काठमाडौं- अर्थमन्त्री डा प्रकाशशरण महतले लघुवित्त संस्थाले लक्ष्य बिर्सन नहुने बताएका छन्। साना किसान विकास लघुवित्त वित्तीय संस्था र आरएमडीसी लघुवित्त वित्तीय संस्थाको एकीकृत कारोबार शुभारम्म समारोहमा बोल्दै मन्त्री डा महतले भने, ‘मर्जरपछि यसको क्षमता र सेवा दिने लक्ष्य अझ घनिभूत हुनेछ।’
अर्थमन्त्री महतले नुवाकोटको तुप्चे र धनुषाको महेन्द्रनगरबाट सुरु भएको साना किसान विकास लघुवित्त अहिले देशैभर फैलिएको बताउँदै एकीकृत सेवा प्रवाह भएपछि हुम्ला पनि समेटिने विश्वास व्यक्त गरे।
‘१२ लाख साना किसान परिवार सहकारीमार्फत सेवा प्राप्त गरिरहेका छन्। यो ठूलो संख्या हो। ४५ अर्ब र सहकारी आफैंले सञ्चालन गरेको स्थानीय वित्तीय स्रोतबाट ६७ अर्ब रुपैयाँ किसानलाई आवश्यक सेवा दिएको जानकारी प्राप्त भएको छ। ८० प्रतिशत यसमा महिला सहभागी हुनुहुन्छ,’ आदिवासी जनजातिको ३८ प्रतिशत, दलितको संख्या ११ प्रतिशत रहेको तथ्यांक सुनाउँदै उनले भने, ‘समग्रमा जनसंख्याको जुन आकार छ, त्यो सबैलाई समेट्ने खालको छ, यो एकदमै खुसीको कुरा हो।’
मन्त्री महतका अनुसार साना किसानको जीवस्तर उठाउनुपर्ने लघुवित्तको लक्ष्य हो। ‘सरकारको पनि त्यही लक्ष्य हो। एउटा तहबाट अर्को तहमा जाँदा महँगो हुने भयो भनेर सरकारले संस्थागत संयन्त्र विकसित गरेको हो। कसरी थोरै ब्याजमा पुँजी प्रवाह गर्ने भन्ने विषय हाम्रा लागि चुनौती हो,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
