काठमाडौं– ७ गोलको वर्षा भएको खेलमा आर्सनल विजयी भएको छ। इंग्लिस प्रिमियर लिगअन्तर्गत मंगलबार राति भएको खेलमा आर्सनलले लुटन टाउनलाई ४–३ गोल अन्तरले हरायो।
खेलको २०औं मिनेटमा बुकायो साकाको पासमा मार्टिनेलीले गोल गर्दै पाहुना टोली आर्सनललाई अग्रता दिलाएका थिए। लगत्तै २५औं मिनेटमा लुटनका ओशोको गोल फर्काएपछि खेल बराबरीमा आयो।
४५औं मिनेटमा गाब्रियल जिससले गोल गरेपछि आर्सनलले पुनः अग्रता लियो। तर दोस्रो हाफको ४९औं मिनेटमा एडेबायोले गोल गरेपछि खेल पुनः २–२ को बराबरीमा आयो। ५७औं मिनेटमा बार्कलीले गोल गरेपछि लुटन टाउनले ३–२ को अग्रता बनाएको थियो।
लुटनको अग्रता ३ मिनेटभन्दा बढी टिक्न सकेन। ६० औं मिनेटमा हार्भटजले गोल गरेपछि खेल ३–३ को बराबरीमा आएको थियो। ९० मिनेटपछि अतिरिक्त समयमा ओडेगार्डको पासमा राइसले गोल गरेपछि आर्सनलले ४–३ को नतिजा निकाल्यो।
जितसँगै १५ खेलबाट ३६ अंकका साथ आर्सनल लिगको शीर्ष स्थानमा छ। एक खेल कम खेलका लिभरपुल ३१ अंक, म्यानचेस्टर सिटी ३० अंक र एस्टन भिल्ला २९ अंकसहित क्रमश दोस्रो, तेस्रो र चौथो स्थानमा छन्।
मंगलबार राति नै भएको अर्को खेलमा वुल्भ्सले बर्नलीलाई १–० गोल अन्तरले हरायो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1763559424.jpg)
