काठमाडौं– संविधानसभाको अघिल्लो दुईवटा निर्वाचन काठमाडौंबाट लडेका नेकपा एमालेका सचिव योगेश भट्टराई यस पालि आफ्नो जन्मथलो ताप्लेजुङबाट प्रतिनिधिसभाको निर्वाचनमा होमिएका छन्। उनको प्रमुख प्रतिस्पर्धामा नेपाली कांग्रेसका केशव दाहाल उठेका छन्। दाहाल तिनै उम्मेदवार हुन्, जो केही महिनाअघि ताप्लेजुङमा भएको स्थानीय निर्वाचनमा फुङलिङ नगरपालिकाको मेयर पदमा नेकपा एमालेका छत्रपति प्याकुरेलबाट २ सय ८९ मतले पराजित भएका थिए।
विद्यार्थी राजनीतिबाट २०६४ सालमा राष्ट्रिय राजनीतिमा उत्रिएका योगेश पहिलो संविधानसभाको निर्वाचनमा नेकपा माओवादी केन्द्रका हितमान शाक्यसँग पराजित भए। २०७० सालमा भएको दोस्रो संविधानसभाको निर्वाचनमा उनलाई नेपाली कांग्रेसका भीमसेनदास प्रधानले पराजित गरे।
काठमाडौंमा दुईवटा निर्वाचनमा पराजय भोगेपछि योगेश आफ्नो जन्मस्थान ताप्लेजुङ फर्किएका हुन्। ‘वाम गठबन्धन’ का तर्फबाट ताप्लेजुङको एक मात्र संसदीय सिटमा उनको नाम प्रस्ताव भएपछि त्यहाँको माहोल तातिएको छ।
विपक्षीले उनलाई बाहिरबाट निर्वाचन लड्न आएको भन्दै चुनावी अभियानमा घेर्ने गरेका छन्। तर, पार्टीमा उनको माथिल्लो हैसियतका कारण विपक्षीले पनि उनलाई ‘हेभिवेट’ उम्मेदवारका रुपमा ग्रहण गरिसकेका छन्। यहाँ कूल मतदाता संख्या ८० हजारको हाराहारीमा छ।
चुनावको सेरोफेरोमा नेपाल लाइभका लागि नवीन अर्यालले उनीसँग गरेको कुराकानीः
पहिलो पल्ट आफैं जन्मिएको ठाउँबाट निर्वाचन लड्दै हुनुहुन्छ? कस्तो माहोल भेट्टाउनु भयो?
म मनोनयन दर्ता गरेदेखि नै यहाँ सक्रिय छु। मेरो पक्षमा माहोल बन्दै गइरहेको छ। जनतासँग अन्तक्र्रिया गरिरहेको छु। प्रतिक्रिया एकदमै सकारात्मक पाएको छु। विकाश योजनालाई लिएर मानिसहरुमा व्यापक गुनासा छन्। माथिल्लो तहको व्यक्ति चुनाव लड्न आएको भन्दै सबैको ध्यान आकृष्ट भएको छ। मैले वाम गठवन्धनको नेतृत्व गरिरहेको हुनाले स्थिति सहज बन्दै गइरहेको महसुस गरेको छु।
काठमाडौं र ताप्लेजुङमा के भिन्नता देख्नु भयो?
भिन्नता छ। ताप्लेजुङ विकट ठाउँ हो। काठमाडौं जस्तै सबै ठाउँ सुगम छैनन्। त्यसैले जनताको घर–घरमा जान गाह्रो परिरहेको छ। तर, पनि म अत्याधिक ठाउँ पुगेर जनताको गुनासो सुनिरहेको छु। विकाशको आशा मरिसकेको छैन। मबाट जनताले धेरै आशा राखेका छन्।
प्रतिद्वन्द्वी कसलाई देख्नु भएको छ?
नेपाली कांग्रेस नै हो। राजनीतिक रुपमा लामो समयदेखि उनीहरुको यहाँ राम्रो उपस्थिति छ। तर, हामीले वाम गठबन्धन निमार्ण गरेका छौं। यसैले हामीबाहेक अन्यको विकल्प छ जस्तो मलाई लाग्दैन। वाम गठबन्धन भनेको नै लोकतान्त्रिक मूल्यमा आधारित शक्ति हो। लोकतान्त्रिक मूल्य–मान्यतालाई टेकेर हामीले सबै कुरा ‘डेलिभर’ गर्ने भएपछि अरु पार्टी चाहिन्छ जस्तो मलाई लाग्दैन। तर, चुनावमै उत्रिसकेपछि प्रतिस्पर्धा त हुन्छ नै।
ताप्लेजुङको समस्या के–के देख्नु भयो?
यहाँको मुख्य समस्या भनेको बाटोको ‘कनेक्टिभिटी’ हो। जिल्लामा बाटोको ठूलो समस्या छ। हिमाली र पहाडी दुवै क्षेत्र पर्ने हुनाले यसलाई जोड्नुपर्ने आवश्यकता छ। शिक्षा, स्वास्थ्य, खानेपानीको समस्या पनि उस्तै छ। कृषकहरुले उचित मूल्य पाएका छैनन्। पयर्टनको प्रचूर सम्भावना भए पनि खासै प्रचारप्रसार भएको छैन। पाथिभरा माई मन्दिरले धार्मिक पयर्टक भित्र्याएर यो ठाउँमा ठूलो सम्भावना भएको प्रस्ट पारिसकेको छ। कञ्चनजंगा हिमाल लगायत थुप्रै हिमाली रेन्ज यहाँ पर्छन्। यो धनी जिल्ला भएर पनि सोचेजति विकाश भएको छैन। त्यसकारण यसपालिको मेरो उम्मेदवारी यहाँको विकासका लागि पनि हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
