काठमाडौं– ‘कसैलाई सय रुपैयाँ कमाउनुमा सफलता लाग्छ, कसैलाई सय बिलियन डलरले पनि पुग्दैन’ विश्व मानचित्रमा कहलिएका फेसन डिजाइनर प्रबल गुरुङ फिस्स हाँसे, ‘पैसा र शक्ति सफलताको मापदण्ड हुँदै होइन।’
_x000D_
_x000D_
अमेरिकाबाट दसैं बिदा मनाउन जन्मेहुर्केको देश नेपाल आइपुगेका प्रबल अघिल्लो सप्तान्त पाटनमा आफ्नो अनुभव सुनाउँदै थिए। नेपाली तन्नेरीहरुमाँझ उनले फेसन, फिल्म, सपना र यौनिकताबारे आफ्ना धारणा सुनाए।
_x000D_
_x000D_
हलिउड-बलिउडका सेलब्रेटीदेखि बाराक ओबामा पत्नी मिसेल ओबामासम्मलाई पहिरन संरचना बनाएर सबैको दिल जितेका यी तन्नेरीले जीवनमा सपनालाई सबैभन्दा महत्वपूर्ण ठान्दा रहेछन्। ‘सपनालाई सानो वा ठूलो नठान्नूस, त्यो जस्तोसुकै होस, पूरा गर्न मनदेखि लाग्नूस्’ उनी कँहीकतै गहिराइमा डुबेजस्तै भावमा प्रस्तुत भए ‘अरुको कुरा नसुन्नूस, अठोट पाल्नुस्।’
_x000D_
_x000D_
_x000D_
_x000D_
जीवनको गति, यति र लय सँधै एउटै हुँदैन। करिअरमा संघर्षको महत्व हुन्छ। परिश्रमको पसिनाले मान्छे कहिले अलिक बढी नै भिज्न सक्छ। हरेक अवस्थाले मान्छेलाई केही न केही सिकाईरहेको हुन्छ। हरेक व्यक्तिबाट मान्छेले केही न केही सिकिरहेको हुन्छ। यद्यपि आफ्नो जीवनमा सफलताका लागि आमाको भूमिका त्यत्तिकै स्मरणीय रहेको उनले बताए। भने, ‘म जहाँ छु, जे गरिरहेको छु। सफलता भन्नुहोस् या अरु केही, यसको श्रेय आमालाई दिन्छु।’
_x000D_
_x000D_
फेसन डिजाइनिङ प्रयोगशील अनुक्रम हो। पहिरनको शैली र शिल्पबारे संसारमा ठ्याक्कै एउटै मान्यता छैन। यसको वैविध्य र पहिचान केवल सृजनासँग जोडिएको हुन्छ। त्यसैले प्रबललाई लाग्छ, फेसन भनेको लुगा बनाउनु मात्र होइन, बरु त्यसमार्फत् कथा भन्नु हो। उनी ‘स्टोरी टेलिङ’लाई फेसन डिजाइनसँग जोड्न आग्रह गर्छन्। ‘मेरो डिजाइनमा सँधै महिला सशक्तीकरण हुन्छ, राजनीतिक कुरा गरिरहेको छैन तर, भविष्य महिलाकै हुन्छ। म 'वुमन पावर'मा विश्वास गर्छु’ उनले भने।
_x000D_
_x000D_
हलिउड, बलिउड हुँदै काठमाडौंसम्म गाँसिएको 'मी–टु मुभमेन्ट'लाई ग्लोबल फेसनले गम्भीरताका साथ हेरिरहेको बताउँदै उनले आफूले समानताका लागि फेसनमार्फत काम गरिरहेको बताए। नेपाली समाज र पुरुषले पनि महिलाका कुराहरु सुनोस् भन्नेमा उनको जोड छ। ‘समानता भनेको सधैं सुन्दर हुन्छ’ उनले भने, ‘नेपाली समाजले पनि यही कुरा बुझ्नुपर्छ।’
_x000D_
_x000D_
_x000D_
_x000D_
_x000D_
नेपाली कला, प्राकृतिक सौन्दर्य, सांस्कृतिक सम्पदा, हिमाल, पहाड जस्ता विविधताले आफूलाई लुगामा आकृति र रङ उतार्न प्रभावित पारेको अनुभव प्रबलसँग रहेछ। सोही क्रममा उनले नेसनल जियोग्राफीले थारु महिलामाथि खिचेको फोटो फिचरमाथि ‘मुटबड’ सिर्जना गरेको र हालैको ‘न्यूयोर्क फेसन सप्ताह’मा प्रस्तुत गरेको जानकारी दिए।
_x000D_
_x000D_
उनले भने, ‘ममा धेरै पक्षको प्रभाव छ। म यो स्वीकार्छु।’
_x000D_
_x000D_
स्कुल छँदैदेखि आफू अन्य केटाभन्दा भिन्न स्वभावको रहेको भन्दै प्रबलले आफ्ना पुराना दिन सम्झे। ‘मलाई याद छ फर्स्ट स्केचलाई लुगामा उतारेको। जुन आनन्द मलाई सेक्स गरेजस्तै भयो’ ठट्टा मिश्रित भावमा उनले सुनाए। आफू ‘गे’ भएको र आफ्नो यौनिकतामाथि गर्व रहेको पनि उनको दाबी सुनियो। भने, ‘म अहिले ह्याप्पी रिलेसनसिपमा छु।’
_x000D_
_x000D_
_x000D_
_x000D_
फोटो काठमाण्डूले आयोजना गरेको कार्यक्रममा वार्ताकारसँग त्यतिबेला प्रबल अलिक खुलेझैं देखिए जब उनलाई गुनासाहरुबारे सोधियो। उनले आफूमाथिका कतिपय गुनासालाई तर्कशील जवाफ पेश गरे। ‘तपाईंलाई महंगो डिजाइनर भनिन्छ नि’ भन्ने प्रश्नमा उनले भने, ‘यसबारे म गम्भीर छु।’
_x000D_
_x000D_
डिजाइनिङहरु महंगै भएकाले नेपालमा उनका सृजनाहरु कत्तिको व्यावसायिक होलान् भन्ने कोणमा पनि छलफल भयो। हुन पनि बियोन्सेले लगाएको उनको पहिरनको मूल्य डेढ लाख रुपैयाँभन्दा बढी पर्छ। आफ्ना डिजाइन नेपाली बजारमा ल्याउन चाहे पनि भन्सार महंगो भएकाले सरकारले सोच्नुपर्ने तर्क प्रबलको छ।
_x000D_
_x000D_
‘यो त मेरोभन्दा पनि सरकारको काम हो’ उनी फेरि मुस्कुराए, ‘यस्ता कुरामा बहस हुनुपर्छ।’
_x000D_
_x000D_
(सबै तस्बिर फेसबुक पेज काठमाडौं फोटोबाट लिइएको हो।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766152266.png)
-1764146706.png)
-1763721444.png)
