काठमाडौं– अमेरिकाले भिजिट भिसाका लागि धरौटी राख्नुपर्ने नियम लागू गरेको पहिलो महिनामा जम्मा २७ जना नेपालीले भिजिट भिसा पाएका छन्।
नयाँ नियम लागू भएको पहिलो महिना अर्थात् फेब्रुअरी २०२६ मा उनीहरूले अमेरिकाको भिजिट भिसा पाएका हुन्।
अमेरिकी विदेश मन्त्रालयले सार्वजनिक गरेको तथ्यांकअनुसार उक्त महिनामा एक जनालाई व्यापारिक प्रयोजनका लागि बी–१ भिसा र २६ जनालाई पर्यटकीय तथा व्यापारिक प्रयोजनका लागि बी–१/बी–२ भिसा जारी गरिएको थियो।
तीमध्ये काठमाडौंस्थित अमेरिकी दूतावासबाट १७ वटा बी–१/बी–२ भिसा जारी भएका थिए भने बाँकी भिसा अन्य मुलुकमा रहेका अमेरिकी नियोगबाट प्रदान गरिएको थियो। नेपाली नागरिकका लागि भिजिट भिसामा धरौटी राख्नुपर्ने नियम २१ जनवरी २०२६ देखि लागू भएको थियो।
नियम लागू हुनुअघि भने अमेरिकी भिजिट भिसा पाउने नेपालीको संख्या उल्लेख्य थियो। जनवरी २०२६ मा ८०९ जना, डिसेम्बर २०२५ मा ७६५ जना, नोभेम्बरमा ७७४ जना र अक्टोबरमा १ हजार ६ जना नेपालीले भिजिट भिसा पाएका थिए।
यी चार महिनाको औसत करिब ८३९ जना हुन्छ। त्यसको तुलनामा नियम लागू भएपछि फेब्रुअरीमा भिजिट भिसा पाउनेको संख्या ९६.७८ प्रतिशतले घटेको देखिन्छ।
फेब्रुअरी २०२६ मा अमेरिकी विदेश मन्त्रालयले नेपाली नागरिकलाई विभिन्न श्रेणीका अन्य गैरआप्रवासी भिसासमेत जारी गरेको थियो। कूटनीतिक तथा सरकारी प्रयोजनका लागि जानेमध्ये १२ जनाले ए–२ र एक जनाले ए–३ भिसा पाएका थिए।
ट्रान्जिटका लागि दुई जनालाई सी–१ र दुई जनालाई सी–३ भिसा जारी गरिएको थियो। विमान तथा पानीजहाजका चालकदलका सदस्यका लागि दिइने सी–१/डी भिसा २२ जनाले प्राप्त गरेका थिए।
त्यस्तै, अध्ययनका लागि १८ जनाले एफ–१ विद्यार्थी भिसा र उनीहरूका आश्रित परिवारका २३ जनाले एफ–२ भिसा पाएका थिए। व्यावसायिक अध्ययनका लागि दिइने एम–१ भिसा भने एक जनालाई जारी गरिएको थियो।
अमेरिकाले यो धरौटी कार्यक्रम एक वर्षे परीक्षणका रूपमा अगस्ट २०२५ मा सुरु गरेको थियो। सुरुमा धरौटी रकम ५ हजार, १० हजार र १५ हजार अमेरिकी डलर तोकिएको थियो। ३ अगस्ट २०२६ देखि भने धरौटी रकम बढाएर १० हजार, १५ हजार र २० हजार अमेरिकी डलर पुर्याइएको छ।
तोकिएको अवधिभित्र अमेरिका छाडेमा धरौटी रकम फिर्ता पाइने व्यवस्था छ। तर‚ तोकिएको अवधिभन्दा बढी बसेमा, भिसाको अवधि थप गर्न निवेदन दिएमा वा अमेरिका पुगेपछि ‘एसाइलम’ अर्थात् शरणका लागि आवेदन दिएमा धरौटी रकम जफत हुने व्यवस्था गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
