाचनमा सहभागी दल तथा उम्मेदवारलाई तर्साउने लक्ष्यका साथ विस्फोटन गराइएको छ। दोस्रो, देशमा निर्वाचन नहोस् भन्ने शक्तिले यस किसिमको निर्वाचनविरोधी गतिविधि गरिरहेका छन्। प्राप्त सूचना हेर्दा नेत्रविक्रम चन्द नेतृत्वको नेपाल कम्युनिस्ट पार्टीको संलग्नता यी घटनामा देखिएको छ।
घटनाका दोषीलाई पक्राउ गरेर कारबाही गर्न सरकारले तदारुकता देखाएन भन्ने आरोप छ। शान्ति सुव्यवस्था कायम गर्न आयोगले कसरी ध्यानाकर्षण गराइरहेको छ?
सरकारले सुरक्षा व्यवस्था प्रभावकारी बनाउन सकेन भन्ने तर्कसँग मेरो असहमति छ। सरकार र निर्वाचन आयोगले सम्पूर्ण प्रयास यसैमा केन्द्रित गरेको छ। यसबीच घटनामा संलग्न केही व्यक्ति पक्राउ परेका छन्। रुकुममा १३, कैलालीमा ४ लगायत देशका विभिन्न स्थानबाट उनीहरु समातिएका छन्। हामीले निर्वाचनविरोधी गतिविधिमा संलग्न जोसुकैलाई नियन्त्रणमा लिएर कारबाही गर्न निर्देशन जारी गरेका छौं। भर्खरै ४ वटा प्रदेशका सुरक्षा गोष्ठी सम्पन्न भएका छन्। सोही अनुसारको कामकारबाही अघि बढेको छ।
वाम गठबन्धनमा आबद्ध दलले विस्फोटका घटनामा सरकारको संलग्नता रहेको आरोप लगाइरहेको छ। यस प्रकारको अभिव्यक्तिप्रति आयोगको दृष्टिकोण के हो?
जसरी निर्वाचनको प्रक्रिया सुरु भएसँगै ठूला दलबीचको राजनीतिक धुव्रीकरण बढिरहेको छ। त्यसले एक प्रकारको दुरी बढाएको छ। तिक्तता ल्याएको छ। तर त्यस्ता विस्फोटका घटना सरकारबाट प्रायोजित छन् भनेर हामी विश्वास गर्दैनौं।
शान्तिपूर्ण निर्वाचन सम्पन्न हुने आधार केके छन्?
निर्वाचन आयोग सबै सरोकारवाला निकायसँग विनम्र आग्रह गर्न चाहन्छ। मंसिर १० र २१ गतेका लागि तय प्रदेश र प्रतिनिधिसभा निर्वाचन तोकिएको मितिमै सम्पन्न हुनेछ। आयोग दाबीका साथ भन्न चाहन्छ, निर्वाचन शान्तिपूर्ण रुपमा, भयरहित तरिकाले सम्पन्न हुनेछ। निर्भीकतापूर्वक मतदान प्रक्रियामा सहभागी भएर चुनावी प्रक्रियालाई सफल बनाउन आम मतदातालाई म आग्रह गर्छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
