कर्णालीका भेडापालक कृषकलाई ६८ लाख ‘हेरालो भत्ता’

कृषि

रासस बिहीबार, साउन ११, २०८० २१:५३

सुर्खेत– कर्णाली प्रदेश सरकारले यहाँका चार सय ४० पशुपालक कृषकलाई ६८ लाख ७३ हजार ‘हेरालो भत्ता’ दिएको छ।

प्रदेश सरकार भूमि व्यवस्था, कृषि तथा सहकारी मन्त्रालयले गत आर्थिक वर्ष २०७९/८० मा यहाँका हिमाली चार जिल्लाका भेडा च्याङ्ग्रापालक कृषकलाई ‘हेरालो भत्ता’ उपलब्ध गरेको हो।

मन्त्रालयअन्तर्गत पशुपक्षी विकास निर्देशनालय सुर्खेतका निमित्त निर्देशक कृष्णप्रसाद पङ्गेनीका अनुसार ‘हेरालो भत्ता’ कार्यक्रम उच्च हिमाली जिल्ला डोल्पा, हुम्ला, मुगु र जुम्लामा लागू भएको थियो।

उनले भने, ‘प्रदेश सरकारले खासगरी भेडा च्याङ्ग्रापालक किसानलाई प्रतिमहिना एक हजार पाँच सयका दरले वार्षिक १८ हजार रकम उपलब्ध गराएको छ। पचासभन्दा माथि भेडा–च्याङ्ग्रा पालेका कृषकलाई प्रोत्साहनस्वरुप प्रदेश सरकारले ‘हेरालो भत्ता दिएको हो।’

कार्यक्रम यो आर्थिक वर्षमासमेत निरन्तर रहेको बताउँदै निर्देशक पङ्गेनीले अहिले केही जिल्लामा ‘हेरालो भत्ता’का साथै औषधि र बन्दोबस्तीका सामान पनि उपलब्ध गराउने सुविधा थपिएको जानकारी दिए।

निर्देशनालयले जुम्लाका दुई सय २५ कृषकलाई ३३ लाख वितरण गरेको छ। त्यस्तै हुम्लाका एक सय नौ कृषकलाई १५ लाख ६९ हजार, मुगुका ५३ कृषकलाई १० लाख ५० हजार र डोल्पाका ५३ कृषकलाई नौ लाख ५४ हजार रकम प्रदान गरेको छ।

प्रदेश सरकारले कृषि क्षेत्रमा युवा जनशक्तिको आकर्षण बढाउन र कृषकको जीवनयापनमा सहयोग पुर्‍याउने उद्देश्यसहित उक्त कार्यक्रम ल्याएको जनाइएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।