काठमाडौं- आफूले नोकरी गरेर पारिश्रमिक नलिने शायद कोही नहोलान्। तर असी वर्षीय हितबहादुर प्याकुरेलले भने १४ वर्षे शैक्षिक सेवामा एक पैसा पनि लिएनन्।
_x000D_
_x000D_
वि सं १९९५ मा नुवाकोटको बागीश्वरी गाविसमा जन्मिएका प्याकुरेलले वि सं २०१८ मा प्रवेशिका उत्तीर्ण गरी हाल भएको सूर्यगढी गाउँपालिकास्थित बागेश्वरी प्राविबाट शिक्षकका रुपमा सेवा आरम्भ गरेका थिए। वि सं २०३१ सम्म निरन्तर सोही विद्यालयका लागि निःस्वार्थ सेवा गरेका प्याकुरेलले शिक्षकका रुपमा काम छाडेसँगै आफ्नो घरजग्गा सहित केही जग्गा विद्यालयकै नाममा पास गरिदिए। 'त्यो क्षेत्रमा शिक्षा दिनु मेरो धर्म थियो, पैसा नै मेरा लागि सब थोक थिएन', प्याकुरेलले भने।
_x000D_
_x000D_
हाल उक्त विद्यालयमा माध्यामिक तहसम्म पढाइ हुन्छ। यति मात्र होइन, सूर्यगढी बहुमुखी क्याम्पस समेत उनले नै दान गरेको जग्गामा सञ्चालन भएको छ। शिक्षा सेवा छाडेदेखि नै आफूले राजनीतिमा प्रवेश गरेको बताउने उनले भने, 'मेरो बाँकी जिन्दगी समाज सेवा र राजनीतिमा नै बिताउनु थियो। तसर्थ आफूसँग भएको पुर्ख्यौली सम्पत्ति बिक्री गरी आफ्नो कामलाई निरन्तरता दिँदै गएँ।'
_x000D_
_x000D_
उनले आफ्नो स्वामित्वमा रहेको ६० रोपनी जमिन समाज सेवामा नै खर्च गरे। शिक्षा सेवामा रहुञ्जेल भने प्याकुरेलको चौध जनाको परिवार खेतीपातीबाटै चलेको थियो। प्याकुरेलले रसुवाको सरमथलीमा रहेको तत्कालीन निर्कुभूमि उमाविमा समेत आर्थिक सहयोग गरे।
_x000D_
_x000D_
अङ्गेजी र हिन्दी भाषामा समेत अब्बल रहेका प्याकुरेल प्रवेशिका तहपछि अध्ययनलाई निरन्तरता दिन नपाएकोमा आत्मग्लानि महसुस गरेका थिए। तर खाने मुखलाई जुँगाले छेक्दैन भनेझैं उनले विसं २०२३ मा स्नातकसरह कानून विषय उत्तीर्ण गरे।
_x000D_
_x000D_
प्याकुरेलले नुवाकोट, रसुवा, काठमाडौँलगायत क्षेत्रमा सात मन्दिर समेत बनाएका छन्। विद्यालयको प्रधानाध्यापक हुँदा विसं २०२४ मा उनकै अगुवाइमा नुवाकोटदेखि बागीश्वरी हुँदै ओख्रे, उर्लेसम्म चल्ने मोटरबाटो निर्माणमा समेत खटिएका थिए।
_x000D_
_x000D_
बागीश्वरी चोकमा उनले बनाएको बाआमाका नाममा भीमलीला स्मृति सङ्ग्रहालय निर्माणाधीन छ। सङ्ग्रहालयभित्र ब्रह्माको मन्दिर, गणेश मन्दिर र राधाकृष्ण मन्दिर बन्नेछन्। पुराना ऐतिहासिक तथा धार्मिक पुस्तक राख्ने उनको योजना छ। सङ्ग्रहालयका लागि प्याकुरेलले एक करोड लगानी गरेका छन्। सङ्ग्रहालयमार्फत उक्त क्षेत्रका मानिसलाई धर्मका बारेमा जानकारी दिनाका साथै आन्तरिक पर्यटनको प्रवर्द्धन गर्ने उद्देश्य समेत रहेको उनले बताए।
