काठमाडौं- सुन तस्करी प्रकरणमा एमालेले सत्तापक्ष नेपाली कांग्रेसका सांसदहरुकोसमेत साथ पाएको छ। सत्तापक्षकै अन्य दलका सांसदले उक्त विषयमा साथ नदिँदा प्रतिरक्षामा उत्रिने माओवादी केन्द्र एक्लो बनेको छ।
बुधबार एघार दिनपछि बसेको प्रतिनिधि सभा बैठकमा सुन तस्करीका विषयमा मात्रै छलफल भएको छ। एकसय किलो सुन तस्करी प्रकरणलाई लिएर उच्चस्तरीय छानबिन समितिको माग गरिरहेको एमालेले सभामुमुख देवराज घिमिरे नियमित कार्यसूचीमा प्रवेश गर्न खोज्दा अवरोध गरेको हो।
एमालेले आफ्नो माग पूरा नहुन्जेल अवरोध गरिरहने संकेत पाएका सभामुख देवराज घिमिरेले संसद् बैठक पाँच दिनपछि साउन १५ गतेलाई बोलाएका छन्। प्रधानमन्त्री पुष्कमल दाहाल प्रचण्ड देशबाहिर रहेकाले तत्काल समस्या समाधान हुने नदेखिएपछि बैठक पर धकेलिएको हो।
साथ पाउने संकेतपछि छलफल
उच्चस्तरीय छानबिन समिति नबनाउन्जेलसम्म संसद् अघि बढ्न नदिने निर्णय एमाले संसदीय दलको बैठकले गरेको थियो। त्यहीअनुसार एमालेका प्रमुख सचेतक पदम गिरीले सुरुमै हात उठाएर आफ्ना भनाइ राखे। संसदीय दलको बैठकमा गिरीले छानबिनका निम्ति संसद्बाट उच्चस्तरीय छानबिन समिति बनाउन सभामुखबाट रुलिङ मागसमेत गरे। संसद् अवरोधतर्फ आफू अघि बढ्न सक्ने संकेत गर्दै उनले थपे, ‘छानबिन समिति बन्ने कुराको सुनिश्चित भएन भने संसद् अगाडि बढ्न दिन सकिँदैन।’
गिरीले गृहमन्त्री नारायणकाजी श्रेष्ठ कुनै पनि दृष्टिकोणले गृहमन्त्रीको कुर्सीमा बस्न लायक नभएको बताए। गृहमन्त्रीले स्टन्डबाजी गर्दै हिँडेको तथा कोट र टार भन्ने गरेको भन्दै गिरीले असन्तुष्टि जनाए। ‘कुन नैतिकताको धरातलमा उहाँ पदमा बस्न सुहाउँछ?’, उनले सोधे।
गिरीले यति भनेपछि एमाले सांसदहरु उठेर नाराबाजी गर्न थाले। अग्रपंतिमा रहेका एमाले उपाध्यक्षद्वय सुवास नेम्वाङ, विष्णु पौडेल र सचिव योगेश भट्टराईले भने यथास्थानमा आसन ग्रहण गरिरहे।
सत्तापक्षतर्फ रहेका कांग्रेस सांसद् डा सुनिल शर्माले सुरुमै हात उठाएर समय मागेका थिए भने रामहरि खतिवडा पनि बोल्नका लागि तयार थिए। अवरोध गर्न प्रमुख सचेतकले आह्वान गरे, तर शीर्ष नेताहरु बसिरहेको सन्दर्भमा एमालेका केही सांसद अन्योलग्रस्त थिए।
यही क्रममा सत्तापक्षमा रहेका खतिवडाले बस्नका लागि निरन्तर अपिल गरे। त्यसमा डा शर्माले पनि जोड गरे। सभामुख देवराज घिमिरेले बोल्न समय दिइसकेका डा शर्मा र बोल्ने पालो कुरेका खतिवडाले जोड गरेपछि भने एमाले सांसदहरुले कुरा बुझे। नाराबाजी सुरु भएर अवरोध गर्ने तयारीमा रहेको एमाले पछि हट्यो। त्यहीबीचमा प्रमुख सचेतक गिरीले संविधान सभा अध्यक्षसमेत रहेका नेम्वाङसँग परामर्श लिए। जुनबेला सत्तापक्षीय सांसद डा शर्मा सुन तस्करी प्रकरणमा प्रतिपक्षभन्दा चर्को रुपमा सरकारको विरोध गरिरहेका थिए।
