धनगढी- चुनावताका मतदातासामु जनताको जीवनस्तरमा सुधार ल्याउने वाचा गरे। विकासको सपना बाँडे। जनताको सुखदुःखमा साथ दिने कसम खाए। मतदाताले विश्वास गरे र उनलाई वडा सदस्यमा निर्वाचित गरे।
_x000D_
_x000D_
उनै जनप्रतिनिधि धनीराम चौधरी अहिले रिक्साचालक बनेका छन्। ४२ वर्षीय उनी स्थानीय चुनावमा लम्कीचुहा नगरपालिका वडा नम्बर ७ बाट वडा सदस्यमा निर्वाचित भएका थिए।
_x000D_
_x000D_
तर, चुनावताका भनेको जस्तो सजिलो रहेनछ। आर्थिक अवस्था कमजोर भएका जनप्रतिनिधिलाई त चाहेर पनि सधैं जनताको सेवामा लाग्न कठिनाइ छ। त्यसैले अहिले उनी अटोरिक्सा चालक बनेका छन्।
_x000D_
_x000D_
भन्छन्, ‘चुनावताका जनताको बीचमा धेरै राम्रा काम गर्ने प्रतिबद्धता त गरियो तर काम गर्न सजिलो रहेनछ। म जस्ता आर्थिक अवस्था निकै कमजोर भएका जनप्रतिनिधिलाई त झन् गाह्रो।’ उनी अहिले अटोरिक्सा चलाएर नै परिवारको गुजारा चलाइरहेका छन्।
_x000D_
_x000D_
धनीराम तत्कालीन फोरम लोकतान्त्रिकबाट उम्मेदवार बनेर वडा सदस्य निर्वाचित भएका हुन्। आर्थिक अवस्था कमजोर भएकै कारण गत बैसाखमा ६ लाख ऋण लिएर उनले अटोरिक्सा किने। तर, जनप्रतिनिधिले यस्तो काम गर्नुहुन्न भन्ने मान्यताले आफूलाई निकै असहज भएको उनी बताउँछन्। ‘सुरुमा त गाउँका मान्छेले जनप्रतिनिधि भएर रिक्सा चलाएको भनेर कुरा समेत काटे,’ उनी भन्छन्, ‘त्यतिबेला दुःख पनि लाग्यो, तर पछि अरुका कुरामा ध्यान दिन छाडेँ।’
_x000D_
_x000D_
जनप्रतिनिधि हुँदैमा परिवारको लालनपालन भइहाल्ने भन्ने होइन। यही बोध गरेर आफूले अटोरिक्सा चलाउने निर्णय गरेको उनी बताउँछन्। अटोरिक्सा चलाउन थालेपछि भने उनले घर र छोराछोरीको पढाइ खर्चमा सहज भएको छ।
_x000D_
_x000D_
धनीरामले कमाइको केही प्रतिशत बचत पनि गरिरहेका छन्। भन्छन्, ‘दैनिक १ हजारदेखि १५ सय रुपैयाँसम्म कमाइ हुन्छ। दैनिक ५ सय रुपैयाँ किस्ताका लागि बचत गर्ने गरेको छु।’
_x000D_
_x000D_
६ महिनादेखि अटोरिक्सा चलाइरहेका वडा सदस्य धनीरामप्रति हेर्ने गाउँको दृष्टिकोण भने अहिले बदलिएको छ। अरु जनप्रतिनिधि पनि उनको कामको प्रशंसा गर्छन्। ‘अहिले अरु जनप्रतिनिधि मेरो कामको तारिफ गर्छन्। काम सानो ठूलो हुन्न भन्ने कुराले उनीहरू उत्साहित भएका छन्,’ उनी भन्छन्, ‘मलाई लागेको छ कि मैले राम्रो काम गरेको छु।’
_x000D_
_x000D_
जनप्रतिनिधि भएकाले उनले वडाका काममा पनि ध्यान दिनैपर्ने हुन्छ। ‘वडामा बैठक, छलफल तथा अरु समस्या आउँदा उपस्थित हुनै पर्छ’, उनी भन्छन्, ‘त्यसैले सधैं रिक्सा चलाउन पाउँदिन।’
_x000D_
_x000D_
धनीरामले कक्षा ८ सम्म पढेका छन्। आर्थिक कमजोरीका कारण आफूले थप पढ्न नसकेको उनी बताउँछन्। उनले चुनावताका लिएको १ लाख ५० हजार ऋण अझै तिर्न सकेका छैनन्।
_x000D_
_x000D_
उनको ठूलो परिवार छ। घरमा श्रीमती, सासू-ससुरा र चार जना छोराछोरी छन्। आर्थिक अभावका कारण जेठी छोरीले ११ नपढ्दै पढाइ छाडिन्। ‘अटोरिक्सा चलाउन थालेपछि अहिले केही सहज त भएको छ,’ तर मासिक १५ हजार किस्ता र ब्याज पनि बुझाउनुपर्छ,’ उनले दुखेसो पोखे।
_x000D_
_x000D_
वडा सदस्य धनीराम स्थानीय सरकारले जनताको आयस्तर वृद्धि हुने कार्यक्रम सञ्चालनमा ध्यान दिनुपर्ने बताउँछन्। ‘जीविकोपार्जनका लागि नमुनाको रुपमा काम गर्न चाहनेलाई सरकारले प्याकेजमै कार्यक्रमको व्यवस्था गर्नुपर्छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1762782210.gif)
