मंसिर २१ गते हुने प्रतिनिधिसभा निर्वाचनमा धनकुटाबाट राप्रपा प्रजातान्त्रिकका महामन्त्री एवम उद्योगमन्त्री सुनिलबहादुर थापा उठेका छन्। लोकतान्त्रिक गठबन्धनबाट मैदानमा उत्रेका सुनिललाई कडा टक्कर दिन वाम–गठबन्धनका तर्फबाट नेकपा एमाले धनकुटा अध्यक्षका राजेन्द्र राईको उम्मेदवारी परेको छ।
दोस्रो संविधानसभा निर्वाचनमा थापासँगै धनकुटा क्षेत्र नम्बर २ बाट ४ सय ५४ मतले मात्र पराजित भएका थिए। त्यसैले यसपालिको निर्वाचनमा यी दुई बीच फेरि कडा टक्कर पर्ने अनुमान गरिएको छ। पहिले २ वटा क्षेत्र रहेको धनकुटालाई अहिले एकै ठाउँमा गाभिएको छ।
धनकुटामा पूर्वप्रधानमन्त्री सूर्यबहादुर थापाको ‘लिगेसी’ जोगाउन एक पटक फेरि चुनावी मैदानमा होमिएका सुनिलसँग नेपाल लाइभका लागि एलबी कटवालले गरेको कुराकानीः
लोकतान्त्रिक गठबन्धनबाट चुनाव लड्दै हुनुहुन्छ, जित्ने आधार कस्तो देख्नुहुन्छ?
धनकुटामा लोकतान्त्रिक गठबन्धनको व्यापक लहर चलेको छ। नेकपा एमालेका प्रभावशाली कार्यकर्ताको ठूलो पंक्ति पार्टी परित्याग गरी हामीसँग आउनुभएको छ। उहाँहरु पनि हाम्रो चुनावी अभियानमा लागिरहनुभएको छ। यसले माहौल हाम्रो पक्षमा तात्तिएको छ। फेरि, संविधानसभा चुनावमा जितेर गएपछि मैले मन्त्री हुँदा भूकम्प, नाकाबन्दी जस्ता अप्ठेरोमा राष्ट्र र जनताको हितमा काम गरेको छु। जनताले मलाई राम्रोसँग बुझेका छन्। चुनावमा वाम गठबन्धनका राजेन्द्र राईलाई मज्जाले जित्छु, यसमा ढुक्क छु।
चुनावी अभियान कस्तो हुँदै छ?
धनकुटा अहिले एउटा मात्र क्षेत्र बनेको छ। जिल्लाका अधिकांश ठाउँमा जनताको घरदैलोमा पुग्ने प्रयास गरिरहेको छु। विशेषगरी साविकको क्षेत्र नम्बर १ को भ्रमणपछि मैले के पाएँ भने, विगत २८ वर्षदेखि यहाँ विकास भएको छैन। मेरो बुवा सूर्यबहादुर थापाको पालामा बनेको बाटोघाटो, स्कुल जे थियो, त्योभन्दा थप विकास केही भएको देखिनँ। बुवाले शिलान्यास गरेर निर्माण भएको राजारानी–भेडेटार सडकखण्डमा अहिलेसम्म मर्मत–सम्भार भएको छैन। त्यसैले म बुवाको धनकुटाको विकास अभियानलाई पछ्याउन यो क्षेत्रबाट फेरि उठेको छु। बुवाका विकासको अधुरा कामलाई अब मैले हेर्नुपर्छ। मेरो चुनावी अभियानमा जनताको उल्लेखनीय सहभागिता छ। मलाई गोलाकारभित्रको हलोमा भोट हाल्न जनता तयार भएर बसेका छन्।
वाम गठबन्धनका उम्मेदवारले तपाईंलाई 'टुरिस्ट उम्मेदवार'को संज्ञा दिएका छन् नि!
मेरो राजनीतिक जीवनमा कुनै दाग लगाउने ठाउँ नपाएपछि यो आरोप लगाइएको हो। म जनतालाई झुक्याएर भोट माग्दिनँ। जनतालाई जे भनेको छु, त्यो पूरा गरेरै छाड्छु। यसमा शंका नगरे हुन्छ। वाम गठबन्धनबाट एमालेका उम्मेदवार राजेन्द्र राई पनि चुनाव सकिएपछि काठमाडौं नै पुग्छन्, टुरिस्ट बनेर। अहिले म भन्दा टुरिस्ट बनेर उनी हिँडिरहेका छन्। सस्तो गफ र ‘प्रोपोगन्डा’ गरेर हिँड्न उनलाई सुहाउँदैन। राईले एमालेबाट केन्द्रमा नेतृत्व गरे, तर उनले धनकुटामा माखो मारेका छैनन्। मलाई टुरिस्ट भन्ने हो भने केपी ओली, झलनाथ खनाल र प्रचण्ड पनि त टुरिस्ट नै भए नि!
जनतामाझ तपाईंका चुनावी एजेन्डा कस्ता छन्?
