काठमाडौँ – नेपाल कम्युनिष्ट पार्टी (एमाले) की सांसद रामकुमारी झाँक्रीले सरकारले निजी क्षेत्रलाई सहज वातावरण दिनुको सट्टा भय र असहजता सिर्जना गर्ने नीति अवलम्बन गरेको आरोप लगाएकी छन् ।
राष्ट्रिय सभाको बिहीबारको बैठकमा बोल्दै उनले सरकारले निजी क्षेत्रप्रति कठोर व्यवहार गर्दै काम गर्ने वातावरण कमजोर बनाएको टिप्पणी गरिन् । उनका अनुसार पहिले नियन्त्रण वा रोकटोक गर्ने र त्यसपछि मात्र सुन्ने प्रवृत्तिले निजी क्षेत्रभित्र त्रासको अवस्था सिर्जना भएको छ ।
झाँक्रीले सरकारको आगामी आर्थिक वर्षको नीति तथा कार्यक्रम पुरानै योजनाको पुनरावृत्ति जस्तो देखिएको भन्दै यसले अपेक्षित परिवर्तन ल्याउन नसक्ने बताइन् । उनले जनताबाट प्राप्त ठूलो जनमतको अवसरलाई प्रभावकारी रूपमा उपयोग गर्न नसकिएको पनि टिप्पणी गरिन् ।
उनका अनुसार सरकारले सुशासन र सेवा प्रवाहलाई प्राथमिकतामा राखे पनि केवल नागरिकता, राहदानी वा जग्गाधनी प्रमाणपत्र वितरणलाई मात्र उपलब्धिका रूपमा प्रस्तुत गर्नु पर्याप्त होइन । उनले वास्तविक विकासका लागि प्रभावकारी सेवा प्रवाह र परिणाममुखी कार्यान्वयन आवश्यक रहेको धारणा राखिन् ।
सांसद झाँक्रीले सबै वर्ग, समुदाय र नागरिकका मौलिक हक तथा मानव अधिकारको सुनिश्चितता राज्यको प्राथमिक दायित्व हुनुपर्नेमा जोड दिँदै त्यसतर्फ सरकार गम्भीर हुनुपर्ने आग्रह पनि गरिन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
