काठमाडौं– नेपाली कांग्रेसको केन्द्रीय कार्यसमितिको बैठक जारी छ। पार्टी कार्यालय सानेपामा चलिरहेको बैठकमा केन्द्रीय सदस्य र जिल्ला सभापतिहरुले आ–आफ्नो भनाइ राखिरहेका छन्। उनीहरुले पार्टीको अवस्था र आगामी रणनीतिका विषयमा नेतृत्वलाई सुझाव दिइरहेका छन्।
बैठकमा आ–आफ्नो भनाइ राखिरहेका नेताहरुले तीनै तहको सरकारमा पार्टीको उपस्थिति हुँदा पनि जनता ढुक्क हुन नसकेको भन्दै चिन्ता व्यक्त गरेका छन्। जनता सन्तुष्ट हुने गरी किन काम गर्न सकिएन भन्दै नेताहरुले प्रश्न पनि उठाएका छन्।
केन्द्रीय सदस्य जीवनबहदुर शाहीले कुनै समय युवाहरुको पार्टी भनेर चिनिएको नेपाली कांग्रेसमा किन अहिले युवाको आर्कषण भएन भनेर प्रश्न उठाए। युवाहरु विस्तारै निरास भएर अन्यत्र गएको र पार्टी भने पुरानो इतिहास मात्र बेचेर बसेको भन्दै शाहीले प्रश्न गरे, ‘अब यसरी कति दिनसम्म चल्छ?’
उनले २००७ साल र २०१७ सालको इतिहास बेचेर कांग्रेसलाई युवा पुस्ताले नपत्याउने अवस्था रहेको भन्दै नयाँ नीति लिनुपर्ने सुझाव दिए। नयाँ पुस्ताले पत्याउन युवाको आकांक्षा अनुसारका कामहरू कांग्रेसले गर्नुपर्ने उनको सुझाव छ।
‘२००७ सालमा, २०१७ सालमा यो गरेको थियो भनेर अबको जनेरेसनले पत्याउँदैन, सुन्दैन, सुन्नेवाला पनि छैन। युवाले यही कुरा किन सुन्ने र पत्याउने पनि?’ उनले भने, ‘अहिले हामीलाई के भयो, मेरो बाटो बन्यो कि बनेन, खानेपानी आयो कि आएन, केन्द्रमा भएको कुरा मैले सुन्न पाएँ कि पाइनँ भनेर खोज्न थालेका छन्।’
उनले पार्टी अनुसाशनमा चल्ने भएकाले कुरा एउटा र अन्तिममा निर्णय अर्कै हुन नहुने तर्क गरे। उनले पार्टीको अनुसन्धानमा कडाइ गर्न नसकिए आफैंभित्र लड्नुपर्ने अवस्था सिर्जना हुने भन्दै प्रतिपक्ष वा प्रतिस्पर्धी दलसँग कसरी लड्ने भनेर प्रश्न गरे।
केन्द्रीय सदस्य एवम् पार्टीको सुदूरपश्चिम प्रदेश समितिका सभापति वीरबहादुर बलायरले पार्टीभित्र अनुशासनको कुरा समस्या भएको बताए। उनले संगठन अब नयाँ तरिकाले बनाएर अघि बढ्नुपर्ने सुझाव पनि दिए।
‘अहिलेको संरचनाले अघि बढ्न सकिँदैन। यसलाई कसरी परिर्वतन गर्न सकिन्छ गर्नुपर्छ,’ उनले भने, ‘प्रदेशलाई जिम्मेबारी दिएर जाँदा उपयुक्त हुन्छ। संगठन निर्माणमा अधुरो छौं भन्ने गुनासो सबैतिरबाट आएको पनि छ।’
उनले पार्टीभित्र अनुशासन समस्या भएको भन्दै यसले काग्रेसलाई फाइदा नहुने बताए। ‘केन्द्रीय समितिमा बसेका मानिसलाई अनुशासन लाग्छ कि लाग्दैन। एउटा पदाधिकारीमा रहेको व्यक्तिले अर्कोको बारेमा आफ्नो धारण प्रस्तुत गरिरहँदा कस्तो सन्देश गएको छ,’ बलायरले भने, ‘यसरी हेर्दा पार्टीभित्र अहिले अनुशासन विहीनता छ। एकले अर्कोलाई आरोप लगाएको छ। मनमा जे लागेको छ त्यही मात्र भन्दै हिँडेको देखिएको छ।’
केन्द्रीय सदस्य बलायरले पार्टी केन्द्रदेखि प्रदेश र स्थानीय तहसम्म सरकारमा रहेको, तर मतदातालाई किन आसावादी बनाउन सकिएन भन्दै प्रश्न गरे।
‘हामी केन्द्रदेखि प्रदेशसम्म सरकारमा छौं, तर हामीले मतदातालाई आसावादी बनाउन किन सकेका छैनौँ?’ उनले भने, ‘जनतालाई सन्तुष्ट हुने गरी काम नगर्ने हो भने कम्युनिस्ट पार्टीहरु र एमाले जस्तै हामीमा के फरक हुन्छ?’
उनले भ्रष्टाचारका विषयमा पनि कडा हुनुपर्ने माग गरे। ‘अनियमितता कुनै पनि अवस्थामा सह्य हुन सक्दैन। केन्द्रको सरकारदेखि प्रदेश र स्थानीय सरकार पारदर्शी हुनुपर्छ,’ उनले भने, ‘सरकारमा गएका मानिसहरुले आफ्नो तरिकाले काम गर्ने अनि क्षति पार्टीले बेहोर्नुपर्ने भएमा कसरी हुन्छ? केही मन्त्रीहरुको बारेमा टिप्पणी आएका छन्।’
गण्डकी प्रदेश सभापति शुक्रराज शर्माले पार्टी नेतृत्वलाई केन्द्रबाट शासन बन्द हुनुपर्ने माग गरे। पार्टी केन्द्रले जिल्ला र पालिकासम्म सिधा सम्पर्क राख्दा पार्टीको संघीय संचनाको औचित्य घटाएको बताए।
‘केन्द्रबाट जिल्लादेखि पालिकासम्म सिधा सम्पर्क गर्दा प्रदेशको औचित्य घटिरहेको छ,’ उनले भने, ‘जिल्ला र स्थानीय तहले पनि प्रदेशको मातहत छु भन्ने धारणा त्याग्न थालेका छन्। त्यसैले केन्द्रबाट शासन बन्द गरियोस्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