_x000D_
_x000D_
विसं २०२१ मा निजी खर्चमा बागीश्वरी माविका लागि पुस्तकालय तथा विसं २०५२ मा नुवाकोट क्षेत्र नम्बर २ मा बागीश्वरी गाविसमा निजी रु तीन लाखको श्रोतमा राधाकृष्ण मन्दिरको निर्माण गराएका थिए प्याकुरेलले। उक्त क्षेत्रको वातावरण सरसफाइ र वनजङ्गल संरक्षणमा समेत उनको योगदान छ। 'हामीले मरेपछि पनि लैजाने भनेको काम र नाम मात्रै हो', उनले भने। समाजलाई असल कर्मको पथमा डोहोर्याउनु आफ्नो धर्म रहेको उनको ठम्याइ छ।
_x000D_
_x000D_
विभिन्न सामाजिक काममा समेत क्रियाशील प्याकुरेल हाल ब्रह्माकुमारी राजयोगमा लागेर समाजसेवामा संलग्न छन्। आफ्नो जिब्राको स्वादको लागि पशुको हत्या गर्नु पाप हो भन्ने विचार प्याकुरेलको छ।
_x000D_
_x000D_
'आजको मानिस धर्मलाई नकार्छ तर धर्मबिना जीवनको कुनै अर्थ छैन', उनले भने।
_x000D_
_x000D_
प्याकुरेल अहिले काम, क्रोध, लोभ, मोह, अहङ्कार सबै त्यागे मात्र भगवान्को शरणमा पुगिन्छ भन्ने पथमा अघि बढिरहेको बताउँछन्। कानून विषय स्नातक उत्तीर्ण प्याकुरेल हालसम्म पनि सरकारवादी मुद्दालगायत असहाय महिलाका लागि निःशुल्क कानूनी सेवा दिँदै आएका छन्। कानूनी क्षेत्रमा पनि उनले योगदान पुर्याउन थालेको ६ दशक बितिसकेको छ।
_x000D_
_x000D_
प्याकुरेलले थुप्रै मुद्दा लडेका छन्। वि सं २०४० देखि उनको जग्गा जिल्ला अदालत नुवाकोटले रोक्का गरिदिएपछि उनले ३० वर्षसम्म रोक्का फिर्ता गर्न अदालतका विरुद्ध लागे। 'जग्गा बेचेर नै बितेको मेरो सामाजिक कर्म अदालतले रोक्का गरिदिएपछि निकै सास्ती बेहोरें', विगतको स्मरण गर्दै प्याकुरेलले भने।
_x000D_
_x000D_
अन्ततः विसं २०७० कात्तिक १ गते आफ्नो पक्षमा फैसला लिन सफल भए। सो विवरण सर्वोच्च अदालतको विसं २०७१ बैशाख १ गतेको अङ्क १ को भाग ५६ मा कानून पत्रिकामा समेत उल्लेख छ। वि सं २०६३ को अन्तरिम संविधानको मस्यौदा बनाउन समेत उनको योगदान छ। त्यतिबेला उनले सर्वोच्च अदालतका न्यायधीश लक्ष्मणप्रसाद अर्यालसँग सहकार्य गरेका थिए।
_x000D_
_x000D_
आफ्नो पूर्ण जीवन नै अरुको सेवामा समर्पित गर्ने उनको योजना छ। काठमाडौं महाराजगञ्जमा गीता पाठशाला समेत सञ्चालन गरिरहेका प्याकुरेल हाल योगमा समेत उतिकै चासो राख्छन्। उनी आफूलाई समाजसेवी भन्दा पनि राजयोगी भन्न रुचाउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
