काठमाडौं- नेपाली कांग्रेसको जारी केन्द्रीय कार्यसमिति बैठकमा महामन्त्रीद्वय गगन थापा र विश्वप्रकाश शर्माले ‘एक्जिट पोलिसी’को आवश्यकता औंल्याएका छन्। साउन २ गतेदेखि जारी बैठकमा उठेका प्रश्नहरुको जवाफ दिने क्रममा दुवैले सो विषयलाई जोड दिएका हुन्।
महामन्त्री थापाले दलहरुमा नेतृत्व परिवर्तनको कुरा असहज र अस्वाभाविक बनाइएकोले गर्दा नेपालका दलहरु संकटमा पर्दै आएका र पर्दै जाने चेतावनी दिए। ‘यो सैद्धान्तिक कुरा पनि हो। लोकतन्त्रमा 'एक्जिट'को कुरा गरिएको हुन्छ। कहीँ दलको नेताको नेतृत्वमा चुनाव लडेर हारियो भने छोडेर जाने। कहीँ पार्टी सभापति लडेर हारियो भने छोडेर जाने। केही न केही व्यवस्था गरिएको हुन्छ। हामीमा कुनै व्यवस्था गरिएको छैन’, उनले भने।
थापाले नेपालका पार्टीहरु जमेको पोखरी जस्तो भएको बताए। जनताले ३०/३५ वर्षदेखि चार पाँच जना नेता मात्रै ‘म्युजिकल चेयर’ खेलेको जस्तो आलोपालो गरेको देखेकाले रिसाएको बताए।
उनले आफूले सभापति र संसदीय दलको नेता परिवर्तनका लागि लागिरहने बताए। सभापति शेरबहादुर देउवाप्रति आफ्नो असीम श्रद्धा रहेको तर परिवर्तनको विषय व्यक्तिगत नभएको बताए।
उनले नेपालको राजनीतिमा एक्जिट पोलिसीको व्यवस्था गर्नुपर्ने बताए। ‘हाम्रो पार्टीको एउटा पद्धति छ। त्यसबाट हामी पार्टी सत्तामा आउँछौं। त्यसको कारणले देशको सत्तामा आउँछौं। यसरी हामी चार पाँच जना घुमिफिरी बसिरहेका छौं। यसलाई बदल्नुपर्छ। यसका निम्ति मेरो पहलकदमी निरन्तर रुपमा रहन्छ’, उनले भने।
थापाले आफूले निरन्तर संसदीय दलको नेता परिवर्तनका लागि पहल गरिरहने बताए। त्यस पहलप्रति असन्तुष्ट नेताहरुप्रति थापाको कटाक्ष गर्दै भने, ‘साथीहरु किन आत्तिनुभएको हो? मैले पार्टी फुटाउने कुरा गरेको हो र? मैले दलको नेता फेर्ने कुरा गरेको हो।’
उनीअघि बोलेका महामन्त्री शर्माले राजनीतिको रुपान्तरणका लागि एक्जिट पोलिसी जरुरी देखिएको बताए। ‘त्यो पोलिसी समयमै थियो भने आदरणीय सभापतिले धेरै वर्षअगाडि राजनीतिबाट रिटायर्ड हुनुहुन्थ्यो’, बैठकमा उठेका प्रश्नको जवाफ दिने क्रममा शर्माले भने।
उनले नेपालको राजनीतिलाई रुपान्तरण गर्न के गर्नुपर्छ भनेर केही अगाडि चलेको लहरमा ७० वर्ष नाघेका सबैलाई बिदा गर्नुपर्छ भन्ने विषय उठेको भन्दै त्यतिबेला आफूले एज होइन अजेन्डाको कुरा गरेको बताए।
‘नेपाली कांग्रेसले एज होइन, अजेन्डाकै कुरालाई केन्द्रमा राख्ने हो। तर एक्जिट पोलिसी हामीले बनाउनुपर्छ’, उनले भने। शर्माले एकपटक राष्ट्रपति, प्रधानमन्त्री दुई पटक, मन्त्री तीन पटक र सांसद चार पटक हुने व्यवस्था गरिनुपर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
