पुरानाे बक्याैता मिनाहा माग्दै एयर एसियाले देखायाे काठमाडौं उडानमा चासो

कर्पोरेट

पुरानाे बक्याैता मिनाहा माग्दै एयर एसियाले देखायाे काठमाडौं उडानमा चासोरकम चुक्ता गराएरै छाड्छाैं : विमानस्थल कार्यालय

नेपाल लाइभ आइतबार, माघ २०, २०७५ १२:२१

काठमाडाैं- त्रिभुवन अन्तर्राष्ट्रिय विमानस्थल कार्यालय र नेपाल पर्यटन बोर्डलाई २० करोड भन्दा बढी बक्यौता चुक्ता नगरी उडान बन्द गरेको एयर एसियाले पुनः नेपालमा उडान गर्न चासो देखाएको छ।

गत असोज २७ गतेदेखि यात्रु अभाव देखाउँदै उडान बन्द गरेको एयर एसियाले बक्यौता रकम मिनाहाकाे माग गर्दै उडान गर्न चासो देखाएको विमानस्थल कार्यालयका प्रमुख राजकुमार क्षेत्रीले जानकारी दिए।

‘विमानस्थल कार्यालयलाई बुझाउनुपर्ने विमानस्थल सेवा शुल्कवापतको १३ करोड रुपैयाँ बक्यौता चुक्ता नगरी एयर एसियाले उडान बन्द गर्ने निर्णय गरेको थियो’, क्षेत्रीले भने, ‘उडान बन्द गरेको ४ महिना हुनै लाग्दा फेरि अनौपचारिक छलफलमा नेपालमा उडान गर्ने चासो देखाएको छ।'

असोज २७ गते एयर एसियाको अन्तिम उडान रहेको समयमा विमानस्थल कार्यालयले विमान त्रिभुवन अन्तर्ष्ट्रिय विमानस्थलबाट मलेसिया जान रोक लगाएको थियो। विमान उडान गर्न नपाएपछि एयर एसियाले नेपालस्थित मलेसियाली दूतावासको सहयोगमा काठमाडौं विमानस्थलबाट अन्तिम उडान गरेको थियो।

विमानस्थल सेवा शुल्कवापतको रकम चुक्ता नगरी विमान उडान गर्न नदिने भन्दै विमानस्थल कार्यालयले उडान रोकेपछि दूतावासले एयर एसियाले विमानस्थल कार्यालयलाई बुझाउन बाँकी बक्यौता असुलीमा सहयोग गर्ने प्रतिबद्धतापछि उडान गर्न पाएको थियो।

‘दूतावासले बक्यौता असुलीमा सहयोग गर्ने प्रतिबद्धता गरेको चार महिना हुनै लाग्दा पनि रकम असुली भने गराउन सकेको छैन’, प्रमुख क्षेत्रीले भने, ‘दुतावाससँग एयर एसियाले विमानस्थल कार्यालयलाई बुझाउन पर्ने बक्यौता रकमको विषयमा छलफल भने भइरहेको छ।’

विमानस्थल सेवा शुल्कवापतको बक्यौता रकम नतिरी उडान बन्द गर्ने एयर एसियाको विषयमा विमानस्थल कार्यालय र नेपाल नागरिक उड्डयन प्राधिकरणले मलेसियाको नागरिक उड्डयन प्राधिकरणलाई पत्रचार पनि गरिसकेको छ। तर, नेपालले गरेको पत्रको विषयमा मलेसियाली नागरिक उड्डयन प्राधिकरणबाट कुनै जवाफ नआएको क्षेत्री बताउँछन्।

तर, एयर एसियाले भने विमानस्थल सेवा शुल्कवापतको साँवा रकम भुक्तानी गरिसकेको अवस्थामा विलम्ब शुल्कमा भने मिनाहाको लागि आग्रह गरिरहेको क्षेत्रीले जानकारी दिए। ‘नेपाल सरकार तथा विमानस्थल कार्यालयले विलम्ब शुल्कमा मिनाहा गर्नेमा हामी आशावादी छौं। तर, ऐन कानुनका कारण रकम मिनाहा गर्न नमिल्ने अवस्थामा पछि छलफलकै माध्यमबाट किस्ता बन्दीमा रकम चुक्ता गरी फेरि उडान गर्दै एयर एसियाले काठमाडौंसँग हवाई सम्पर्क जोडन चाहन्छ’, नेपाल लाइभसँग कुराकानी गर्दै प्रमुख क्षेत्रीले एयर एसियाले पठाएको सन्देशबारे बताए।

'दूतावासले विमानस्थल कार्यालयको बक्यौता रकम एयर एसियासँग असुलीका लागि पहल गरिदिने प्रतिबद्धतापछि मात्रै असोज २७ गते विमान उडेको हो’, विमानस्थलका एक कर्मचारीले भने, ‘दूतावासले रकम असुलीका लागि सहयोग गर्ने लिखित प्रतिबद्धताको पत्र पनि पठाएको छ। प्रतिबद्धताअनुरुप एयर एसियाले रकम चुक्ता नगरे क्षेत्रीय तथा अन्तर्राष्ट्रिय नागरिक उड्डयन संगठनको कार्यालयमा समेत पत्राचार गर्नुपर्ने अवस्था आउँछ।’

एयर एसियासँग रकम जसरी पनि चुक्ता गराएरै छाड्ने विमानस्थल कार्यालयको दाबी पनि छ।

एयर एसियाले विमानस्थल सेवा शुल्कवापतको साँवा र विलम्ब शुल्कसहित ४० करोड रुपैयाँ तिर्नुपर्ने थियो। जसमध्ये हालसम्म साँवा रकम २७ करोड मात्रै तिरिएकाे छ। यसैगरी एयर एसियाले पर्यटन शुल्कवापतको नेपाल पर्यटन बोर्डलाई पनि ७ करोड २३ लाख रुपैयाँ रकम तिरेको छैन।

विमानस्थल विकास शुल्कमा प्रति यात्रु एक हजार र पर्यटन शुल्कमा पनि प्रति विदेशी पर्यटकवापत एक हजार रुपैयाँ तिर्नुपर्ने व्यवस्था छ। यसरी संकलन गरिने रकम जुनसुकै एयरलाइन्स कम्पनीले टिकट खरिदमा यात्रुसँग नगद नै लिने गर्छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

माओवादीलाई बाबुरामले दिए ‘प्रचण्ड’को संज्ञा, भने– अब ‘प्रचण्डपन्थी’ भनौं

हङकङका बाबार हायत कर्णाली याक्समा

गुणस्तरीय सेवा दिन टेलिकमलाई प्रधानमन्त्रीको निर्देशन