काठमाडौं– वैदेशिक रोजगारीका क्रममा अथवा नेपालमै रोजगारीको खोजीमा रहेका कामदार तत्काल समस्यामा पर्दा गुनासो सुन्न र तत्काल समाधान गर्ने उद्देश्यका साथ सरकारले सञ्चालनमा ल्याएका हटलाइन टेलिफोन सेवा प्रभावहीन देखिएका छन्।
श्रम, रोजगार तथा सामाजिक सुरक्षा मन्त्रालयले गत मंसिरदेखि ०१–४२११६९६ नम्बरको हटलाइन टेलिफोन सेवा सञ्चालनमा ल्याएको थियो। उक्त हटलाइन सेवाबाट रोजगारपीडितका समस्या समाधान हुने त कता हो कता सञ्चालनमा आएको दुई महिना नपुग्दै बन्द भएको थियो। तत्कालीन श्रम तथा रोजगारमन्त्री फरमुल्लाह मन्सुरले वैदेशिक रोजगारपीडितका समस्या र वैदेशिक रोजगार क्षेत्रमा भइरहेका विकृत्ति सिंहदरबारबाटै समाधान गरिने भन्दै उक्त हटलाइन सेवा सञ्चालनमा ल्याएका थिए।
तीन वर्षअघिदेखि वैदेशिक रोजगार विभागले पनि ०१–४७८२६८६ टेलिफोन जडान गरी हटलाइन सञ्चालनमा ल्याएको थियो। उक्त हटलाइन फोन सेवा पनि हाल विभागको एउटा कुनामा थन्किएको छ।
विभागको हटलाइन सेवा सञ्चालनमा रहेपनि खासै प्रभावकारी देखिएको छैन। हटलाइनबाट पीडितले उजुरी गर्न खोजेपनि कहिले फोन नउठ्ने त उठेपनि तत्काल समाधान हुने अवस्था नरहेको स्वयम् पीडित बताउँछन्।
तर, विभागले भने उक्त हटलाइनमा अहिले पनि धेरै पीडितले देश विदेशबाट फोनमार्फत उजुरी गरिरहेको दाबी गरेको छ। रोजगारी क्षेत्रका समस्या सुन्ने तथा तत्काल समाधान गर्न अहिले पनि हटलाइन टेलिफोन सेवा सञ्चालनमा रहेको वैदेशिक रोजगार विभागका प्रवक्ता उद्धवप्रसाद रिजालले बताए। तर समस्या समाधान गर्ने हकमा भने विभाग केही पछि परेको रिजालले स्वीकारे।
‘विभागमा कम कर्मचारी भएकाले हटलाइन सेवाबाट पीडितका गुनासा सम्बोधन गर्न समस्या परेको अवश्य हो।’, उनले भने, ‘यसलाई आगामी दिनमा कसरी प्रभावकारी बनाउने भनेर योजना बनाइरहेका छौं। विदेशिने कामदारका समस्या सञ्चार जगतबाट सम्बोधनको प्रयास भइरहेको छ।’
विभागमा म्यानपावरबाट ठगिएका, समस्यामा परेर विदेशबाट फर्किएका र अन्य समस्या लिएर दैनिक २० देखि ५० जना रोजगारपीडित आउने गरेको विभागले जनाएको छ। विभागले हटलाइन टेलिफोन सेवा सञ्चालनमा ल्याएपनि म्यानपावर अथवा तीनका एजेन्टबाट कोही व्यक्ति वैदेशिक रोजगारीका नाममा ठगिएमा समस्या लिएर काठमाडौंस्थित विभागमै आउनुपर्ने बाध्यता छ।
विगत ६ महिनामा हटलाइनमा २ सयभन्दा बढी उजुरी आएका विभागले जनाएको छ।
वैदेशिक रोजगारीसम्बन्धी सम्पूर्ण विवरण अब अनलाइन प्रणालीमा
सरकारले वैदेशिक रोजगारीमा जाने कामदारको सम्पूर्ण विवरण तथा तंथ्याकलाई अनलाइन प्रणालीमार्फत समेट्ने भएको छ।
वैदेशिक रोजगारीका क्रममा समस्यामा परेका कामदारका गुनासा तथा मुद्धा समाधान गर्ने उद्देश्यले अनलाइन प्रणालीको विकास गरिएको मन्त्रालयले जनाएको छ। उक्त प्रणालीलाई फरेन इम्प्लाेयमेन्ट इन्फरमेसन म्यानेजमेन्ट सिस्टम (एफइअाइएमएस) नामाकरण गरिएकाे छ।
श्रम मन्त्रालय मातहतका वैदेशिक रोजगार विभाग, श्रम कार्यालय, राहदानी विभाग, कन्सुलर विभाग, अध्यागमन, विदेशस्थित कुटनीतिक नियोग, म्यानपावर कम्पनी, स्वास्थ्य परिक्षण संस्था, अभिमुखीकरण तालिम केन्द्र सबै अनलाइन सिस्टममै समेटेर काम गरिने छ।
वैदेशिक रोजगारीका क्रममा समस्यामा परेका कामदारले अनलाइनमा उजुरी गर्नसक्ने गरी उक्त प्रणालीको विकास गरिएको मन्त्रालयको भनाई छ।
गत साउन महिनादेखि नै विभागले कामदारको पासपोर्ट नम्बर क्लिक गरेपछि रोजगारीका लागि गएको देश, गरेको काम लगायतका विवरण थाहा पाउने गरी अनलाइन प्रणालीको विकास गरेको थियो। अब भने, वैदेशिक रोजगारीका क्रममा समस्यामा परेका व्यक्तिको उजुरी र गुनासो समेत अनलाइनमार्फतनै सुनुवाइ गर्न मिल्ने गरी व्यवस्था मिलाइएको मन्त्रालयका प्रवक्ता प्रकाश दाहालले जानकारी दिए।
उक्त अनलाइन असाेज १ गतेदेखि सञ्चालनमा ल्याइने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752245592.jpg)
-1752043710.jpg)
-1749826086.png)
