बाल यौन शोषण नेटवर्क चलाएको अभियोगमा अमेरिकामा नेपाली युवा पक्राउ

समाचार

नेपाल लाइभ शुक्रबार, वैशाख १९, २०८२ २२:०४

अमेरिका– विश्वव्यापी बाल यौन शोषण नेटवर्क संचालन गरेको अभियोगमा नेपाली युवा अमेरिकामा पक्राउ परेका छन् । नर्थ क्यारोलिना राज्य निवासी २० वर्षीय प्रशन नेपाल अनलाइन सञ्जालको रुपमा विश्वव्यापी बाल यौन शोषण नेटवर्क चलाएको अभियोगमा गतसाता पक्राउ परेका हुन् ।

उनीविरुद्ध अमेरिकामा हालसम्मकै जघन्य अनलाइन बाल शोषण उद्यम गरेको अभियोगमा युनाइटेड स्टेट डिस्ट्रिक कोर्ट, डिस्ट्रिक अफ कोलम्बियामा मुद्दा चलाइएको छ । मुद्दा नर्थ क्यारोलिनाबाट वासिङ्टन डिसीमा स्थानान्तरण गरिएको थियो ।

नेपालसँगै २१ वर्षीय लियोनिडास वारागियानिसलाई पनि पक्राउ गरिएको छ । वारागियासिन कुन देशको नागरिक भन्ने खुलाइएको छैन । उनीहरुको अभियोग प्रमाणित भएमा आजीवन काराबास हुन सक्ने डिपार्टमेन्ट अफ जस्टिसले जनाएको छ ।

नेपाल र वारागियानिसले अनलाइनमा कमजोर बालबालिकाहरुलाई लक्षित गर्दै उनीहरुलाई उक्साएर र धम्क्याएर अश्लील सामग्रीहरु उत्पादन गर्न बाध्य पारेको र ती सामग्रीमार्फत ८ जना नाबालिगको शोषण गरेको अभियोग लगाइएको छ ।

मुद्दामा लगाइएका आरोपहरु विचलित पार्ने मात्र नभई हरेक अभिभावकको लागि दुःस्वप्नसमेत रहेको डिस्ट्रिक्ट अफ कोलम्बियाका यूएस एटोर्नी एडवर्ड आर मार्टिन जुनियरले अमेरिकी संचारमाध्यमहरुसँग बताएका छन् ।

‘७६४’ भनेर चिनिने सञ्जालमा सन् २०२० को अन्त्यदेखि २०२५ को सुरुसम्म अश्लील सामग्रीहरु राखेको र नेपालले ७६४ भित्र एउटा मुख्य उपसमूहको नेतृत्व गरेको अभियोग पत्रमा उल्लेख छ ।

अनुसन्धानको क्रममा सञ्जाल संचालनका लागि इन्क्रिप्टेड मेसेजिङ एपहरु प्रयोग गरिएको, उनीहरुले बाल यौन दुर्व्यवहार सामग्रीको उत्पादन र वितरणमा निर्देशन दिएको र भागसमेत लिएको पाइएको प्रहरीको दाबी छ । स्थानीय समयअनुसार यसै साताको मंगलबार अदालतमा नेपालले ७६४ नेटवर्क आफ्नो टोलीले सिर्जना गरेको र अझै पनि नेटवर्क नियन्त्रण गरिरहेको स्वीकार गरिसकेका छन् । अदालतमा नेपालका आमा, बुबा, एक दिदी र कान्छो भाइसमेत सहभागी थिए ।

मार्च ३ मा बलात्कार आरोपमा दुई नेपाली विद्यार्थी पक्राउ परेका थिए । पक्राउ पर्नेमा १९ वर्षीय सुजन तामाङ र २० वर्षीय दीपक फुयााल हुन् । मिनिसोटा राज्यको सेन्ट क्लाउड स्टेट युनिभर्सिटीमा अध्ययरत तामाङ र फुयाँलमाथि सन् २०२४, नोभेम्बर १ राति मिनेसोटाको सेन्ट क्लाउडको फस्ट एभेन्‍यु साउथको युनिभर्सिटी छात्राबासको कोठामा आफूसFगै लगेर एक महिला विद्यार्थीलाई बलात्कार गरेको आरोप लगाइएको थियो ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

अष्ट्रेलियामा आम निर्वाचनका लागि मतदान जारी

नेपालमा एक महिनामा भित्रिए एक लाख १६ हजार विदेशी पर्यटक

पोखरीमा डुबेर दाजुभाइको मृत्यु