ढाका- बंगलादेशी शिक्षण संस्थाहरूबाट हरेक वर्ष सूचना प्रविधि (आईटी) अध्ययन गरेका २५ हजार स्नातकहरू उत्पादन हुने गरेका छन्। ढाकास्थित नेपाली राजदूतावासले सूचना प्रविधिको क्षेत्रमा नेपाल तथा बङ्गलादेशबीच सहयोग अभिवृद्धि गर्ने उद्देश्यले गत बिहीबार आयोजित एक अन्तरक्रियालाई सम्बोधन गर्दै त्यहाँका एक उद्यमीले उक्त जानकारी गराएका हुन्।
बंगलादेश एसोसिएसन अफ सफ्टवेयर एण्ड इन्फरमेसन सर्भिसेज (बेसीस) का अध्यक्ष रसेल टी अहमदले बंगलादेश सरकारले सन् २००९ मा 'डिजिटल बंगलादेश’ अभियान घोषणा गर्दा बंगलादेशले सूचना तथा संचार प्रविधिमा आधारित सेवा निर्यात गरी झन्डै तीन करोड डलर आम्दानी गरेको बताए। अहिले त्यस्तो आम्दानी वार्षिक एक अर्ब पचास करोड डलर पुगेको जानकारी उनले दिए। उनले बंगलादेशी शिक्षण संस्थाहरूबाट उत्पादित स्नातकहरूलाई थप प्रशिक्षण र कार्य अनुभव आवश्यक रहेको बताए। 'हामी एउटै डुंगामा छौं। त्यसैले नेपाल र बंगलादेशबीच प्रतिस्पर्द्धा हैन, सहयोग आदानप्रदान हुनु पर्दछ,' उनले भने।
बेलायतमा मुख्यालय रहेको कम्पनी, जेनेस सलुसनका संस्थापक तथा मुख्य प्राविधिक अधिकृत अञ्जली फुयालले नेपालमा सूचना प्रविधि अध्ययन गरेका वर्षेनि ९ हजार स्नातकहरू उत्पादन भैरहेको बताए। उनले सूचना प्रविधि क्षेत्रले नेपालको कूल गार्हस्थ्य उत्पादनमा १.४ प्रतिशत तथा कूल वैदेशिक मुद्रा संचितिमा ५.५ प्रतिशत योगदान गरेको बताए। सन् २०२० मा नेपालको सूचना प्रविधि क्षेत्रले ३० करोड डलर भन्दा बढी आम्दानी गरेकोमा दुई वर्षमै त्यस्तो आम्दानी बढेर ५१ करोड डलर नाघेको अनुमान गरिएको उनकाे भनाइ थियाे। नेपाल तथा बंगालदेशबीच डिजिटल पूर्वाधार, ई-गभर्नेन्स, स्वास्थ्य, शिक्षा तथा साइबर सेक्युरिटी लगायतका क्षेत्रमा अनुसन्धान तथा सहकार्य अगाडि बढाउने सम्भावना रहेको उनले बताए।
कार्यक्रमका सहभागीहरूलाई स्वागत गर्दै बङ्गलादेशका लागि नेपाली राजदूत घनश्याम भण्डारीले नेपाल र बङ्गलादेश दुवैले सूचना प्रविधिको विकासमा जोड दिँदै आएको र दुई मुलुकबीच आपसी सहयोग अभिवृद्धि गर्न पर्याप्त सम्भावना रहेको बताए। उनले बंगलादेशी कम्पनी पठाओले नेपालमा र जेनेस सलुसन जस्ता कम्पनीहरूले बङ्गलादेशमा आफ्नो कार्यक्षेत्र विस्तार गरेको बताए। सूचना प्रविधिको विकासका लागि शिक्षा, तालिम तथा पूर्वाधारको विकास गर्नुपर्नेमा पनि उनले जोड दिए।
कार्यक्रमका प्रमुख अतिथि तथा बंगलादेश सरकारको सूचना विभागका सचिव मोहम्मद शम्शुल आरेफिनले नेपाल र बंगलादेशबीच सूचना प्रविधिको क्षेत्रमा सहयोग विस्तार गर्न अपूर्व मौका आएको बताए। उनले नेपालमा मौलाउँदो सूचना प्रविधि क्षेत्र र बंगलादेशमा जारी नव प्रवर्तनका प्रयासहरूले त्यस्तो सहयोगको आधारभूमि तयार गरेको बताए।ज्ञान आदानप्रदान गर्न र साझेदारीका नयाँ क्षेत्रहरूको पहिचान गर्न पनि आग्रह गरे।
संचार तथा सूचना प्रविधि मन्त्रालयका सहसचिव अनिलकुमार दत्तले नेपाल सरकारले आफ्ना अधिकांश सेवाहरू अनलाइनमार्फत् उपलब्ध गराइरहेको बताए। उनले सूचना प्रविधि तथा साइबर सेक्युरिटीसम्बन्धी नयाँ विधेयक ल्याउन सरकारले काम गरिरहेको बताए। सहसचिव दत्तले सूचना प्रविधिको क्षेत्रमा बंगलादेश सरकारसँग सहकार्य गर्न नेपाल इच्छुक रहेको पनि भनाइ राखे।
नेपाल एसोसिएसन फर सफ्टवेयर एण्ड आईटी सर्भिसेज कम्पनीज (नास आईटी) का महासचिव निर्देश द्वाले अन्तरराष्ट्रिय बजारमा नेपाली कम्पनीहरूको पहिचान र पहुँच बढ्दै गएको बताए। उनले नेपालले बंगलादेशका ‘हाइटेक पार्क’हरूबाट सिक्न सक्ने र दुवै देशका निजी एवं प्राज्ञिक क्षेत्रबीच सहयोग आदानप्रदानलाई प्रोत्साहन गर्नु पर्ने बताए।
नास आईटी तथा जेनेस सलुसनसँगको सहकार्यमा ढाकास्थित नेपाली दूतावासले उक्त कार्यक्रमको आयोजना गरेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![जब आशिष गायक बन्न काठमाडौं आइपुगे [भिडियाे]](https://nepallive.net/uploads/posts/500X300/ashish mahar video thumbss1696247935.JPG)
![हामी योजनाबद्ध विकासको लयमा अघि बढेका छौँ, रिजल्ट देखिन थालेको छ: कृष्णहरि मर्हजन [भिडियाे]](https://nepallive.net/uploads/posts/500X300/krishna maharjan thumbss 1695817270.jpg)
![एकै खेलमा नेपालले बनायो कीर्तिमान नै कीर्तिमान [भिडियाे]](https://nepallive.net/uploads/posts/500X300/nepal ko kritiman nai kritiman thumbss 1695809570.jpg)
![भाषण गरिरहेका नेताबारे देउवाले विश्वप्रकाशसँग सोधे- को मान्छे हुन् यिनी? [भिडियाे]](https://nepallive.net/uploads/posts/500X300/382241383_1016364039682320_170889257131060420_n1695560664.jpg)
![प्रश्न माओवादी केन्द्रलाई, जवाफ कांग्रेसको [भिडियाे]](https://nepallive.net/uploads/posts/500X300/nepallive brifing thumbs1695481420.jpg)
