काठमाडौं– महिलाका अनुभव, संघर्ष तथा सामाजिक–राजनीतिक आन्दोलनमा उनीहरूको योगदान समेटिएको पुस्तक ‘महिला आन्दोलनको सहखोजी : सन्धान सङ्ग्रह’ को दोस्रो संस्करण सार्वजनिक भएको छ।
द स्टोरी किचेन र त्रिभुवन विश्वविद्यालय (त्रिवि) लैङ्गिक अध्ययन केन्द्रीय विभागको सहकार्यमा प्रकाशित पुस्तक मंगलबार कमलादीस्थित नेपाल प्रज्ञा प्रतिष्ठानमा आयोजित कार्यक्रममा सार्वजनिक गरिएको हो।
पुस्तकमा २५ जना फेलो तथा लेखकका अनुसन्धानमा आधारित आलेख समेटिएका छन्। दलित तथा आदिवासी जनजाति समुदायका अपाङ्गता भएका महिलाले भोग्ने बहुस्तरीय विभेददेखि लैङ्गिक तथा यौनिक अल्पसंख्यक समुदायका सवालसम्मका विषय पुस्तकमा समावेश छन्।
-1790691190.jpg)
पुस्तकको समीक्षा गर्दै त्रिवि पत्रकारिता तथा आमसञ्चार केन्द्रीय विभागका प्रमुख प्रा.डा. कुन्दन अर्यालले यसले नेपाली महिला आन्दोलनका वैकल्पिक विषयलाई बहसमा ल्याएको बताए। समाजशास्त्री डा. मीना पौडेलले पुस्तकलाई महिलाको वैकल्पिक इतिहास लेखनको प्रयासका रूपमा व्याख्या गरिन्।
द स्टोरी किचेनकी अध्यक्ष डा. जया लुईंटेलले महिलाका जीवनभोगाइ, संघर्ष र अनुभवबाट बनेको ज्ञानलाई प्राज्ञिक ज्ञानका रूपमा स्थापित गर्न आफूहरूले काम गरिरहेको बताइन्।
‘सन्धान’ द स्टोरी किचेनले सञ्चालन गरेको महिलावादी अनलाइन पोर्टल हो। संस्थाले सन् २०२२ देखि पत्रकार, लेखक तथा विद्यार्थीका लागि ‘सन्धान फेलोसिप’ सञ्चालन गर्दै आएको छ। यसअघि पहिलो र दोस्रो ब्याचका २१ जना फेलोका आलेख समेटिएको पहिलो सङ्ग्रह सन् २०२४ मा प्रकाशित भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790691190.jpg)
-1786602170.png)
