प्रतिकात्मक तस्बिर
काठमाडौं– बाराको पचरौता नगरपालिका–७ बनौलीमा सोमबार रातभर जसो दुई पक्षबीच झडप भएको छ। बनौलीमा झण्डा मेला लगाउने विषयमा स्थानीयबीच झडप भएको थियो। झडपलाई नियन्त्रणमा लिन प्रहरीले ८ राउन्ड हवाई फायर गरेको छ।
सोमबार साँझदेखि नै झण्ड मेला लगाउने विषयलाई लिएर विवाद सुरु भएको थियो। विवादले उग्र रुप लिएर राति ११ बजे दुई पक्षबीच ढुङ्गा हानाहान भएको थियो।
दुई पक्षको झडपलाई नियन्त्रणमा लिन प्रहरीले सोमबार राति ११ बजेतिर सुरुमा २ राउन्ड हवाई फायर गरेको थियो। प्रहरीले हवाई फायर गरेपछि झडप केही साम्य भएको थियो।
पछि फेरि ११:४५ बजेतिर स्थानीयबीच झडप भएको थियो। फेरि झडप भएपछि प्रहरीले ५ राउन्ड हवाई फायर गरेको थियो। राति ११:५५ बजे पुन: झडप भएपछि प्रहरीले फेरि १ राउन्ड हवाई फायर गरेको थियो।
राति ११:५५ बजेतिर हवाई फायर गरेपछि झडप तत्कालका लागि साम्य भएको जिल्ला प्रहरी कार्यालय बाराका प्रवक्ता, प्रहरी नायव उपरीक्षक (डीएसपी) दधिराम न्यौपानेले जानकारी दिएका छन्।
डीएसपी न्यौपानेका अनुसार झडपमा परी २ जना घाइते भएका छन्। घाइते हुनेमा पचरौता नगरपालिका–७ बनौलीकी ४० वर्षीया लक्ष्मी पटेल र सोही ठाउँकी ४२ वर्षीया चण्डीका पटेल छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