आफ्नै मन्त्रीको राजीनामा माग्दै अनसन घोषणा
नेपाली कांग्रेसका सांसद डा शर्माले आफ्नै पार्टीबाट अर्थमन्त्री बनेका डा प्रकाशशरण महतको राजीनामासमेत मागेका छन्। यस्ता प्रकरणमा मुछिएका विश्वका विभिन्न नेताहरुले पदबाट आफूलाई अलग्याएको उल्लेख गर्दै उनले गृहमन्त्री नारायणकाजी श्रेष्ठसमेतको राजीनामा माग गरे।
अर्थमन्त्री डा महत र गृहमन्त्री श्रेष्ठले सुन तस्करी प्रकरणको अनुसन्धानमा भरिया मात्रै होइन, मुख्य दोषीलाई पक्रियौं भन्न सक्नुपर्ने अथवा समय लिएर पक्राउ गर्ने भन्न सक्नुपर्नेसमेत उल्लेख गरे।
उनले थपे, ‘उहाँहरुले समय लिने हो भने तीन दिन, पाँच दिन, सात दिन कति समय लिने हो। समय लिएर भन्न सक्नुपर्छ। हामी सात दिनभित्रमा यसको मुख्य नाइके पक्रिन्छौं भनेर भन्न सक्नुपर्यो। होइन भने उहाँहरुले यो अनुसन्धानको प्रक्रियालाई सहज बनाउनका निम्ति अहिलेलाई कमसेकम सुनको मुख्य मालिक पत्ता नलागुञ्जेलसम्मका निम्ति राजीनामा गरेर प्रजातान्त्रिक पद्धति र अभ्यासलाई कदर गर्नुपर्छ।’
शर्माले मुख्य अभियुक्त पक्राउ नगरेर गाउँको सोझो भरियालाई पक्रिने र गुपचुप पार्ने हो भने आफूले प्रधानमन्त्री फर्किएपछि संसद्मै अनसन बस्ने घोषणा पनि गरेका छन्। ‘प्रधानमन्त्री फर्किएपछि पनि सुनको भरिया नभइ मुख्य व्यक्ति पक्राउ नपर्ने हो भने सदनभित्रबाट आमरण अनसन घोषणा गर्न चाहन्छु,’ उनले भने।
यसैगरी खतिवडाले एउटा भरिया मात्रै पक्रिएर अरुले उन्मुक्ति पाउन नहुने बताए। उनले यसअघि पनि पटक-पटक रेडी ट्रेक नामको कम्पनीले सामान ल्याएको बताउँदै त्यसकोसमेत खोजबिन हुनुपर्ने उल्लेख गरे।
राप्रपाको माग पनि विशेष आयोग
एमालेसँगै राप्रपाले पनि सुन प्रकरणमा छानबिन समिति माग गरेको छ। बुधबार प्रतिनिधि सभामा बोल्दै राप्रपा अध्यक्ष राजेन्द्र लिङ्देनले विशेष आयोग, छानबिन समिति बन्नुपर्ने बताए। लिङ्देनले सुन प्रकरणको अनुसन्धान जरासम्मै पुग्नुपर्ने बताए।
उनले यसअघिका काण्डहरुमा पनि जरोसम्म नपुगिएको बताए। उनले कसैलाई देखाउन लागि मात्रै एकपटक सुन पक्रिने काम भएको आशंका व्यक्त गरे। आफूहरुलाई प्राप्त सूचना भन्दै लिङ्देनले अरु देशले दबाब दिएपछि मात्रै पक्राउ गरिएको बताए।
