काठमाडौँ– संविधान संशोधनका लागि बहस पत्र तयार गर्न गठित कार्यदलले जेन जेड प्रतिनिधिहरूसँग आज हुने छलफललाई लिएर देखिएका केही अन्योल र असन्तुष्टिबीच सकारात्मक संवादमा सहभागी हुन आग्रह गरेको छ ।
कार्यदलका संयोजक असिम शाहले सबै सरोकारवालाको सुझाव समेटेर बहस पत्रलाई पूर्णता दिनु नै कार्यदलको मुख्य उद्देश्य रहेको स्पष्ट पार्दै सोहीअनुसार जेन जेड प्रतिनिधिहरूलाई छलफलका लागि आमन्त्रण गरिएको बताए ।
आज साँझ ५ बजेका लागि तय गरिएको छलफलअघि केही जेन जेड प्रतिनिधिहरूले अघिल्लो सरकारसँग भएका सहमतिका विषयलाई लिएर असन्तुष्टि जनाउँदै बहिष्कारको संकेत गरेपछि संयोजक शाहले त्यसबारे वास्तविकता स्पष्ट पारे ।
उनका अनुसार अघिल्लो सरकारसँग भएका सहमतिहरू कार्यान्वयनकै चरणमा रहेका छन् भने जेन जेड परिषद् निर्माणको प्रक्रिया पनि अन्तिम चरणमा पुगेको छ । संविधान संशोधनका लागि सुझाव संकलन गर्ने विशेष उद्देश्यसहित आयोजना गरिएको यो छलफललाई अन्य विषयसँग जोडेर नहेर्न उनले आग्रह गरे ।
कार्यदलले जेन जेड प्रतिनिधिहरूबाट मौखिक र लिखित दुवै माध्यमबाट सुझाव संकलन गर्ने गरी समय व्यवस्थापन गरिएको जनाएको छ । बोल्नका लागि पर्याप्त समय नदिइएको भन्ने जस्ता भ्रमपूर्ण प्रचार भइरहेकोप्रति संकेत गर्दै संयोजक शाहले कसैको पनि आवाजलाई बेवास्ता नगरिने विश्वास दिलाए ।
उनले राजनीतिक विवाद वा भ्रमको पछि नलागी आफ्नो अधिकार र दायित्वलाई ध्यानमा राखेर छलफलमा सक्रिय सहभागिता जनाउन निमन्त्रित सबै जेन जेड प्रतिनिधिहरूलाई अनुरोध गरे ।
कार्यदलले गत चैत २५ गतेदेखि विभिन्न सरोकारवालासँग चरणबद्ध छलफल सुरु गरेको थियो । यसक्रममा संविधानविद्, पूर्वप्रशासक तथा सञ्चार क्षेत्रका विज्ञहरूसँग परामर्श सम्पन्न भइसकेको जनाइएको छ । आगामी दिनमा अन्य सरोकारवालासँग पनि निरन्तर छलफल गरिने कार्यतालिका रहेको छ ।
सरकारको १०० बुँदे कार्यसूचीअनुसार शासकीय स्वरूप, निर्वाचन प्रणाली र संघीयता लगायतका विषयमा साझा धारणा निर्माण गर्ने उद्देश्यसहित यो प्रक्रिया अघि बढाइएको हो ।
विभिन्न राजनीतिक दलका प्रतिनिधि सम्मिलित कार्यदलले संविधानमा सबै वर्ग र समुदायको अपनत्व सुनिश्चित गर्न जेन जेडहरूको अर्थपूर्ण सहभागिता आवश्यक रहेकोमा जोड दिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
