काठमाडौं- नेपाल प्रहरीको केन्द्रीय अनुसन्धान ब्यूरो (सीआईबी)ले चौधरी समूहका एक सदस्य अरुण चौधरीलाई अनुसन्धानका लागि पक्राउ गरेसँगै बाँसबारी छाला जुत्ता कारखानाको जग्गा विवाद पुन: सतहमा आएको छ।
३७ वर्षदेखि चौधरी समूहले मिचेर चलाइरहेको १० रोपनी जग्गामा सीआईबीले पछिल्लो केही महिनादेखि गम्भीर रुपमा अनुसन्धान गरिरहेको थियो। सीआईबीले अरुण चौधरीसँगै बाँसबारी छाला जुत्ताका तत्कालीन अध्यक्ष अजितनारायण सिंह थापालाई पक्राउ गरेको छ। उनीहरु दुईको मिलेमतोमा सरकारी जग्गा व्यक्तिको भोगचलनमा पुगेको निष्कर्षपछि सीआईबीले दुवैलाई नियन्त्रणमा लिएको हो। उनीहरु अहिले थुनामा छन्।
जुत्ता कारखानाको जग्गा प्रकरण अख्तियार दुरुपयोग अनुसन्धानमा पनि अनुसन्धानकै क्रममा रहेको पाइएको छ। अख्तियारले पछिल्लो ९ महिनादेखि उक्त प्रकरणमा सार्वजनिक चर्चा भएका कारण अनुसन्धान गरिरहेको र आवश्यक प्रमाण जुटाइरहेको अख्तियारका एक आयुक्तले बताए।
‘उक्त प्रकरणमा करिब १० वर्षदेखि अख्तियारमा उजुरी रहेको थियो। केही समयअघि तामेलीमा पनि राखिएको रहेछ,’ ती आयुक्तले भने, ‘हामी आएपछि केही विवरण खोजी गर्दै सम्बन्धित मन्त्रालय, विभाग र निकायमा पत्रचार गर्नेदेखि प्रमाण खोजीका लागि अनुसन्धान थालेका थियौं।’
अख्तियारले यस सम्बन्धी फाइल पठाइदिनु भनी अर्थ मन्त्रालयलाई पनि पत्र लेखेको ती आयुक्तले बताए। अर्थले जवाफ पनि पठाएको तर अधिकांश विवरणहरु गायब पारिएको र केही विवरण भने रेकर्डमा भेटिएको भनी जवाफ पठाएको ती आयुक्तले बताए। करिब ७ महिनाअघि अर्थबाट जवाफ आएको थियो। सरकारी जग्गा हडपेको र धेरै प्रमाणहरु नै मेटाएका कारण आयोगले सूक्ष्म रुपमा अनुसन्धान गरेको ती आयुक्तले बताए।
अब उनीहरु अनुसन्धानका लागि पक्राउ परेकाले सीआईबीले गर्ने अनुसन्धानले पनि थप अनुसन्धान गर्न आयोगलाई सहज हुने ती आयुक्तले बताए।
‘हामीलाई सीआईबीको अनुसन्धानले थप सहयोग पुग्छ। हामीसँग भएका विवरणहरु पनि सीआईबीलाई उपलब्ध गराउँछौं,’ ती आयुक्तले भने, ‘सीआईबीले ठगी र लिखत कीर्तेमा अनुसन्धान गरेर जिल्ला अदालतमा मुद्दा दायर गर्छ भने आयोगले भ्रष्टाचारमा विशेष अदालतमा मुद्दा दायर गर्छ।’
आयोगले सीआईबीमै रहेको समयमा पनि बयान लिन सक्ने नत्र सीआईबीको अनुसन्धानपछि बयान लिने आयोगले जनाएको छ। सीआईबीले गर्ने अनुसन्धानले आयोगलाई थप प्रमाण हुने भएकाले यो अनुसन्धान झन् छिटो हुने आयोगले जनाएको छ।
बाँसबारी छाला जुत्ता कारखानाको १० रोपनी सरकारी जग्गा उद्योगपति तथा नेपाली कांग्रेसका सांसद विनोद चौधरी घरानाले हडपेको पाइएको सीआईबीले जनाएको छ।
चौधरी ग्रुपले च्याम्पियन सु फ्याक्ट्रीका नाममा बाँसबारी छाला जुत्ता कारखानाको जग्गा हडपेको आरोप छ।
उक्त फ्याक्ट्रीको सेयर सदस्यमा सांसद विनोदकुमार चौधरी, अरूणकुमार चौधरी लगायत रहेका थिए। कुनै समय उक्त जग्गा दिएवापत बाँसबारी छाला तथा जुत्ता कारखाना समेत सेयर सदस्य बनेको थियो।
बाँसबारी छाला जुत्ताको १० रोपनी जग्गा उक्त सु फ्याक्ट्रीले लगेको कुरा डा भगवान कोइरालाले आफ्नो पुस्तक हृदयमा उल्लेख गरेका थिए। त्यसैका आधारमा उक्त विषय फेरि चर्चामा समेत आएको थियो।
उक्त जग्गा अहिले अरुण चौधरी, उनकी श्रीमती शिला चौधरी, आम्रपाली कन्स्ट्रक्सनका अध्यक्ष सन्ज ठाकुर र केही सेयर विनोद चौधरी समेतको नाममा रहेको सीआईबी स्रोतले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
