काठमाडौं– मंसिर २१ गते हुने प्रतिनिधिसभा निर्वाचनमा ललितपुर क्षेत्र नम्बर–१ बाट नेपाली कांग्रेसका उदय शमशेर राणा उठेका छन्। उनको प्रतिद्वन्दीमा ‘वाम गठबन्धन’ को तर्फबाट नेकपा एमालेले पूर्व डिआइजी नवराज सिलवाललाई अघि सारेको छ।
उदय २०६४ सालको पहिलो संविधानसभा निर्वाचनमा ललितपुर–१ मा नेकपा माओवादीका नेता एवं पूर्व अर्थमन्त्री वर्षामान पुनसँग पराजित भएका थिए।
तर, २०७० सालको दोस्रो संविधानसभा निर्वाचनमा उनले नेकपा एमालेका मधुसुदन पौैडेललाई पराजित गरे। हाल अर्थ राज्यमन्त्री रहेका उदय दोस्रो संविधानसभा निर्वाचनमा १८ हजार ५ सय ६० मत ल्याएर विजयी भए। उनले त्यति बेला एमालेका पौडेल र माओवादीका हरि दाहालले प्राप्त गरेको मत जोड्दा पनि २ हजार बढी ल्याएका थिए।
हाल यो क्षेत्रमा ६५ हजार मतदाता छन्। ‘वाम गठबन्धन’ ले पूर्व डिआइजी सिलवाललाई उठाउने निर्णय गरेसँगै कांग्रेसले यो क्षेत्र सुरक्षित रहेको भविष्यवाणी गरिरहेको छ। यसै सन्दर्भमा राणासँग नेपाल लाइभका लागि नवीन अर्यालले गरेको कुराकानीः
यो चुनावमा तपाईंको मुख्य प्रतिस्पर्धी को हो?
वाम गठबन्धनबाट उठेका नवराज सिलवाल नै हुन्। तर, मैले पहिलेजस्तो प्रतिस्पर्धा हुने देखिरहेको छैन। प्रचार–प्रसारका लागि ललितपुरको विकट गाउँहरु घुमेर फर्किएपछि मेरो मनोबल २ सय प्रतिशत बढेको छ। यहाँका मतदाताले विकाश निमार्णमा मेरो अग्रसरतालाई तारिफ गरेका छन्। उनीहरुमा मप्रतिको विश्वास दुई गुणा बढेको छ।
नवराज सिलवाल प्रहरी पेशाबाट राजीनामा गरेर निर्वाचन लड्न आउनु भएको छ, त्यसमाथि वाम गठबन्धनको संयुक्त उम्मेदवार, चुनाव जित्ने उहाँको पनि रणनीति त होला?
खोई, त्यो त थाहा भएन। तर, म अचम्म परिरहेको छु। उहाँलाई न यहाँको भूगोल थाहा छ, न गाउँको समस्या। ललितपुर–१ को साँधसीमा उहाँले थाहा पाइसक्नु भएकै छैन। मानिसहरुले उहाँलाई चिन्दै चिन्दैनन्। एमालेमा लामो समयदेखि जनस्तरमा काम गरेका नेताहरु थिए। उनीहरुलाई मौका नदिई हिजो भर्खर जागिर छोडेको मान्छेलाई उठाउनु भएको छ। उहाँहरुको पार्टीकै मान्छेहरु मसँग दुखेसो गरिरहनु भएको छ। यस्तो अवस्थामा तपाईहरु नै नतिजाको आँकलन गर्न सक्नु हुन्छ।
उसो भए कति मतले जित्ने अपेक्षा गर्नु भएको छ?
यति नै भनेर दाबी त गर्दिन। वाम गठबन्धन छ। तर, उहाँको विवादित ‘इमेज’ र जनस्तरमा काम नगरेको अनुभवबाट मलाई फाइदा पक्कै हुन्छ। २०७० को मतान्तर भन्दा बढी मतअन्तरले जित्छु भन्नेमा ढुक्क छु।
यसपालि तपाईंको एजेन्डा के छ ?
मेरो पहिलेदेखिको एउटै एजेन्डा भनेको पूर्वाधार विकास हो। राजधानीसँग जोडिएको जिल्ला भएर पनि विकासको गति यहाँ जति हुनुपर्ने हो, त्यो छैन। यस क्षेत्रका हरेक गाउँमा पक्की सडक पुग्नुपर्छ। बाटो, खानेपानी र शिक्षा नै मेरा प्राथमिकताका विषय हुन्। २०७० मा मैले निर्वाचन जितेपछि पनि यिनै कुरालाई ‘फोकस’ गरिरहेको छु।
तर, तपाईंले पनि खासै काम गर्नु भएन भन्ने आरोप विपक्षीले लगाइरहेका छन् नि?
विकास आजको भोलि नै देखिने कुरा होइन। म २ वर्ष यो क्षेत्रको सासंद हुँदा ललितपुरबाट हेटौंडा निस्किने कान्ति लोकपथको काम अगाडि बढेको छ। यसका लागि ४ अर्ब रुपैयाँ छुट्टिइसकेको छ। १ अर्ब २० करोड रुपैयाँको ललित घुम्ती बाटोको निमार्ण कार्य सुरु भइसकेको छ। बगुवाबाट प्युटार हुँदै चन्दनपुर निस्किने बाटोको स्तरोन्नतिका लागि ७५ करोडको काम चलिरहेको छ। दुईवटा पहाडी भेगलाई जोड्ने चुमगुङ कोरिडोरको काम भइरहेको छ। टिकाभैरवदेखि देवीचौर हुँदै घुसेलबाट माल्टा पुग्ने बाटो पिच भइरहेको छ। यही दुई वर्षको अवधिमा लेले खानेपानी र देवीचौर झम्पी खानेपानी योजनाको काम भयो।
मेरो कार्यकालमा बाटो विस्तार हुँदा विकट ठाउँमा बस्ने किसानहरुले पनि आफ्नो खेतमा उब्जनी भएको तरकारी र दूध सहजरुपमा काठमाडौं लगेर बेच्न थालेका छन्। काठमाडौं ठूलो बजार भएको हुनाले कफीदेखि चिया बगानको विस्तार भएको छ। गाउँलेहरु ‘ग्रिन टी’ उत्पादनमा लागेका छन्। भुकम्पका बेला हिँड्ने बाटो थिएन। तर पनि म उद्धारको सामान बोकेर हेलिकोप्टरको सहाराले गाउँगाउँ छिरें। यसैले मलाई विरोधीले के भन्छन्, त्यसले खासै अर्थ राख्दैन। गाउँलेहरुले मलाई चिनेका छन्। र, मत मलाई नै दिन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
