काठमाडौं- व्यापारीहरूले राजश्व ठगी गर्न केसम्म गर्न पछि पर्दैनन्! कानुनी र गैरकानुनी सबै काम गर्न सक्छन् व्यापारी भन्ने कुरा हालै गरिएको एक अनुसन्धानले खुलासा गरेको छ। नक्कली भ्याट बिलको पहिलो प्रकरणको अन्तिम सुनुवाइ सर्वोच्चमा चलिरहेका बेला फेरी अर्को नक्कली भ्याट बिलको प्रकरण खुलासा भएको छ।
राजस्व छली गर्न नक्कली भ्याट बिल खडा गर्ने नयाँ शैली सुरु भएको राजश्व अनुसन्धान विभागका महानिर्देशक दीर्घराज मैनाली बताउँछन्।
फर्महरूले सोझा र अनपढ मानिसलाई काम दिने बहानामा उनीहरुकै नाममा कम्पनी खोल्ने र खाता सञ्चालन गर्ने अनि नक्कली बिल मार्फत् भ्याट छली गर्ने क्रम बढेको अनुसन्धानले देखाएको महानिर्देशक मैनालीको भनाइ छ।
विगतमा कम्पनीहरूले फर्मबाट नक्कली बिल खरिद गरेर देखाउने गरेका थिए। उक्त कुराको खुलासा भएर कारबाहीमा परेपछि सोझा मानिसलाई निसाना बनाएर फर्म खोली राज्यकोषमा जम्मा हुने राजश्व लुट्न थालेका हुन्।
राजश्व अनुसन्धान विभागको लामो अनुसन्धानपछि नक्कली भ्याट बिलको यो रहस्य बाहिर आएको हो।
यस्तो काम गर्ने २४ फर्म र त्यसका सञ्चालक विरुद्ध विभागले मंगलबार काठमाडौं जिल्ला अदालतमा मुद्दा दायर गरेको छ।
राजश्व अनुसन्धान विभागले १ अर्ब ७५ करोड रुपैयाँ कर छली गरेको आरोपमा उनीहरू विरुद्ध मुद्दा दायर गरेको हो।
‘निम्नस्तरका मजदुरलाई आर्थिक प्रलोभनमा पारी तिनीहरूका नाममा फर्म कम्पनी दर्ता गराई बैंक खाता खोली कारोबार गरेको देखियो,’ विभागले जिल्ला अदालतमा दायर गरेको आरोपपत्रमा भनिएको छ, ‘नक्कली बिलको कारोबार गर्ने व्यक्तिले आफू र आफ्नो मातहतको कर्मचारीलाई प्रयोग गरी दुबै जनाको दस्तखत कार्डसमेत पेस गरी कुनै एक जनाको दस्तखतबाट बैंक कारोबार संचालन गर्ने गरेको पाइएको छ।’
झुटा तथा नक्कली बिलबिजक बनाई कर छली गर्ने केही करदातामाथि गरिएको प्रारम्भिक अनुसन्धानपछि विकराल रुपमा कर छली रहेको तथ्य सार्वजनिक भएको हो। 'नक्कली भ्याट बिल छलीको अवस्था गम्भीर छ,' आरोपपत्रमा उल्लेख छ।
नक्कली भ्याट बिल जारी गर्ने गिरोहले मजदुर र न्यून आयस्रोत भएका व्यक्तिका नाममा फर्म खोल्ने, भ्याटमा दर्ता गराई नक्कली कारोबार गरिरहेका विभागको अनुसन्धानमा पाइएको हो। बैंकमा तिनै कर्मचारीका नाममा खाता खोल्ने र सञ्चालन गर्ने पनि गरेको अनुसन्धानमा देखिएको छ।
यसका साथै नक्कली भ्याट बिल छपाई गरी कारोबारसमेत गर्ने गरेको विभागको अनुसन्धानले देखाएको छ।
जसले बिजक जारी गर्छ, उसैबाट थोरै कमिसन लिएर बिल फिर्ता गर्ने, बिल छपाई र बिक्री गर्ने गरेको भेटिएको आरोपपत्रमा उल्लेख छ। अडिट गरेको वित्तीय विवरण समेत कर कार्यालयमा बुझाउने र कर प्रणालीमा कारोबार समेत देखाउने गरेका थिए।
१३ प्रतिशत भ्याट र खर्च देखाई २५ प्रतिशत आयकर छली गरेको अनुसन्धानमा देखिएको विभागका महानिर्देशक मैनालीको भनाइ छ।
अनुसन्धानमा गत असारमा १२ करोड कारोबार गरेको फर्म साउनमा गायब भएको देखिएको थियो। परमेश्वर साहले मात्र २० वटा खाता सञ्चालन गरेको विभागमा अनुसन्धानमा भेटिएको छ। बिल खरिद गर्ने ठूला तथा मझौला गरी १२ फर्मको कारोबार विवरण संकलन गरी अनुसन्धान अघि बढाइएको थियो।