मेरा एजेन्डा स्पस्ट छन्। यो क्षेत्रमा मुख्य ६ वटा काम गर्न मैले उम्मेदवारी दिएको हुँ। जनताले पनि मेरा विकास योजनालाई राम्ररी बुझिसकेका छन्। लोकतान्त्रिक गठबन्धनको पहलमा धनकुटा अस्थायी राजधानी भइसकेको छ। अहिले अस्थायी हुनु भनेको भोलि स्थायी हुनु हो। धनकुटालाई नै राजधानी बनाउने हामीसँग प्रशस्त पूर्वधार छन्। लोकतान्त्रिक गठबन्धनको प्रमुख एजेन्डा धनकुटालाई प्रदेश १ को राजधानी बनाउने हो।
इतिहास पल्टाएर हेर्ने हो भने मेरै बुवाका पालामा धनकुटालाई पूर्वाञ्चलको सदरमुकाम बनाउनुभएको हो। धनकुटालाई प्रदेशको राजधानी बनाउने विषयमा प्राध्यापक हर्क गुरुङको अध्ययन टोलीको निष्कर्ष पनि आएको थियो। भौगोलिक हिसाबले पनि धनकुटा पूर्वका जिल्लाहरुको बीच भागमा भएकाले आवतजावतमा सबैलाई सहजता छ। मेरो सोच धनकुटालाई पर्यटकीय क्षेत्रमा विकास गर्ने पनि छ। धनकुटा यस्तो ठाउँ हो, जहाँबाट हिमालदेखि तलको समथर भूभाग राम्रोसँग अवलोकन गर्न सकिन्छ। तराईमा गर्मी बढे शीतल दिने नजिकको ठाउँ पनि धनकुटा नै हो।
६ सय ५० मेगावाटको अरुण जलविद्युत् आयोजना बनेपछि यहाँका सडक र अन्य भौतिक पूर्वाधारको विकास हुनेमा शंका छैन। मेरो बुवाले पाख्रिबासमा कृषि केन्द्र स्थापना गर्नुभयो। अब पहाडी भेगको नेतृत्व गर्ने किसिमको नमुना कृषि विश्व विद्यालय बनाउने मेरो योजना छ।
यस्तै, खाल्सा छिन्ताङ क्षेत्रमा एमालेले मेरो बुवाको विरुद्धमा चुनावी मुद्दा बनाएर जित्दै आएको थियो। तर, एमालेको सरकार पटकपटक बन्दा पनि त्यहाँका सहिद परिवारका लागि एमालेले केही गरेन। म व्यक्तिगत प्रतिबद्धता जनाउन चाहान्छु, छिन्ताङका सहिदहरुलाई राष्ट्रिय सहिद घोषणा गर्ने र परिवारलाई उचित क्षतिपूर्ति दिलाउने काममा पहल गर्नेछु। म तत्काल अर्को घोषणा पनि गर्न चाहन्छु, छिन्ताङ घटनाका सहिद परिवारलाई मेरो बुवाको नाममा खुलेको सूर्यबहादुर थापा प्रतिस्ठानबाट परिवारका एक सदस्यलाई रोजगारी र एक जनालाई निःशुल्क अध्ययनको व्यवस्था गरेको छु।
मेरो बुवा छिन्ताङ हत्याकाण्डको योजनाकार पनि होइन। त्यो बेला शान्ति सुरक्षाको जिम्मेवारी अञ्चलाधीश, क्षेत्रीय प्रशासक र त्यहाँको सिडियोको हातमा हुन्थ्यो। तर, आजसम्म कम्युनिस्टहरुले त्यो घटनालाई भजाएर खाइरहेका छन्।
खोकु छिन्ताङमा चुनावी प्रचारमा जान तपाईलाई रोक लगाइएको हो?
वाम गठबन्धनका साथीहरुले हार्ने बुझिसकेपछि हरेक बहाना खोजिरहेका छन्। आफू हार्ने डरले खुट्टा कमाउँदै हिँडेका छन्। यसबाट के बुझिन्छ भने राजेन्द्र राईको अतिवादी चरित्र र प्रजातन्त्रमा जनताको अगाडि उभिन नसक्ने डरले यस्तो आरोप लगाइएको हो। प्रजातन्त्रमा निषेध भन्ने कुरा हुँदैन। निषेधको राजनीति गर्नेलाई यसपालि जनताले नराम्रो जवाफ दिनेछन्।
भोट माग्न जाँदा जनताका अपेक्षाहरु कस्ता छन्?
धनकुटामा विमानस्थल बनाउन मैले पहल सुरु गरिसकेको छु। उहाँहरुको चासो पनि यही हो। यसमा मलाई माओवादीका हेमराज भण्डारीले साथ दिएका छन्। यहाँका जनताले मलाई अभिभावकको रुपमा लिइसकेका छन्। मेरा बुवाले राजनीतिमा हारे पनि धनकुटा र यहाँको विकासमा लागिरहनुभयो। मेरो सफलता धनकुटासँग जोडिएको छ र त्यसैले धनकुटाका जनतासँग मेरो नङ र मासुको सम्बन्ध छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
