जनकपुर– प्रदेश २ का उद्योग, पर्यटन, वन तथा वातावरण मन्त्रालयका सचिव विद्यानन्द झालाई कुटपिट गर्ने आर्थिक मामिला तथा योजना मन्त्री विजय यादवलाई कारबाहीको माग गर्दै निजामती कर्मचारीहरूको अधिकारिक ट्रेड युनियन आन्दोलनमा उत्रेको छ।
युनियनले माघ ४ गतेसम्मको लागि पहिलो चरणको आन्दोलनको कार्यक्रम सार्वजनिक गरेका छ।
पहिलो चरणको कार्यक्रमअनुसार बुधबार बिहान १० बजेदेखि ११ गतेसम्म पेन डाउन गरी दिनभर हातमा कालोपट्टी बाँधेर काम गर्ने, बिहीबार हातमा कालोपट्टी बाँधी बिहान १० बजेदेखि १२ बजेसम्म पेन डाउन गर्ने र शुक्रबार हातमाल कालोपट्टी बाँधेर बिहान १० बजेदेखि दिउँसो १ बजेसम्म पेन डाउन गर्ने आन्दोलनको कार्यक्रम रहेको ट्रेडयुनियन धनुषाका अध्यक्ष रामबाबु साहले बताए।
बिहीबारसम्म सत्यतथ्य छानबिन गरी दोषी मन्त्रीमाथि नियमानुसार कारबाही नभए दोश्रो चरणको आन्दोलनको कार्यक्रमसमेत घोषणा गर्ने अध्यक्ष साहले चेतावनी दिए।
कुटपिट गर्ने मन्त्री यादवमाथि कारबाहीको माग गर्दै सोमबार मुख्यमन्त्री लालबाबु राउत र जिल्ला प्रशासन कार्यालय धनुषाका प्रमुख जिल्ला अधिकारी प्रदीपराज कणेललाई ज्ञापनपत्र बुझाउँदै ट्रेड युनियनले आन्दोलनमा उत्रिने २४ घण्टे अल्टिमेटम दिएका थिए।
आइतबार मन्त्री यादवले सचिव झालाई आफ्नो कार्यकक्षमा बोलाएर कुटपिट गरेको आरोप झाको छ।
घटनाको छानबिन गर्न आइतबार नै प्रदेश २ का आन्तरिक मामिला तथा कानुनमन्त्री ज्ञानेन्द्र यादवको संयोजकत्वमा ३ सदस्य छानबिन टोली गठन भएको छ।
टोलीले घटनाको छानबिन गरी सातदिन भित्र मुख्यमन्त्री राउतलाई प्रतिवेदन पेस गर्नुपर्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