ज्याला मजदूरी गर्ने अनपढ व्यक्तिलाई प्रलोभनमा पारी निजहरुका नाममा कम्पनी खोली त्यस्ता कम्पनीबाट वास्तविक रुपमा मालवस्तुको खरिद बिक्री कारोबार नै नगरी झुट्टा बिजक जारी गरी राजस्व चुहावट गरेको समेत अनुसन्धानमा खुलेको छ। कम्पनी दर्ता गर्ने व्यक्ति र अन्य कुनै एक आफू नियन्त्रित व्यक्तिलाई कर्मचारीका रुपमा राखी खाता संचालन गर्न लगाई संगठित रूपमा राजस्व चुहावट गरेको पाइएको हो।
यी हुन् राजश्व छल्ने फर्म
दुई व्यक्तिबाट खुलेको रहस्य
नक्कली भ्याट बिल प्रकरणको नयाँ शैलीको रहस्य दुई जना व्यक्तिमाथि भएको अनुसन्धानबाट खुलेको हो।
राजश्व छली गरेको आरोपमा पक्राउ परेका परमेश्वर साह र जय किशोर साहमाथि विभागले अनुसन्धान गर्दै जाँदा नक्कली भ्याट बिलको नयाँ शैली फेला पारेको हो।
२०७५ माघ ३ र ४ गते पक्राउ परेका साहद्धयको बयानपछि मात्र विभागले यस्तो रहस्य थाहा पाएको थियो।
डिजे प्रोलिंक ट्रेड प्रालिमार्फत साहद्धयले ११ करोड ८७ लाख ४२ हजार ६ सय ८४ रुपैयाँको नक्कली बिल जारी गरेका थिए। उनीहरुले सो कम्पनीका सञ्चालकमा रमेश मुखियालाई राखेका थिए। यसरी उनीहरुले नक्कली बिल जारी गरेको विभागको अनुसन्धानमा पाइएको छ।
विभागले लगत्तै अन्य फर्महरूको बिलमाथि पनि अनुसन्धान थालेको थियो। २४ वटा फर्महरुले यसरी नक्कली भ्याट बिल जारी गर्दै ठगी गर्दै आएको पुष्टि भएपछि काठमाडौ जिल्ला अदालतमा मुद्दा दायर गरेको हो।
३ करोडको हुन्डी कारोबारी विरुद्ध मुद्दा
विभागले विदेशी विनिमय अपचलन तथा हुन्डी कारोबार गरेको अभियोगमा गोविन्द सुब्बा र इन्द्रनारायण लिम्बू विरुद्ध ३ करोड ६६ लाख बिगो कायम गरी काठमाडौं जिल्ला अदालतमा मुद्दा दायर गरेको छ।
सुब्बाले इन्दनारायण लिम्बू समेतको साझेदारीमा रिलायन्स सब रेमिट प्रालि दर्ता गरी उक्त फर्मका माध्यमबाट हुन्डी कारोबार गरेको आरोपपमा उल्लेख छ।
मलेसियाबाट नेपाल पठाउने र ल्याउने रकम नेपाल नल्याई नेपालमै एक ठाउँबाट अर्को ठाउँ पठाएको कारोबार देखाई विदेशी विनिमय रकम अपचलन गरेको विभागको आरोपपत्रमा उल्लेख छ।
कम्प्युटर अभिलेखमा मलेसियन रिङ्गिटको नेपाली पैसासँग फरक दिन र समयको विनिमय दरले हिसाब राखिएको विभागको अनुसन्धानमा पाइएको छ। उनीहरुलाई बरामदी नगद जफत गरी प्रतिव्यक्ति जनही बिगोको ३ गुणासम्म ब्याँज र ३ वर्षसम्म कैद सजाय समेत माग गर्दै मुद्दा दायर गरिएको हो।
३ पसलेले बिक्री गरे डेढ करोडको तस्करीको सुन
विभागको अनुसन्धानमा ३ सुन पसलले तस्करी गरी बिल बिनाको १ करोड ४२ लाखभन्दा बढी बराबरको सुन कारोबार गरेको पाइएको छ।
विभागले यसरी कारोबार गर्ने ८ जना विरुद्ध काठमाडौ जिल्ला अदालतमा मुद्दा समेत दायर गरेको छ।
तस्करीको सुन खरिदबिक्री गर्नेमा सिद्धि अर्नामेन्ट, माँ दुर्गा ज्वेलर्स र ओम ज्वर्लसका सञ्चालक रहेको आरोपपत्रमा उल्लेख छ।
बिल बिजक र पैठारी गरेको प्रज्ञापनपत्र समेत नभएको सुन उनीहरुले पसलमा राखेको विभागको अनुसन्धानमा देखिएको छ।
तस्करीमार्फत् भित्र्याइएको सुनको भुक्तानी विभिन्न व्यक्तिका नाममा रकम जम्मा गरेको बैंकभौचर समेत विभागले बरामद गरेको थियो। सुन खरिद गरे बापत रौतहट बस्ने मनोहर साहलगायतका व्यक्तिहरुको खातामा रकम पठाएको विभागले फेला पारेको थियो।
विभागले सबै सुन पसललाई बिगो र सो बमोजिम जरिवाना र जनही ३ वर्ष कैद सजायको मागदाबी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
