काठमाडौँ– प्रतिनिधि सभा प्रत्यक्ष निर्वाचनमा पर्साका १०७ उम्मेदवारमध्ये ९५ जनाको चुनावी जमानत जफत भएको छ। उम्मेदवारहरूले कुल मतको १० प्रतिशत भन्दा कम मत पाएका कारण उनीहरूको जमानत फिर्ता भएन।
जमानत गुमाउनेमा ठूला मधेशी दलका उम्मेदवारसहित नेकपा, राप्रपा, जसपा नेपाल, जनमत, आम जनता पार्टी, प्रगतिशील लोकतान्त्रिक पार्टी, श्रम संस्कृति पार्टी, उज्यालो नेपाल पार्टी र नेपाल मजदुर किसान पार्टीका उम्मेदवारहरू पनि छन्।
जिल्लामा रास्वपा, नेकपा एमाले र नेपाली काँग्रेसबाट उम्मेदवार बनेकाहरू बाहेक अन्य सबै पार्टीका उम्मेदवारको जमानत जफत भएको निर्वाचन कार्यालयले जनाएको छ। अधिकांश मत रास्वपाका उम्मेदवारतर्फ गएपछि अन्य दलको मत प्रतिशत निकै घटेको हो।
निर्वाचन क्षेत्र अनुसार पर्सा १ मा २३ उम्मेदवारमध्ये २० को जमानत जफत भएको छ। यहाँ ८९ हजार ६३८ मतदाता रहेकोमा ६१ हजार ३०६ मत खसेको थियो। पर्सा २ मा ३१ उम्मेदवारमध्ये २८ को जमानत जफत भएको र ९५ हजार १२० मतदातामध्ये ६५ हजार ८७८ मत खसेको छ।
पर्सा ३ मा २३ उम्मेदवारमध्ये २० को जमानत जफत भएको छ, कुल ९६ हजार ५४२ मतदाता रहेको क्षेत्रमा ६७ हजार ११३ मत खसेको थियो। पर्सा ४ मा पनि २३ उम्मेदवारमध्ये २० को जमानत जफत भएको निर्वाचन अधिकृत नूतन झाले जानकारी दिइन्। यहाँ ९५ हजार २१३ मतदातामध्ये ६४ हजार ९६७ मत खसेको थियो।
चारै निर्वाचन क्षेत्रमा रास्वपा, नेकपा एमाले र नेपाली काँग्रेसका उम्मेदवार बाहेक अन्य सबैले जमानत गुमाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778491729.jpg)
-1764146706.png)
