दाङ– दाङको घोराहीस्थित गोरक्ष पत्रदेव मठ, जो चौघेरा मन्दिरको नामले चिनिन्छ। सुन्दर र शान्त वातावरण भएकाले पछिल्लो समय अवलोकन गर्न आउनेहरुको संख्या बढ्दै गएको छ। तर मन्दिर परिसरमा नाथ सम्प्रदायको पुस्तकालय पनि भन्ने धेरैलाई थाहा छैन।
विक्रम सम्वत् ८०९ मा स्थापना भएको यस मठमा दैनिकजसो पूजापाठ र अवलोकनका लागि थुप्रै मानिस आउने गर्छन्।
२०२२ सालमा योगी नरहरिनाथले स्थापना गरेको पुस्तकालय भवनमा जहिले पनि ताला लगाइएको हुन्छ। लाग्छ, यहाँ वर्षौंदेखि कोही आएको छैन। आएका छन् त केवल मुसा र चराचुरुंगी मात्र।
यो पुस्तकालयमा योगी नरहरिनाथले संकलन गरेका ऐतिहासिक पुस्तकका साथै अप्रकाशित हस्तलिखित दस्तावेजहरु पनि छन्, जुन यत्रतत्र छरिएको प्रस्ट देख्न सकिन्छ।
पुस्तकालय मात्र नभई यहाँ उनै योगीले बनाएका चित्रहरु पनि बन्द कोठमा थुप्रिएका छन्। चित्रकार प्रभातनाथ योगीले विभिन्न धार्मिक ग्रन्थमा उल्लेखित घटनालाई चित्रका माध्यमबाट व्याख्या गरेका पेन्टिङ मठकै एउटा कोठामा थुप्रिएका छन्। स्थान र आर्थिक अभावका कारण संरक्षण गर्न अप्ठ्यारो परेको मठले जनाएको छ।
व्यवस्थित गर्न चाहँदा चाहँदै पनि नसकिएकोमा मठका कर्मचारी हिरानाथ योगी दु:ख व्यक्त गर्छन्। ‘हामीले नचाहेको होइन, परिस्थिति नै त्यस्तै भयो। ठाउँ छैन, कहाँ राख्ने?’ उनी भन्छन्, ‘गुरु जी (प्रभातनाथ) को अपमान गरेझैं भएको छ तर मन्दिरको पनि आफ्नै समस्या छन्, संरक्षण गरेर राख्ने त हामीलाई पनि रहर हो।’
२०२३ सालदेखिका पेन्टिङ यहाँ रहेका छन्, जहाँ पूर्व राजादेखि धार्मिक कथाहरु चित्रमा उतारिएको छ। मठ परिसरमा निर्मित संरचनाहरुमा समेत योगीका चित्रहरु छरिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
