अटवा– राष्ट्रिय स्वतन्त्र पार्टीका उपसभापति तथा सांसद डा स्वर्णिम वाग्लेले आउँदो चुनावपछि रास्वपालाई देशकै सबैभन्दा ठूलो र निर्णायक पार्टी बनाउन आफुहरुले भरमग्दुर प्रयास गरिरहेको जनाएका छन्।
झन्डै एक साता लामो क्यानडा भ्रमणका क्रममा राजधानी अटवामा नेप्लिज क्यानडियन एसोसियशन अफ अटवाद्वारा आयोजित एक अन्तरक्रियालाई सम्बोधनगर्दै डा वाग्लेले कांग्रेस र एमालेले नियामक निकाय, अख्तियार र न्यायालयमा समेत दलीय आधारमा भागबण्डा गरेर 'स्टेट क्याप्चर' गरेको आरोप लगाए। नेपाल अहिले उदार लोकतन्त्रबाट अनुदार लोकतन्त्र हुँदै लुटतन्त्र (क्लेप्टोक्रेसी) मा परिणत भएको उनले बताए।
नेपालमा सहकारीहरुबाट झन्डै ८,८०० करोड रुपियाँ अपचलन भएकोमा गोर्खा मिडियामा ६५ करोड रुपियाँ सहकारीको रकम गएको देखिन्छ। सांसद सूर्य थापा संयोजक रहेको संसदीय छानबिन समितिले प्रचलित कानुन अनुसार गर्नु भनेर सिफारिस गरेको छ। तर सरकारले पाँच जिल्लाका तीन तहका अदालतहरुमा रवि विरुद्ध मुद्दा दायर गरी प्रतिशोध लिइरहेको उनले बताए। उनले रविलाई अन्यायपूर्वक थुनामा राखिएको भनी झन्डै ३५ लाख नेपालीले हस्ताक्षर गरिसकेको र दशैं-तिहार-छठसम्म ५० लाख नाघ्ने आफूहरुले अपेक्षा गरेको बताए । उनले जनता जाग्ने हो भने अहिलेको गडबडी धेरै समय नटिक्ने पनि जनाए ।
सांसद वाग्लेले आफ्नो पार्टी प्रदेशगत संरचना नभई प्रदेश सभा हटाउनु पर्ने पक्षमा रहेको जानकारी दिए। "देशभरि ८८४ जना सांसदहरु रहेकोमा प्रदेशहरुमा ५५० जना सांसदहरु छन्। यत्रो संरचना राज्यले धान्न सक्दैन। छरितो प्रदेश सरकार बनाएर विधायकी जिम्मा गाउँ पालिका तथा नगर पालिकाका जननिर्वाचित प्रतिनिधिहरुलाई दिन सकिन्छ," उनले भने।
नेपालमा भ्रस्टाचार बढ्नुमा खर्चिलो चुनाव प्रणाली पनि एउटा कारण रहेको बताउँदै अब त चुनावको लागि टिकट पाउन पनि आफ्नै पार्टीका नेतालाई पैसा ख्वाउनु पर्ने स्थिति आएको उनले बताए। यस्तो स्थितिको अन्त्य गर्न आफ्नो पार्टीले रुपन्देहीको उपचुनावका लागि उम्मेद्वार छनोट गर्न 'प्राइमरी प्रणाली' को अभ्यास गरिरहेको सांसद वाग्लेले बताए। उनले नेपालको राजनीतिलाई सफा गर्न सही नीति, सफा नियत र क्षमता भएको वर्ग अघि सर्नु पर्ने धारणा व्यक्त गरे।
'एनआरएनहरुले नेपालमै काम गर्ने वातावरण बनाउनु पर्ने'
डा वाग्लेले नेपालजस्तो मुलुकका लागि डायस्पोरा एक प्रमुख श्रोतको रुपमा रहेको पनि बताए। "हाम्रो समाजमा शिफ्ट आएको छ, तर चरम निराशा छ। मध्यम वर्गमा आफ्ना आकांक्षा पुरा गर्न विदेश नै जानु पर्छ भन्ने धारणा बन्दै गएको छ। तर यसलाई पलायनको रुपमा नहेरी संसारभरि रहेका नेपालीसंग रहेको सीप, श्रोत र अनुभवलाई नेपालको विकासमा उपयोग गर्नु पर्छ," उनले भने। एनआरएनहरुलाई देशका केही सम्मानित र संवेदनशील पद बाहेक अरु पदमा बसेर काम गर्न पाउने वातावरण बनाउनु पर्ने पनि उनले बताए।
यस अघि सांसद वाग्लेले क्यानडाको क्यालगरीमा आयोजित एसोसियसन अफ नेप्लिज इन अमेरिकाज (एएनए) को अन्तरराष्ट्रिय सम्मेलनलाई प्रमुख अतिथिको रुपमा सम्बोधन गरेका थिए। त्यस्तै उनले बुधबार फेडरेशन अफ क्यानडा-नेपाल च्याम्बर अफ कमर्शद्वारा मिसिसागामा आयोजित एक अन्तरक्रियामा नेपाल तथा क्यानडाबीच व्यापार, पर्यटन तथा लगानी अभिवृद्धि गर्न जोड दिएका थिए। उक्त अन्तरक्रियामा ग्रेटर टोरन्टो क्षेत्रका क्यानाडाली सांसदहरु काइल सीव्याक, ड्यान मिज तथा अमरजीत गिल पनि सहभागी थिए l डा वाग्लेले अटवामा तनहुँ समाज क्यानडाका सदस्य तथा पदाधिकारीहरुलाई भेट्नुका साथै अन्य संघसंस्थाका कार्यक्रममा पनि सहभागी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
