काठमाडौं– राष्ट्रिय स्वतन्त्र पार्टीका नेता तथा प्रतिनिधिसभा सदस्य यज्ञमणि न्यौपानेले सर्वोच्च अदालतको भवन निर्माणका क्रममा भएको भनिएको भ्रष्टाचार प्रकरणको निष्पक्ष छानबिन गर्न माग गरेका छन्।
न्यायपालिकाभित्रै भ्रष्टाचारको आशंका उत्पन्न हुँदा सुशासनको कुरा गर्नु विरोधाभासपूर्ण हुने टिप्पणी गर्दै उनले भवन निर्माणसँग सम्बन्धित सबै निर्णय, बिल र प्रक्रियाको सत्यतथ्य जाँच गर्नुपर्ने बताएका छन्।
‘न्यायको महलभित्र भ्रष्टाचारको जग गाडिएको छ भने न्यायको शिखरबाट सुशासनको भाषण गर्नु ढोंगबाहेक केही होइन,’ न्यौपानेले भनेका छन्।
उनका अनुसार सर्वोच्च अदालतको भवन निर्माणका क्रममा भ्रष्टाचार भएको विषय सार्वजनिक भएको थियो। यस प्रकरणमा अख्तियार दुरुपयोग अनुसन्धान आयोगमा कारबाही गर्न र कारबाही नगर्न फरक–फरक पत्राचार भएको उल्लेख गर्दै उनले त्यसको योजनाकार, लाभार्थी र मतियारको पहिचान गर्नुपर्ने माग गरेका छन्।
सिंहदरबारनजिकै निर्माण गरिएको सर्वोच्च अदालतको भवनको हरेक इँटा, बिल र निर्णयमाथि निष्पक्ष छानबिन हुनुपर्ने उनको भनाइ छ।
‘न्यायको मन्दिरमै बेथितिको शङ्का उब्जिँदा न्यायपालिकाले आफ्नै विश्वसनीयताको अग्निपरीक्षा दिनुपर्छ,’ उनले भनेका छन्।
अनुसन्धान शक्तिशाली व्यक्तिको ढोकासम्म पुग्दा प्रभावित हुन नहुने र प्रमाणका आधारमा दोषी देखिने कसैले पनि पदको आडमा उन्मुक्ति पाउन नहुने न्यौपानेको धारणा छ।
‘न्यायको घर पहिले आफैँ न्यायको कठघरामा उभिन सक्नुपर्छ। नत्र जनताको नजरमा न्यायको ढोका खुला देखिए पनि विश्वासको ढोका बन्द हुनेछ,’ उनले भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791596882.png)
-1786602170.png)
-1791562069.png)
