जनकपुरधाम- प्रदेश २ का मुख्यमन्त्री लालबाबु राउतले संघीय सरकारले आन्तरिक सुरक्षाको नाममा प्रदेशमा समानान्तर सरकार चलाउन खोजेको आरोप लगाएका छन्। संघीयता विरोधी कुनै पनि किसिमका गतिविधि स्वीकार्य नहुने उनले बताए।
चेतना नेपालद्वारा आज जनकपुरमा आयोजना गरेको संघीयता कार्यान्वयन विषयक अन्तरक्रिया कार्यक्रमलाई सम्बोधन गर्दै मुख्यमन्त्री राउतले संविधान र संघीयताको भावना विपरीत ल्याइएको आन्तरिक सुरक्षा सम्बन्धि विधेयक आफूहरूले कुनै पनि हालतमा स्वीकार गर्न नसक्ने बताए।
'सयौं मधेशीको बलिदानीबाट प्राप्त संघीयता समाप्त गर्ने षडयन्त्र कँही कतै बाट भएपनि त्यस्ता गतिविधि विरुद्ध प्रदेश सरकार कडा रुपमा प्रस्तुत हुन्छ,' उनले भने, 'संविधानको अक्षरसः पालना नै अहिले प्रमुख आवश्यकता हो। संविधानको भावना विपरीत कुनै पनि गतिविधि भए सडक र सदन मात्र नभई संवैधानिक अदालत समेत जान परे पछि हट्दैन।'
प्रदेश सरकार विगतको विकास क्षेत्र नरहेको जिकिर गर्दै उनले प्रदेश सरकारले चाँडै आफनो शासन प्रशासन स्थापना गर्ने दाबी गरे।
चेतना नेपालका अध्यक्ष एवं राष्ट्रिय सभा सदस्य वृषेशचन्द्र लालको अध्यक्षतामा भएको उक्त कार्यक्रममा राजपा नेपालका अध्यक्ष मण्डलका सदस्य महन्थ ठाकुर, नेपाली काँग्रेसका उपसभापति एवं पूर्व उपप्रधानमन्त्री विमलेन्द्र निधि, नेकपाका नेता रामचन्द्रमण्डल, पूर्व सभासद डा. विजयकुमार सिंह, नागरिक समाजका असगर अलीलगायतका वक्ताले धारणा राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
