काठमाडौं– रोयल इन्फिल्डले नेपालमा हन्टर ३५० को नयाँ भेरियन्ट सार्वजनिक गरेको छ। कम्पनीले नयाँ ‘टार्म्याक ब्ल्याक’ भेरियन्टसँगै टप भेरियन्टमा ‘मुम्बई येलो’ र ‘मुनसट ह्वाइट’ गरी दुई नयाँ रंग थपेको हो।
नयाँ भेरियन्टमा अलोय ह्विल, डीजी–एनालग इन्स्ट्रुमेन्ट क्लस्टर, नयाँ राइडर इन्टरफेस तथा सिंगल च्यानल एबीएसलगायतका सुविधा छन्। हन्टर ३५० को सहज राइडिङ, चुस्त ह्यान्डलिङ र ‘प्योर मोटरसाइक्लिङ’ को मूल विशेषतालाई निरन्तरता दिइएको कम्पनीले जनाएको छ।
नेपालमा अघिल्लो वर्ष सार्वजनिक भएको हन्टर ३५० कम्प्याक्ट डिजाइन, निओ–रेट्रो लुक र सहज राइडिङ अनुभवका कारण नयाँ पुस्ताका राइडरमाझ लोकप्रिय हुँदै आएको कम्पनीको भनाइ छ।
टार्म्याक ब्ल्याकमा नयाँ भेरियन्ट
कम्पनीका अनुसार नयाँ भेरियन्ट दैनिक प्रयोगमा सहज र पहुँचयोग्य बनाउने उद्देश्यले ल्याइएको हो। यसमा हन्टरको मौलिक रोडस्टर डिजाइनलाई कायम राख्दै अलोय ह्विल, राउन्ड ह्यालोजन हेडलाम्प, डीजी–एनालग इन्स्ट्रुमेन्ट क्लस्टर, रोटरी स्विच गियर, स्टिच्ड सिट र स्पोर्टी ग्राब रेल राखिएको छ।
यसमा सिंगल च्यानल एबीएस र स्लिप एन्ड असिस्ट क्लच पनि रहेको छ। यसले गियर परिवर्तनलाई सहज बनाउने कम्पनीले जनाएको छ।
मुम्बई येलो र मुनसट ह्वाइट रंग थप
हन्टर ३५० को टप भेरियन्टमा थपिएका मुम्बई येलो र मुनसट ह्वाइट रंगले ग्राहकलाई आफ्नो रुची र शैलीअनुसार मोटरसाइकल छनोट गर्ने थप विकल्प दिने कम्पनीले जनाएको छ।
मुम्बई येलो मुम्बईको कला, चलचित्र र जीवन्त सहरी वातावरणबाट प्रेरित रंग रहेको कम्पनीको भनाइ छ। चम्किलो पहेँलो फिनिसले मोटरसाइकललाई आकर्षक र युवा लुक दिने बताइएको छ।
त्यस्तै, मुनसट ह्वाइटमा ‘ओरियन’ अर्थात् शिकारी नक्षत्रबाट प्रेरित ग्राफिक्स र आकाशीय तत्व प्रयोग गरिएको छ।
रोयल इन्फिल्डका प्रमुख वाणिज्य अधिकृत यदविन्दर सिंह गुलरियाले हन्टर ३५० नेपालमा नयाँ पुस्ताका राइडरको रोजाइ बन्दै गएको बताए । डिजाइन, चुस्त ह्यान्डलिङ र दैनिक प्रयोगमा सहजताका कारण यसको लोकप्रियता बढेको उनको भनाइ छ। नयाँ भेरियन्ट र रंगले थप राइडरलाई हन्टर ३५० रोज्ने अवसर दिने उनले बताए।
नेपालमा रोयल इन्फिल्डको आधिकारिक वितरक अल्फा अटोमोटिभका निर्देशक मेघराज पौडेलले पनि हन्टर ३५० ले नेपाली राइडरमाझ राम्रो सम्बन्ध बनाउन सफल भएको बताए। नयाँ भेरियन्ट र रंगले ग्राहकका लागि थप विकल्प सिर्जना गर्ने र यसले हन्टर ३५० को बजार विस्तारमा सहयोग पुग्ने उनको भनाइ छ।
मूल्य र उपलब्धता
रोयल इन्फिल्ड हन्टर ३५० को नयाँ टार्म्याक ब्ल्याक भेरियन्टको मूल्य ४ लाख ८७ हजार रुपैयाँ तोकिएको छ। त्यस्तै, मुम्बई येलो र मुनसट ह्वाइट रंगमा उपलब्ध टप भेरियन्टको मूल्य ५ लाख ११ हजार रुपैयाँ रहेको छ।
नयाँ भेरियन्ट तथा रंगका हन्टर ३५० को बुकिङ तथा बिक्री १६ सेप्टेम्बरदेखि नेपालभर रहेका अधिकृत रोयल इन्फिल्ड डिलरमार्फत सुरु भएको कम्पनीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791454111.jpeg)
-1791448938.png)
-1786602170.png)
-1791388337.png)
