नेपाली कांग्रेसका पूर्व सभापति सुशील कोइराला जीवित छँदासम्म नेपालगञ्ज नगर कांग्रेसको एउटा केन्द्रकै रुपमा रह्यो। सुशीलकी भाइबुहारी र कांग्रेस बाँकेका पूर्व सभापति अरुण कोइरालाकी पत्नी किरण कोइरालाले जेठाजु र श्रीमानको निधनपछि बाँके कांग्रेसको विरासत थाम्दै आएकी छिन्।
कांग्रेसको चार पटकसम्म महासमिति सदस्य हुँदै हाल उनी बाँके कांग्रेसकी सभापति छिन्। उनी नेपाल महिला संघ बाँकेको संस्थापक सदस्य र संघको चार कार्यकालसम्म अध्यक्ष भएकी थिइन्। किरणको नेपालगञ्जस्थित घर ०४६ देखि कांग्रेसका लागि शक्तिकेन्द्रकै रुपमा रहेको थियो। सुशील कोइराला नेपालगञ्जमा आउँदा सधैं भाइबुहारीकै घरमा बस्थे।
कांग्रेसमा निरन्तर ५ दशकदेखि क्रियाशील रहँदा किरणले पार्टीबाट कहिल्यै राजनीतिक लाभको पद पाइनन्। उनी दोस्रो संविधानसभाका बेला समानुपातिक सभासदको सूचीमा परेकी थिइन्। तर, बुहारीलाई सभासद बनायो भन्ने आरोप लाग्ला भनेर पार्टी सभापति सुशीलले उनलाई सभासद बनाएनन्।
यस पटक पनि प्रतिनिधिसभामा समानुपातिक सांसद हुन चाहने उनको चाहना अधुरै भएको छ। बाँके कांग्रेसले उनको नाम एक नम्बरमा सिफारिस गरेसँगै त्यसका लागि लबिङ गर्न उनी दुई पटक काठमाडौं पनि धाइन्। तर, पार्टीको समानुपातिक सूचीमा आफ्नो नाम नपरेपछि उनी अहिले खिन्न छिन्।
यसै सन्दर्भमा नेतृ किरणसँग नेपाल लाइभका लागि कृष्ण अधिकारीले गरेको कुराकानीः
बाँकेबाट दुई–दुई पटक समानुपातिकबाट सभासद भएकाले प्रत्यक्षमा टिकट पाए। समानुपातिकबाट सभासद भएकाहरुको नाम पुनः समानुपातिकमा पर्यो। तर, तपाईंको नाम नाम नपर्नुको कारण के हो?
कांग्रेसमा यही त छ विडम्बना! पहिला सुशील दाइ पार्टी सभापति हुँदा पनि मेरो नाम सिफारिस भएकै हो। त्यो बेला पनि मैले अवसर पाइनँ। मैले ५ दशकदेखि पार्टीमा काम गर्दै आएकी छु। यसपाली अवसर पाउनुपर्छ भन्ने चाहना राखेकी थिएँ। मेरो नाम जिल्लाबाट एक नम्बरमा सिफारिस पनि भएको थियो। दुई पटक काठमाडौं गएर पार्टीका नेताहरुलाई भेट्दै आफ्ना चाहनाबारे बताएकी थिएँ। दुई पटक गरेर काठमाडौंमा १२/१५ दिन जति बस्दा पनि मैले शेरबहादुरजीसँग भेटेर कुरा गर्न पाइनँ। उहाँका पिएले मेरो फोनसम्म उठाएनन्।
शेरबहादुरजी र उहाँकी श्रीमती दुवैले प्रत्यक्षमा टिकट पाए, बालकृष्ण खाँणका श्रीमान्–श्रीमती दुवै समानुपातिकमा परे। खुमबहादुरजीको श्रीमतीले पनि टिकट पाउनुभयो। तर, म पार्टीको निर्वाचित जिल्ला सभापति भए पनि टिकट पाइनँ। कोइराला परिवारकी सदस्य भएकै कारण मलाई पन्छाइएको होला।
पार्टी नेतृत्वले अन्याय गरेरै समानुपातिकमा तपाईंको नाम नराखेको हो त?
म ५ दशकदेखि कांग्रेसका सक्रिय छु। मैले बिपी, गिरिजाबाबू, सुशील दाइ सबैको सहयोगी भएर पनि काम गरेकी छु। चार पटक पार्टीको महासमिति सदस्य भएँ, अहिले जिल्लाको सभापति छु। कांग्रेसमा समानुपातिक सांसद हुन योभन्दा बढी के योग्यता र योगदान चाहिन्छ? मसँग पार्टी सभापतिमा चुनाव लडेर हारेका निरञ्जन सिंह सिँजापति, लक्ष्मीनारायण शाह र नारायण गौडेल तीनै जनाले आसन्न चुनावको टिकट पाए। उनीहरु तीनै जना देउवा क्याम्पका भएकाले टिकट पाए। तर, मलाई दिइएन।
२/२ पटक समानुपातिक सभासद भएका बादशाह कुर्मीजीले समेत फेरि बाँकेको ३ नम्बरबाट प्रत्यक्षमा टिकट पाउनुभयो। पूर्व सभासद आशा विक र सर्वतारा देउवा क्याम्पमा भएकाले पुनः टिकट पाए। देउवा क्याम्पमा भएकै कारण क्षेत्र नम्बर १ मा माधवजीले टिकट पाए। बाँकेमा कोइराला क्याम्पमा रहेका कसैले पनि टिकट पाएन।
त्यसो भए बाँकेमा टिकट वितरण गर्दा पार्टी सभापति देउवाले एकलौटी नै गरेका हुन् त?
हो। देउवाजीले पार्टीमा कसले कति योगदान गरेका छन् भन्ने मूल्यांकन नगरी आफ्नो क्याम्पमा रहेकालाई छानीछानी टिकट दिनुभयो। टिकट वितरणमा एकलौटी गरेर देउवाजीले अत्याचार नै गर्नुभयो।
टिकटका लागि देउवा र कोइराला क्याम्पबीच भागबन्डा हुँदा कोइराला क्याम्पले तपाईंको पक्षमा लबिङ नगरेकाले तपाईंको नाम नपरेको भन्ने पनि चर्चा छ नि!
मैले महामन्त्री शशांक कोइराला, नेताहरु प्रकाशमान सिंह, रामचन्द्र पौडेल लगायत धेरै नेतालाई भटेर आफ्नो चाहना व्यक्त गरेकी थिएँ। सबैले तपाईं नाम पर्छ भनेर आश्वासन पनि दिनुभएको थियो। मेरो नाम समानुपातिक सूचीमा नपरेपछि मैले महामन्त्री शशांकलाई किन मेरो नाम परेन भनेर सोधेकी थिएँ। उहाँले अन्तिमसम्म प्रयास गर्दा पनि सकिएन भन्ने जवाफ दिनुभयो।
पार्टीले टिकट नदिए पनि म कांग्रेस–राप्रपा गठबन्धनका उम्मेदवारलाई जिताउन लागिपरेकी छु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778491729.jpg)
-1764146706.png)
