काठमाडौं। इंग्ल्यान्डका कप्तान ह्यारी केनले सोमबार बालोन डी’ओर जित्दै २५ वर्षपछि यो प्रतिष्ठित अवार्ड जित्ने इंग्लिस खेलाडी बनेका छन्।
गत सिजन क्लब र राष्ट्रिय टोलीका लागि गरी ७३ गोल गरेका बायर्न म्युनिखका स्ट्राइकर केन युरोपका सर्वाधिक गोलकर्ता बनेका थिए।
३३ वर्षीय केनले अवार्डको प्रतिस्पर्धामा फ्रान्सका किलियन एमबाप्पे, स्पेनका लामिन यमल, सन् २०२४ का विजेता रोड्री र कीर्तिमानी आठपटकका विजेता लिओनेल मेसीलाई पछि पारे। लगातार तेस्रो वर्ष उत्कृष्ट युवा प्रतिभाको अवार्ड जितेका यमल मतदानमा तेस्रो स्थानमा रहे।
केनले गत सिजन बायर्न म्युनिखलाई जर्मन बुन्डेसलिगा र जर्मन कपको उपाधि दिलाउन योगदान गरे। जर्मन कपको फाइनलमा स्टुटगार्टविरुद्ध ह्याट्रिकसमेत गरेका उनले क्लबका लागि प्रभावशाली प्रदर्शन गरे।
विश्वकपमा पनि केनले उत्कृष्ट प्रदर्शन गरेका थिए। उनले प्रतियोगितामा ६ गोल गर्दै इंग्ल्यान्डका लागि विश्वकपमा सर्वाधिक गोल गर्ने खेलाडीको कीर्तिमान बनाए। यस क्रममा उनले ग्यारी लिनेकरलाई पछि पारे र विश्वकप इतिहासका सर्वाधिक गोलकर्ताको शीर्ष पाँचमा स्थान बनाए।
सेमिफाइनलमा इंग्ल्यान्ड अर्जेन्टिनासँग पराजित भएको थियो। त्यसपछि तेस्रो स्थानका लागि भएको खेलमा इंग्ल्यान्डले एमबाप्पेको फ्रान्सलाई हरायो। यससँगै इंग्ल्यान्डले ६० वर्षयताकै उत्कृष्ट विश्वकप नतिजा हासिल गरेको थियो।
सन् २००१ मा माइकल ओवेनले बालोन डी’ओर जितेपछि कुनै पनि इंग्लिस खेलाडीले यो अवार्ड जितेका थिएनन्। यसपटकको समारोह पहिलो विजेता इंग्ल्यान्डका स्ट्यान्ली म्याथ्युजको सम्मानमा लन्डनमा आयोजना गरिएको थियो। म्याथ्युजले सन् १९५६ मा पहिलो बालोन डी’ओर जितेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
