काठमाडौं– नेपाली राष्ट्रिय टिमका पूर्वकप्तान अनिल गुरुङ राष्ट्रिय लिग च्याम्पियन थ्रीस्टार क्लबमा आवद्ध भएका छन्। अनिलले असोज १३ गते सुरु हुने सहिद स्मारक 'ए' डिभिजन लिगका लागि थ्रीस्टारसँग सम्झौता गरेका हुन्।
_x000D__x000D_
अनिल यसअघि ७ पटकको ए डिभिजन लिग च्याम्पियन मनाङ मस्याङ्दी क्लबमा आबद्ध थिए। यो सिजन मनाङसँग सम्झौता नगरेका अनिल लिग सुरु हुन १० दिन बाँकी छदा थ्रीस्टारमा आवद्ध भएका हुन्। उनी दोस्रो पटक थ्रीस्टारमा आबद्ध भएका हुन्।
_x000D__x000D_
अनिलले सन् २०१२ देखि मनाङ मर्स्याङ्दी क्लबबाट निरन्तर फुटबल खेलेका थिए। मनाङको कप्तानी समेत गरेका उनले ब्रिगेड ब्वाइज क्लबबाट पहिलो पटक ए डिभिजन लिग खेलेका थिए। त्यसपछि उनी थ्रीस्टार हुँदै न्युरोड टिममा पनि आबद्ध भएका थिए। न्युरोड टिमबाट उनी मनाङमा पुगेका थिए।
_x000D__x000D_
अनिलको फुटबल करिअर १३ वर्षको उमेरमा पोखराको सहारा क्लबबाट सुरु भएको थियो।
_x000D__x000D_
बेलायतको चेल्सी रिजर्ब र वोकिङ क्लबमा ट्रायल समेत दिएका अनिल भारतको आइ लिग क्लबमा पनि आबद्ध थिए। उनी बेलायतमा ट्रायल दिने पहिलो नेपाली फुटबलर हुन्। अनिल सन् २००९ मा आइ लिग क्लब सिलोङ लाजोङमा ६३ लाख रुपैयाँमा ३ वर्षका लागि अनुबन्धित भएका थिए।
_x000D__x000D_
२००८ मा उनले पाकिस्तान विरुद्ध पहिलो अन्तर्राष्ट्रिय गोल गरेका थिए। उनले सोही वर्ष अफगानिस्तान विरुद्ध पनि गोल गरे। पछिल्लो पटक सन् २०१३ मा उनले साफ च्याम्पियनसिपमा गोल गरेका थिए। दशरथ रंगशालामा भएको खेलमा अनिलले भारत विरुद्ध गोल गरेर नेपाललाई अग्रता दिलाएका थिए।
_x000D__x000D_
अनिल गुरुङले सन् २००७ को अक्टोबरमा ओमान विरुद्ध पहिलो पटक राष्ट्रिय टिमको जर्सी लगाउने अवसर पाएका थिए। राष्ट्रिय टिममा ‘डेब्यू’ गरेपछि अनिलले लगातार १० वर्ष नेपाली फुटबल टिमको अग्रपंक्ति सम्हाले।
_x000D__x000D_
१० वर्षमा ९ अन्तर्राष्ट्रिय गोल गरेका अनिलले गत कार्तिकमा नेपालका लागि अन्तिम खेलेका थिए। एन्फा कम्प्लेक्स सातदोबाटोमा एसिया कप छनोटअन्तर्गत फिलिपिन्स विरुद्ध खेलेपछि उनले अन्तर्राष्ट्रिय खेल जीवनबाट संन्यास लिएका थिए। फिलिपिन्स विरुद्ध नेपाली जर्सीमा अन्तिम खेल खेलेका अनिलले ५०औं अन्तर्राष्ट्रिय खेलको कोशेढुंगा पार गरेर संन्यास लिएका थिए।
_x000D__x000D_
२०७२ मंसिरमा अनिलले पहिलो पटक राष्ट्रिय कप्तानको जिम्मेवारी पाएका थिए। साफ च्याम्पियनसिपका लागि घोषणा गरिएको टिममा तत्कालीन प्रशिक्षक प्याट्रिक ओसेम्सले उनलाई कप्तानको जिम्मेवारी दिएका थिए।
_x000D__x000D_
क्लब फुटबलमा थ्रीस्टारमा फेरि फर्किएका अनिलसँग सम्झौता गरेको क्लबले बिहीबार सार्वजनिक गरेको हो। थ्रीस्टारमा अनिलसँगै युवा फरवार्ड विमल घर्तीमगर र सुनील बल पनि हुनेछन्। यस्तै मिडफिल्डर रुपेश केसी, डिफेन्डर अनन्त तामाङ र गोलकिपर एलन न्यौपाने पनि क्लबमा छन्।
_x000D__x000D_
ए डिभिजन लिगमा थ्रीस्टारले पहिलो खेल असोज १५ हुने फ्रेन्ड्स क्लबसँग खेल्नेछ।
_x000D__x000D_
लिगमा १४ ’ए’ डिभिजन क्लबहरू थ्री स्टार, मनाङ मस्याङ्दी, नेपाल पुलिस, एपिएफ, आर्मी, जावलाखेल युथ क्लब, फ्रेन्ड्स क्लब, सङ्कटा, मछिन्द्र क्लब, सरस्वती युथ क्लब, च्यासल युथ क्लब, न्युरोड टिम (एनआरटी) ,ब्रिगेड ब्वाइज र हिमालयन शेर्पा क्लबले खेल्नेछन् । राउण्ड रोविन लिगको आधारमा हुने प्रतियोगितामा कुल ९१ खेल हुनेछन्। लिगको विजेताले रु ५० लाख, उपविजेताले रु ३५ लाख, तेस्रोले रु २५ लाख पाउने छन्।
_x000D__x000D_
विसं २०७० यता पहिलो पटक ‘ए’ डिभिजन लिग हुन लागेको हो।
_x000D_
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।