काठमाडौं– नेपाली कांग्रेसका उपसभापति पूर्णबहादुर खड्काले पार्टीका महामन्त्रीहरू सभापतिले बोलाए मात्र जाने नभई आफैं पनि जानुपर्ने बताएका छन्।
उनले केन्द्रीय समितिमा ६ दिनसम्म चलेको बैठकमा उठेका कुराहरुलाई सम्बोधन गर्दै महामन्त्रीहरुले आफूलाई पार्टीको निर्णयमा सहभागी नगराएको भनी गुनासो पोखेपछि उनले यस्तो जवाफ दिएका हुन्।
उनले पार्टीभित्र विचार समूह हुने भन्दै यसलाई नकार्नेभन्दा स्वीकार गरेर जानुपर्ने र महामन्त्रीहरु नबोलाएका बेला पनि सभापतिकहाँ जानुपर्ने बताए।
‘महामन्त्रीजीहरूले यहाँ बोल्ने बेला भन्नुभयो– सभापतिले बोलाएका बेलामा हामी जाने गरेका छौं। मेरो यसमा थप सुझाव उहाँहरुलाई छ,’ उनले भने, ‘बोलाएका बेला मात्र होइन, महामन्त्रीको जिम्मेवारीले सभापतिलाई सल्लाह दिन पनि जानुपर्छ।’
उनले पार्टीभित्र देखिएको समस्या सम्बोधन गर्दै जानुपर्ने र सहकार्य यसले वृद्धि हुँदै पार्टी एक हुने दाबी गरे। उनले जहाँ–जहाँ जे–जे हुन्छ सुधार गरेर जानुपर्ने बताए। सभापति र महामन्त्रीका बीचमा संवाद बाक्लो हुनु राम्रो हुने उनको भनाइ थियो। उनले टिकट बाँड्दा भएका कमजोरीको जिम्मेवारी आफूले पनि लिने बताए।
विधिअनुसार टिकट वितरण गरिएको कुरा स्वीकार गर्दै उनले कुनै कमजोरी भएको भए म संसदीय समिति सदस्य भएकोले जिम्मेवारी लिने पनि बताए। सरोकार राख्नेहरूसँग छलफल गरेर नै टिकट वितरण गरेकोले नैतिक जिम्मेवारी लिने उनले बताए।
उनले विधान अनुसार सबै चल्नुपर्ने र यसले सद्भाव र सहकार्य बढ्ने पनि बताए। उनले भावनात्मक एकतामा कमी हुँदै गएको भन्दै यसलाई घटाउने भूमिकामा आफ्नो पनि कमजोरी भएको छ कि भनेर निधार खुम्चाउनुपरेको उल्लेख गरे।
उपसभापति खड्काले सभापति शेरबहादुर देउवाले अर्को पटक आफू नलड्ने बताएको उल्लेख गर्दै मिलेर प्रतिस्पर्धामा जानुपर्नेमा जोड दिए। भोलिको नेतृत्वमा पुग्नका लागि सिङ्गो पार्टी एकढिक्का बनाउने गरी काम गर्नुपर्ने उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779242627.png)
-1778551198-1778552039.jpeg)
-1764146706.png)
