काठमाडौं – विपक्षीले तीनपटकसम्म अवरोध गरेपछि अब प्रतिनिधिसभाको बैठक भोलि बिहीबारका लागि सारिएको छ ।
सरकारको नीति तथा कार्यक्रमको छलफलको प्रस्ताव प्रस्तुत गर्न प्रधानमन्त्री वालेन्द्र शाह (बालेन) नआएपछि बुधबार बैठकमा अवरोध भएको हो ।
तेस्रो प्रयासमा पनि बैठक बस्न नसकेपछि सभामुख डीपी अर्यालले सबै कार्यसूची हटाएर बिहीबार ११ बजेको लागि बैठक बोलाएका छन् ।
नीति तथा कार्यक्रममा संशोधनमा छलफलमा भाग लिन र प्रधानमन्त्रीले जवाफ दिन ३१ वैशाखमा बैठक बस्ने सभामुखले बताए ।
‘सम्माननीय राष्ट्रपतिको सम्बोधनमा उल्लेखित आर्थिक वर्ष २०८३/०८४ को लागि नेपाल सरकारको वार्षिक नीति तथा कार्यक्रममाथिको संशोधन प्रस्तुत गर्न, छलफलमा भाग लिन र सम्माननीय प्रधानमन्त्रीबाट जवाफ दिनका लागि समेत प्रतिनिधिसभा नियमावली २०७९ को नियम ३८ को उपनियम १ बमोजिम २०८३ साल वैशाख ३१ गतेको दिन तोकेको जानकारी गराउँदछु,’ सभामुख अर्यालले भने ।
प्रधानमन्त्रीको तर्फबाट अर्थमन्त्रीले नीति कार्यक्रमको छलफलमाथिको प्रस्ताव प्रस्तुत गर्न विपक्षी तयार भएका थिए । प्रधानमन्त्री उपस्थित हुने रुलिङ गर्न माग गर्दै विपक्षीले अवरोध गरेपछि बैठक बिहीबारका लागि सारिएको हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
