काठमाडौं– फिफा विश्वकप २०२६ अन्तर्गत एसिया क्षेत्र छनोटको दोस्रो चरणको दोस्रो खेलमा नेपालले आज (मंगलबार) यमनको सामना गर्दैछ। समूह ‘एच’को खेलमा नेपालले घरेलु मैदान, दशरथ रंगशालामा यमनको सामना गर्न लागेको हो।
नेपाल र यमनबीचको खेल मंगलबार बेलुकी ७ बजेदेखि सुरु हुनेछ। विश्वकप छनोटको अर्को चरणमा प्रवेशका लागि मंगलबारको खेल दुवै टोलीका लागि महत्त्वपूर्ण छ।
नेपाल दोस्रो चरणको पहिलो खेलमा संयुक्त अरब ईमिरेट्स (यूएई)सँग ४–० गोलले पराजित भएको थियो। यमन पनि बहराइनसँग २–० ले पराजित भएको थियो।
पहिलो चरणमा लाओसलाई पराजित गर्दै नेपाल दोस्रो चरणमा पुगेको हो। दोस्रो चरणमा नेपालले ३ वटै टिमसँग २–२ वटा होम र अवे गरी ६ खेल खेल्नेछ।
विश्वकप २०२६ एएफसी छनोटका लागि नेपाल रहेको समूहमा नेपालसँगै यूएई, बहराइन र यमन छन्। फिफा वरीयतामा यूएई ६९औं स्थानमा छ। बहराइन ८३औं तथा यमन १५६औं स्थानमा रहँदा नेपाल १७३औं स्थानमा छ।
४ टिममध्ये शीर्ष २ टिम एसिया कपमा छनोट हुनुका साथै विश्व कप छनोटको तेस्रो चरणमा पुग्नेछन्। पुछारका २ टिमको विश्वकप छनोट यात्रा टुंगिनेछ भने एसिया कपको तेस्रो चरणमा प्रवेश गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
