‘कैले आयाउ काठमान्डू?’
_x000D_
_x000D_
कमला वलीले आश्चर्यवाचक जिज्ञासु नजर शर्मिला रावलको अनुहारतिर फ्याँकिन् र मुस्कुराइन् मात्रै।
_x000D_
_x000D_
बिरानो मान्छे र बिरानै बोली मात्रै भेटिइरहेका काठमाडौंमा आफ्नो जस्तै लबजमा बोल्ने मान्छे भेटिँदाको हेराइ थियो त्यो।
_x000D_
_x000D_
‘हिरुनी भयाछ्यौ, कसो लाग्याको छ (हिरोइन हुनुभएछ, कस्तो लागेको छ) ?’ मैले दोस्रो प्रश्न गरेँ।
_x000D_
_x000D_
दुवै जना किशोरीको अनुहारमा रहेको लज्जाको पर्दा केही हट्यो। उनीहरु त्यसपछि सकेसम्म नेपाली (तर, कहीँ खस भाषाको मिसावट) मा बोले।
_x000D_
_x000D_
_x000D_
_x000D_
कमला र शर्मिला अर्थात् रेखा थापाको फिल्म ‘मालिका’का कलाकार। कात्तिक १६ गते रिलिज हुने उक्त फिल्ममा कमलाले मुख्य कलाकारकै रुपमा अभिनय गरेकी छिन् भने शर्मिला दुलहीको भूमिकामा छिन्।
_x000D_
_x000D_
जाजरकोटको कालिगाउँकी कमला र लाहाकी शर्मिला फिल्म ‘मालिका’को ट्रेलर रिलिज भएदेखि नै गाउँमा ‘सेलिब्रिटी’ भइसकेका छन्। फिल्म आगामी शुक्रबार रिलिज हुने भएकाले काठमाडौं आएदेखि नै उनीहरु असाध्यै व्यस्त छन्। एकातिर उनीहरुले आफ्नो फिल्मको प्रचार गर्नुछ भने अर्कातिर अन्तर्वार्ता दिन भ्याइनभ्याई छ।
_x000D_
_x000D_
समयले सेलिब्रिटी बनेका उनीहरुलाई ‘सेलिब्रिटी’को अर्थ थाहा छैन। परिस्थितिले हिरोइन बनेका उनीहरुलाई न यसअघि कहिल्यै हिरोइन बन्नु थियो, न यसपछि।
_x000D_
_x000D_
केही वर्षअघि मात्रै बिजुली पुगेको जाजरकोटको कालिगाउँमा अझै टिभी पुगेको छैन। इन्टरनेट पुग्ने कुरै भएन। त्यसैले कमलालाई फिल्ममा अभिनय गरिरहँदासम्म पनि फिल्म के हो थाहा थिएन, अझै राम्रोसँग छैन।
_x000D_
_x000D_
फिल्ममा अभिनय गरेपछि ‘फिल्म हेर्नुपर्छ’ कसैले भनिदियो। केही नेपाली फिल्म हेर्ने प्रयास गरिन् तर उनलाई रमाइलै लागेन।
_x000D_
_x000D_
कमलाले आफ्नो गाउँको अवस्थाबारे जानकारी दिइरहेकी थिइन्। यहीबीच प्रश्न गरियो, ‘अब त भोलि गईकन हिरुनी बन्न्या होला त (अब हिरोइन नै बन्ने होला नि)?
_x000D_
_x000D_
कमलालले 'नाइँ' संकेतमा टाउको हल्लाइन्।
_x000D_
_x000D_
क्या बन्न्या त? फेरि प्रश्न गरियो।
_x000D_
_x000D_
‘टिचर,’ उनले आत्मविश्वासका साथ भनिन्।
_x000D_
_x000D_
कर्णाली र सुदूर गाउँका हिरो/हिरोइन अहिले पनि शिक्षक/शिक्षिका नै हुन्। उनको रोलमोडल पनि शिक्षिका नै छन्। शिक्षिका बन्न त्रिभुवन उच्च माध्यामिक विद्यालयमा नेपाली र स्वास्थ्य विषय लिएर कक्षा ११ पढिरहेकी छिन्।
_x000D_
_x000D_
_x000D_
_x000D_
‘फिलिम नेदेख्याकी मान्छे क्याहरी फिल्म खेल्याउ (फिल्म नदेखेकी मान्छेले कसरी फिल्म खेल्नुभयो) ?’ फिल्ममा आउनुको कमलाको कथा जान्न चाहेँ।
_x000D_
_x000D_
‘म सात्यासात खेल्न लाग्याकी थिएँ (साथीसँग खेलिरहेकी थिएँ)। नरबहादुर सर (फिल्मका निर्माता नरबहादुर कार्की) ले मलाई बोलाएर फिल्म खेल्ने हो? भनेर सोध्नुभयो,’ उनले सुरु गरिन्।
_x000D_
_x000D_
फिल्मबारे जानकारी नभएकी उनले ‘नाइँ’ भनेपछि निर्माता कार्कीले उनका बुवाआमासँग सल्लाह गरे। सुरुमा छोरीलाई फिल्ममा अभिनय गराउन राजी नभए पनि पछि एक सर्तमा उनीहरु राजी भए। सर्त थियो– फिल्ममा अभिनय गरे पनि कमलाको पढाइ बिगार्न नपाउने।
_x000D_
_x000D_
एसइई दिइसकेकी कमलाले त्यहीबीच फिल्म ‘मालिका’मा अभिनय गरिन्।
_x000D_
_x000D_
‘फिल्म नहेर्याकी मान्छेकन अभिनय गर्न कसरी आयो?’ मैले जिज्ञासा राखेँ।
_x000D_
_x000D_