‘केही भरियालाई पक्राउ परेर सुन तस्करका नाइकेलाई संरक्षण दिने जोगाउने, यति त गर्यौं नि! भन्ने काम नगरोस्। जरोसम्म पुग्ने काम गरोस्’, उनले भने।
रास्वपाले भन्यो- ठूलो सेटिङ छ
राष्ट्रिय स्वतन्त्र पार्टीले सुन प्रकरणमा ठूलो सेटिङ भएको आरोप लगाएको छ। संसद्को विशेष समयमा बोल्दै सभापति रवि लामिछानेले सेटिङबिना यत्रो सुन विमानस्थलबाट बाहिर आउनै नसक्ने दाबी गरेका छन्। उनले यो सेटिङ जनताले थाहा पाइसकेको भन्दै यस्ता घटना आउँछन् अनि कर्मचारीको सरुवा किन हुन्छ? भन्दै प्रश्न गरे।
‘सरुवा कारबाही हो कि पुरस्कार हो? उनीहरुलाई तुरुन्त बर्खास्त गर्ने हो कि सरुवा गरेर पुरस्कार गर्ने हो?’ उनले प्रश्न गरे, ‘कुनै अभियोगमा डामेर छोडेपछि समय दिएपछि अनुसन्धान प्रभावित गर्ने, टेलिफोन फर्म्याट गर्न मिल्छ होला? सरकारलाई सूचना आएको थियो रे। अनि भरिया मात्र पक्राउ गर्न यस्तो गरिएको हो?’
त्यसलाई पछ्याएर मालिक पनि समाउने सकिने भए पनि त्यसो नगरिएको यो एउटा ठूलो सेटिङ रहेको उनको भनाइ छ। यही विषयमा छलफलका लागि रास्वपाले सार्वजनिक महत्त्वको प्रस्ताव दर्ता गराएको छ। चित्त बुझ्दो जवाफ नपाएमा रास्वपाले अरु कदम चाल्ने चेतावनी लामिछानेले दिएका छन्।
एक्लिएको माओवादी केन्द्र
सरकारका पक्षमा बोल्ने माओवादी केन्द्रका सांसद देवेन्द्र पौडेल एक्ला भए। कांग्रेसबाट बोल्ने समय पाएका सांसदद्वय डा सुनिल शर्मा र रामहरि खतिवडाले यो प्रकरणमा मन्त्रीहरुकै आलोचना गरेका थिए।
जनता समाजवादी पार्टीका सांसद प्रदीप यादवले बाढीले प्रभावित तराईको जनजीवनका विषयमा आफ्ना भनाइ राखे। माओवादी केन्द्रका सांसद् पौडेलले भने सरकारले भ्रष्टाचारीमाथि छानबिन गर्दा विरोध र अवरोध गर्न खोजिएको भन्दै प्रश्न उठाएका थिए।
‘सरकारलाई म बधाई दिन चाहन्छु। तर, यहाँ दिउँसै रात पार्न खोजिएको थियो,’ उनले भने, ‘भ्रष्टाचारको छानबिन सुरु गर्दा माननियहरुलाई टाउको नदुखोस्। व्यक्तिको अनुहार हैन उसको गल्ती हेरेर भ्रष्टाचार छानबिनलाई अगाडि बढाउनुपर्छ।’
उनले भ्रष्टाचारमा ट्रान्सपरेन्सी इन्टरनेशनलको प्रतिवेदन, सम्पत्ति शुद्धीकरणमा अन्तर्राष्ट्रिय प्रश्नहरु पटक–पटक आइरहेको भन्दै उनले सरकारले अहिले केही भ्रष्टाचारमा छानबिन गर्दा किन संसद् अवरोध गरिएको हो भन्दै प्रश्न गरे। एमालेले सुन प्रकरणमा सुरुमै अवरोध गर्दै प्रश्न उठाएपछि समय लिएर बोल्दै पौडेलले भने, ‘हामी अवरोध, विरोध गरेर अनुसन्धान रोक्न खोज्दैछौं कि के गर्दै छौं?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779193203.png)
-1764146706.png)