‘रेखा दिदीले जसोजसो गर् भनेर सिकाउनुभयो। मैले त्यसै गर्याँ,’ कमलाले भनिन्। देखे–भोगेअनुसार नै गर्नुपर्ने भएकाले अभिनय गर्न उनलाई खासै अप्ठ्यारो भएन।
_x000D_
_x000D_
_x000D_
साथी शर्मिलालाई भने निर्माता कार्कीले कम्प्युटर इन्स्टिच्युटमा भेटेका हुन्। सुरुमा उनले पनि अस्विकार गरेकी थिइन् अभिनय गर्न। पछि अरुले अवसरका रुपमा अर्थ्याएपछि राजी भइन् र उनको आमाबुवा पनि सहमत भए।
_x000D_
_x000D_
यी दुवैले फिल्म त्यति नहेरे पनि रेखा थापाको नाम भने सुनेका रहेछन्। त्यसैले उनीहरु एक हदसम्म तयार भए।
_x000D_
_x000D_
‘बाल विवाहविरुद्ध फिल्म बन्न्याँ भन्यापछि मलाई अझ राम्रो लाग्यो,’ बाल क्लबकी कोषाध्यक्षका रुपमा काम गरिसकेकी शर्मिलाले भनिन्। सुदूर–कर्णालीका ग्रामीण इलाकामा बालविवाह पूर्ण रुपमा हटेको छैन। उनीहरुकै एक साथीले कक्षा ६ मा पढ्दै विवाह गरेको उनीहरुले देखेका छन्। आफू सरहका वा बहिनी उमेरकाले विवाह गरेर पाएका दुःख नजिकबाट देखेका छन्।
_x000D_
_x000D_
यी दुवैको लक्ष्यमध्येको एक बालविवाह विरुद्धकी अभियन्ता बन्ने पनि हो। कमलाले भनिन्, ‘पहिला दुर्गममा बाल विवाहविरुद्ध आवाज उठाएर देशव्यापी बनाउने सोच छ।’ तर, शिक्षिका भने उनलाई बन्नु नै छ। शर्मिला भने अहिलेदेखि लोकसेवा आयोगको तयारीमा छिन्। उनको अहिलेको सपना खरीदार बन्ने हो।
_x000D_
_x000D_
गाउँमै जन्मेहुर्केकी कमलाले केही दिनअघि मात्र पहिलोपल्ट काठमाडौं टेकिन्। रिलिजको संघारमा रहेको फिल्म ‘मालिका’को प्रचारका लागि उनीहरु यहाँ ल्याइपुर्याइएका हुन्।
_x000D_
_x000D_
काठमाडौंका लागि गाडी चढिरहँदा भर्खर १५ वर्ष टेकेकी कमलालाई नयाँ ठाउँ देख्ने उत्साह त थियो तर त्यो भन्दा बढी थियो डर। जति गाडीले रफ्तार पकड्दै गयो, त्यति नयाँ ठाउँ देख्दै गइन्। उनलाई अत्यास लाग्दै गयो।
_x000D_
_x000D_
काठमाडौं आएपछि उनले ठाउँ मात्रै होइन, आफैंलाई पनि नयाँ महसुस गरिरहेकी छिन्। सधैं कुर्तासलवार लगाउने उनी पाइन्ट-कोटमा ठाँटिनुपरेको छ। हरेक दिन नौला मान्छे भेटिरहेकी छिन्। नौला कुरा सुनिरहेकी छिन्। नयाँ खानाको स्वाद लिइरहेकी छिन्।
_x000D_
_x000D_
तर, यी कुरामा मन भुल्न सकेको छैन उनीहरुको। तिहार नजिकिइरहेको छ। कमला र शर्मिलाको आँखामा पोहोरका तिहारमा गरेको रमाइलोका दृश्य झलझली नाँचिरहेका छन्। कमलालाई लागेको छ, ‘तिहार मनाउनेगरी गाउँ जान पाए हुन्थ्यो।’
_x000D_
_x000D_
_x000D_
_x000D_
फिल्म ‘हिट र फ्लप’को लेखाजोखासँग उनीहरुको कुनै साइनो–सम्बन्ध छैन। उनीहरुलाई आफूहरुले अभिनय गरेको फिल्मबारे अरुले के भन्लान्? भन्ने चासो मात्रै छ।
_x000D_
_x000D_
पूरा फिल्म उनीहरुले पनि हेर्न पाएका छैनन्। ट्रेलर हेरेर ‘राम्रो गरेकी छौ’ भन्दा उनीहरुलाई खुसी लागिरहेको छ। पूरै फिल्ममा कस्तो गरियो होला भन्ने व्यग्र प्रती भने उत्तिकै छ।
_x000D_
_x000D_
उनीहरुको हिरोइन यात्रालाई लिएर के भन्छन् त गाउँलेहरु?
_x000D_
_x000D_
‘कुणा बुझ्न्याँ राम्रो गर्यौ (कुरा बुझ्नेले राम्रो गर्यो) भन्छन्, नबुझन्याँ बुवाआमालाई छोरीलाई हिरोइन बन्न नपठाऊ भन्छन्,’ जवाफ दिन शर्मिला अघि सरिन्।
_x000D_
_x000D_
रेखा थापाका फिल्म खासै नहेरेकी यी किशोरीलाई पर्दाकी रेखाबारे उति जानकारी छैन। हिरोइनका रुपमा रेखा देखेकै छैनन्। तर, उनीहरुको नजरमा रेखा ‘हिरो’ हुन्। रेखाजस्तै साहसी बन्ने उनीहरुको चाहना छ।
_x000D_
_x000D_
मालिकाको ट्रेलर
_x000D_
_x000D_
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766152266.png)
-1764146706.png)
-1763721444.png)
